ഇറച്ചിയുടെ രുചികൂട്ടുവാന്‍ കന്നുകാലികള്‍ക്ക് ചോക്ലേറ്റ് കലര്‍ത്തിയ ആഹാരം നല്‍കി വിജയിച്ച ഒരു ഫാം
സ്‌കോട്ട് ഡി ബ്രൂയിന്‍ എന്നയാള്‍ 1998-ല്‍ ഓസ്‌ട്രേലിയയില്‍ ആരംഭിച്ച ഒരു ഫാം ഇന്ന് ജനപ്രിയതയുടെ കാര്യത്തില്‍ വളരെ മുന്നിലാണ്. മയൂര ഫാം എന്ന ഈ ഫാമിലെ കന്നുകാലികളില്‍ നിന്നു ലഭിക്കുന്ന മാംസത്തിനു പ്രത്യേക രുചിയാണുള്ളത് എന്നതിനാല്‍ ഓസ്‌ട്രേലിയയിലെ ഏറ്റവും ആവശ്യക്കാരുള്ള ബീഫ് ആണ് മയൂര ഫാമിലേത്.
മറ്റുള്ളവരുടെതില്‍ നിന്നു വ്യത്യസ്തമായി തങ്ങളുടെ ബീഫിനു എന്ത് പ്രത്യേകതയുണ്ടാക്കാം എന്ന ആലോചനയായിരുന്നു ഈ പ്രത്യേക സ്വാദില്‍ കൊണ്ടെത്തിച്ചത്. അതിനു വേണ്ടി ജപ്പാനില്‍ നിന്നു ഒരു ഗവേഷകനെ കൊണ്ടു വന്നു. അദ്ദേഹമാണു രണ്ടു വര്‍ഷത്തെ ഗവേഷണഫലമായി ഒരു കണ്ടെത്തല്‍ നടത്തിയത്. കന്നുകാലികള്‍ക്കു സ്ഥിരം നല്‍കുന്ന തീറ്റയോടൊപ്പം ചോക്കലെയ്റ്റ് കൂടി നല്‍കിയാല്‍ മാംസത്തിനു പ്രത്യേക രുചിയുണ്ടാകും എന്ന് മനസ്സിലായതോടെ ആ രീതിയില്‍ പ്രവര്‍ത്തനങ്ങള്‍ തുടങ്ങി. രണ്ടു കിലോയോളം ചോക്ലേറ്റ് മിക്‌സ് ചെയ്ത ഭക്ഷണം കഴിയ്ക്കും ഈ ഫാമിലെ കന്നുകാലികള്‍.
200 വര്‍ഷങ്ങള്‍ക്കു മുമ്പ് ജപ്പാന്‍ മറ്റ് പുറം രാജ്യങ്ങളുമായി യാതൊരു വിധ വ്യാപാര വാണിജ്യ ബന്ധങ്ങളുമില്ലാതെ ഒറ്റപ്പെട്ട് നിലകൊള്ളുകയായിരുന്നു. ഇഡോ കാലഘട്ടം എന്നറിയപ്പെടുന്ന ആ കാലത്ത് അവിടെയുണ്ടായിരുന്ന കന്നുകാലികളില്‍ സങ്കരയിനങ്ങള്‍ ഉണ്ടായിരുന്നില്ല. ജപ്പാനിലെ തനതു ജനുസ്സുകളില്‍പെട്ടവയായിരുന്നു അവിടത്തെ കന്നുകാലികള്‍.
ഇഡോ കാലഘട്ടം കഴിഞ്ഞെത്തിയ മെയ്ജി കാലഘട്ടത്തിലാണ് വാഗ്യു എന്ന ഇനത്തില്‍പ്പെട്ട കന്നുകാലികളെ വ്യാവസായികാടിസ്ഥാനത്തില്‍ പ്രജനനം നടത്താന്‍ ആരംഭിച്ചത്. ഇപ്രകാരം ചെയ്യുന്നതിന് ഒരേയൊരു ലക്ഷ്യമേ ഉണ്ടായിരുന്നുള്ളൂ.ഏറ്റവും രുചിപ്രദായകമായ മാംസം ലഭ്യമാക്കുക എന്നതായിരുന്നു അത്.
വാഗ്യു കന്നുകാലികളുടെ മാംസത്തിന്റെ ഏറ്റവും വലിയ പ്രത്യേകത കാഴ്ചയില്‍ അത് മാര്‍ബിള്‍ പോലെ ആയിരിക്കും എന്നതാണ്. കാലികളിലെ മാംസത്തില്‍ കൊഴുപ്പ് അടിയുന്നതാണ് അതിനെ കാഴ്ചയ്ക്ക് മാര്‍ബിള്‍ പോലെയുള്ളതാക്കി തീര്‍ക്കുന്നത്. ചുവന്ന മാംസത്തില്‍ കൊഴുപ്പ് വെളുത്ത നിറത്തില്‍ വ്യാപിച്ചു കിടക്കുമ്പോഴാണ് മാര്‍ബിള്‍ പ്രതീതി കൈവരുന്നത് ഇപ്രകാരം കൊഴുപ്പുണ്ടാക്കാനായി അധികം മേഞ്ഞു നടക്കാന്‍ അനുവദിക്കാതെ ധാരാളം കലോറിയുള്ള ഭക്ഷണം നല്‍കി 30 മാസത്തോളം വളര്‍ത്തിയതിനുശേഷമാണ് ഇതിന്റെ മാംസം എടുക്കുന്നത്. തന്മൂലം ഇവയുടെ മാംസം വളരെ മൃദുവും നനവാര്‍ന്നതും സ്വാദേറിയതും ആയിരിക്കും. ഇന്ത്യന്‍ ബീഫും ഇവയും ചേര്‍ത്തു വച്ചു നോക്കിയാല്‍ വാഗ്യു ഇറച്ചിയിലെ മാര്‍ബിളിംഗ് വ്യക്തമായി തിരിച്ചറിയാന്‍ കഴിയുകയും ചെയ്യും.
പൊടിച്ച കാഡ്ബറി ചോക്ലേറ്റുകള്‍ ആണ് മയൂര ഫാമിലെ കാലികള്‍ക്കു നല്‍കുന്നത്. സംഭവം പരീക്ഷണാടിസ്ഥാനത്തില്‍ തുടങ്ങിയതാണെങ്കിലും വിജയിച്ചു. വില്‍പ്പന കുത്തനെ കൂടി. കുറച്ചു നാള്‍ ഈ ചോക്ലേറ്റ് മിക്‌സിംഗ് ഇല്ലാതെ നോകിയപ്പോള്‍ ആവശ്യക്കാര്‍ തന്നെ പരാതിയുമായി എത്തി. ആളുകള്‍ക്ക് പ്രിയം പരീക്ഷണ ബീഫ് തന്നെയാണ് എന്നു മനസ്സിലായ കമ്പനി വീണ്ടും കന്നുകാലികളെ ചോക്ലേറ്റ് തീറ്റിച്ച് തുടങ്ങി. സാധാരണക്കാര്‍ക്ക് താങ്ങാവുന്നതിലും അപ്പുറമാണ് ഈ ബീഫിന്റെ വില. ഒരു ചെറിയ ബീഫ് സ്ടീക്കിനു ഇരുപതിനായിരം രൂപയോളമാണ് വില.
https://www.facebook.com/Malayalivartha
