മെഡിക്കല്‍ അടക്കമുള്ള കോഴ്‌സുകളിലേക്ക് മാറിപ്പോവുകയോ, ഇടയ്ക്കു വച്ച് പഠനം മതിയാക്കുകയോ ചെയ്യുന്ന എന്‍ജിനിയറിംഗ് വിദ്യാര്‍ത്ഥികളില്‍ നിന്ന് തുടര്‍ന്നും പിഴയീടാക്കാന്‍ സ്വാശ്രയ കോളേജുകള്‍ക്ക് സര്‍ക്കാര്‍ അനുമതി നല്‍കി. സര്‍ക്കാര്‍, എയ്ഡഡ്, സര്‍ക്കാര്‍ നിയന്ത്രിത സ്വാശ്രയ കോളേജുകളില്‍ മാത്രമായി പിഴ ഒഴിവാക്കി. ഒരു ലക്ഷം രൂപ മുതല്‍ നാല് വര്‍ഷത്തെ ഫീസ് വരെ മിക്ക കോളേജുകളും പിഴയായി ഈടാക്കുന്നുണ്ട്.
പിഴയീടാക്കുന്നത് പൂര്‍ണമായി ഒഴിവാക്കണമെന്ന് ഉന്നതവിദ്യാഭ്യാസ പ്രിന്‍സിപ്പല്‍ സെക്രട്ടറി ഉഷാടൈറ്റസ് അദ്ധ്യക്ഷയായ സമിതി വിദ്യാഭ്യാസവകുപ്പിന് ശുപാര്‍ശ നല്‍കിയിരുന്നു. പ്രോസ്‌പെക്ടസിലെ വ്യവസ്ഥകള്‍ റദ്ദാക്കാനായിരുന്നു ശുപാര്‍ശ.
എന്നാല്‍ സ്വാശ്രയ കോളേജുകളുടെ സമ്മര്‍ദ്ദത്തിന് വഴങ്ങി തുടര്‍ന്നും പിഴയീടാക്കാന്‍ സര്‍ക്കാര്‍ അനുവദിക്കുകയായിരുന്നു. പ്രവേശനത്തിനുള്ള അവസാന തിയതിക്ക് ശേഷം കോളേജോ, കോഴ്‌സോ മാറുന്നവര്‍ തുടര്‍ന്നും വന്‍ തുക പിഴ നല്‍കേണ്ടി വരും.

പ്രവേശനം നേടിയ അതേ വര്‍ഷം മറ്റ് കോഴ്‌സുകളിലേക്ക് മാറുന്നവരും പഠനം മതിയാക്കുന്നവരും 75000 രൂപ പിഴ നല്‍കണമെന്നായിരുന്നു വ്യവസ്ഥ. ആദ്യവര്‍ഷം കഴിഞ്ഞാണ് വിട്ടുപോകുന്നതെങ്കില്‍ മുഴുവന്‍ കോഴ്‌സ് ഫീസും അടച്ചാലേ വിടുതല്‍ സര്‍ട്ടിഫിക്കറ്റും രേഖകളും സര്‍ട്ടിഫിക്കറ്റുകളും നല്‍കൂ. ഇയര്‍ഔട്ടില്‍ കുടുങ്ങി എന്‍ജിനിയറിംഗ് കോഴ്‌സില്‍ നിന്ന് പുറത്തുപോകേണ്ടി വരുന്നവര്‍ക്കും മുഴുവന്‍ ഫീസും നല്‍കേണ്ടിയിരുന്നു.
പുതിയ ഉത്തരവു പ്രകാരം ,2017-18 മുതല്‍ പ്രവേശനം നേടിയവര്‍ക്ക് അടച്ച ഫീസും വിടുതല്‍ സര്‍ട്ടിഫിക്കറ്റും നല്‍കും. 201718 ന് മുന്‍പ് പ്രവേശനം നേടിയവരില്‍ ടി.സി വാങ്ങിയവരുടെ കാര്യം പുന:പരിശോധിക്കില്ല. ഇവര്‍ ഇനി ടി.സിക്ക് അപേക്ഷിച്ചാല്‍ മുന്‍പ് നിലവിലുണ്ടായിരുന്ന പിഴ അടയ്‌ക്കേണ്ടതില്ല. എന്നാല്‍, അടച്ച ഫീസ് തിരികെ നല്‍കില്ല. ഐ.എച്ച്.ആര്‍.ജിയുടെ കോളേജ് ഒഫ് അപ്ലൈഡ് സയന്‍സ്, പോളിടെക്‌നിക് കോളേജ്, ടി.എച്ച്.എസ്.എസ് എന്നിവിടങ്ങളിലെ വിദ്യാര്‍ത്ഥികള്‍ക്കും ഈ വ്യവസ്ഥകള്‍ ബാധകമാണെന്ന് ജോയിന്റ് സെക്രട്ടറി എ.ജെയിംസ് രാജ് ഇറക്കിയ ഉത്തരവില്‍ പറയുന്നു. പിഴ ഒഴിവാക്കി ഉത്തരവിറക്കിയാല്‍ സ്വാശ്രയകോളേജുകള്‍ കോടതിയില്‍ പോവുമെന്നും അവരുമായി ചര്‍ച്ച നടത്തിയ ശേഷം പിഴയൊഴിവാക്കുന്നത് തീരുമാനിക്കാമെന്നുമാണ് വിദ്യാഭ്യാസ വകുപ്പിന്റെ നിലപാട്.