ആവേശത്തില്‍ ഭാര്യയെ തെറി വിളിച്ചപ്പോള്‍ ആ ഭര്‍ത്താവ് ഒരിക്കലും കരുതിയില്ല ഇങ്ങനെയൊരവസ്ഥ ആകുമെന്ന്. ചൈനയിലെ സുഹോവു പ്രദേശത്തുള്ള ഴാങ് എന്ന യുവാവാണ് പെട്ടുപോയത്. ചെറിയ വാതിലില്‍ കുടുങ്ങിയ തല പുറത്തെടുക്കാനും അനങ്ങാനും സാധിക്കാതെ കുടുങ്ങി കിടന്നത് മണിക്കൂറുകള്‍. സ്ഥിരമായി മദ്യപിച്ച് വീട്ടില്‍ എത്തുന്ന ഇയാള്‍ ഭാര്യയെ ക്രൂരമായി ഉപദ്രവിച്ചിരുന്നു. 

പീഡനം സഹിക്കാന്‍ വയ്യാതെ ഭാര്യ ഇയാളെ മുറിയില്‍ ഇട്ടു പൂട്ടി. അലൂമിനിയം ഭിത്തിയിള്ള മുറിയുടെ ചെറിയ ദ്വാരത്തിലൂടെ തെറിവിളിക്കാനായി പുറത്തേയ്ക്ക് തല ഇട്ടതാണ് അബദ്ധമായത്. എത്ര ശ്രമിച്ചിട്ടും കയറ്റിയതു പോലെ തല ഇറങ്ങി വന്നില്ല. അവസാനം രക്ഷയ്‌ക്കെത്തിയതും ഭാര്യയാണ്. അവര്‍ അഗ്‌നിശമന സേനയെ വിളിച്ചു വരുത്തി. നീണ്ട കാത്തിരിപ്പിനൊടുവില്‍ അഗ്‌നിശമന സേന എത്തിയാണ് തല പുറത്തെടുത്തത്. 

ആറു അഗ്‌നിശമന സേനാംഗങ്ങള്‍ മെറ്റല്‍ കട്ടറും ഹൈഡ്രോളിക് മെഷീനും ഉപയോഗിച്ച് വാതില്‍ തകര്‍ത്താണ് രക്ഷപ്പെടുത്തിയത്. ഒരു മണിക്കൂറോളം ശ്രമിച്ച ശേഷമാണ് പരിക്കുകളില്ലാതെ യുവാവ് രക്ഷപ്പെട്ടത്. വൈകിയിരുന്നെങ്കില്‍ ജീവന്‍ തന്നെ അപകടത്തിലായേനെ.