മാജിക്ക് കാണിച്ച് അത്ഭുതാദരങ്ങള്‍ ഏറ്റുവാങ്ങാന്‍ ആര്‍ക്കാണ് ഇഷ്ടമില്ലാത്തത്? നമ്മളെല്ലാവരും കാണിച്ചിട്ടുണ്ടാകും ചെറിയ ചെറിയ നമ്പരുകള്‍. ചൈനക്കാരനായ ഈ യുവാവും അല്‍പം മാജിക്ക് കാണിച്ചു പ്രശസ്തനാകാന്‍ നോക്കിയതാണ്. പക്ഷേ സ്വന്തം മകന്‍ തന്നെ അത് പൊളിച്ചടുക്കിയെന്നു മാത്രമല്ല, മാനഹാനിയും ശാരീരികപീഡയും സൗജന്യമായി കൈയ്യില്‍ കിട്ടി. സമൂഹമാധ്യമങ്ങളില്‍ വൈറലായ പതിനാറു സെക്കന്റ് മാത്രമുള്ള ഈ വിഡിയോ കണ്ടാല്‍ തലതല്ലി ചിരിച്ചുപോകും. ഏതു മാജിക്കിനു മുമ്പും ഒന്നുകൂടി ചുറ്റിലും നോക്കി കുസൃതിക്കാരായ മക്കള്‍ അടുത്തില്ലെന്ന് ഉറപ്പുവരുത്തണമെന്നു കൂടി പറഞ്ഞുവെക്കുകയാണ് ഈ വിഡിയോ.

അന്തരീക്ഷത്തില്‍ അപ്രത്യക്ഷനാകുന്ന മാജിക്ക് കാണിക്കാനായിരുന്നു കക്ഷിയുടെ പ്‌ളാന്‍. വീടിന്റെ പൂന്തോട്ടത്തില്‍ നിന്നാണു പുള്ളിയുടെ അഭ്യാസം. യുവാവ് മാജിക്കിനായി തയ്യാറെടുക്കുമ്പോള്‍ പിന്നില്‍ ഒരു കുസൃതി പയ്യനെ വീഡിയോയില്‍ കാണാം. വീടിന്റെ അകത്തോട്ടുള്ള വാതില്‍ തുറന്നിട്ടിരിക്കുന്നതായും കാണാം. ഒരു ബ്രൗണ്‍ പ്‌ളാസ്റ്റിക്ക് ഷീറ്റ് തനിക്കഭിമുഖമായി നിവര്‍ത്തിപ്പിടിച്ച് അതു താഴേക്ക് വീഴ്ത്തുന്നു.അത് താഴെ എത്തുമ്പോള്‍ അതു പറത്തിയ ആള്‍ അന്തരീക്ഷത്തില്‍ അലിഞ്ഞു പോകുന്ന ഭീകര ആശയം നടപ്പാക്കാനാണ് ശ്രമിച്ചത്.

ഷീറ്റു താഴെ വീഴുന്ന തക്കത്തിന് തുറന്നു കിടക്കുന്ന വാതിലിലൂടെ വീടിനകത്തേക്കു മാഞ്ഞു പോകുക എന്നതായിരുന്നു യമണ്ടന്‍ മാജിക്ക്. ഒന്ന്, രണ്ട്, മൂന്ന്.... പാവം മജീഷ്യന്‍, കുരുത്തം കെട്ട മകന്‍ അകത്ത് കയറി വാതിലടച്ചതറിയാതെ ഒറ്റ ചാട്ടം. പിന്നെ കേട്ടത് ഒരു നിലവിളി ശബ്ദം. അടഞ്ഞവാതിലിന് നേരെ ചാടിയാല്‍ എന്തു സംഭവിക്കുമെന്ന് പറയേണ്ട കാര്യമില്ലല്ലോ. തലയടിച്ച് ദേ കിടക്കുന്നു മഹാ മജീഷ്യന്‍. ഇതുപോലെയുള്ള മനോഹരമായ ആചാരങ്ങള്‍ ഇനിയുമുണ്ടോ അച്ഛാ എന്ന് അവന്‍ ഉള്ളിന്റെ ഉള്ളില്‍ ചോദിക്കുന്നുണ്ടായിരിക്കണം!