ഹയര് സെക്കന്ഡറി ചോദ്യപേപ്പര് പാറ്റേണ് പരിഷ്ക്കാരം വിദ്യാര്ത്ഥികള് ആശങ്കയില്
ഹയര് സെക്കന്ഡറി പരീക്ഷയ്ക്കു സമയമായിട്ടും ചോദ്യപേപ്പര് പാറ്റേണ് പരിഷ്കരിക്കാനുള്ള തീരുമാനത്തില് സര്വത്ര ആശയക്കുഴപ്പം. ചോദ്യപേപ്പര് പരിഷ്കരിക്കാന് കരിക്കുലം കമ്മിറ്റി തീരുമാനമെടുത്തിട്ട് അഞ്ച് മാസം പിന്നിട്ടിട്ടും ഇതുസംബന്ധിച്ച് വിദ്യാര്ഥികള്ക്കും അധ്യാപകര്ക്കും പരിശീലനമോ ബോധവത്കരണമോ നടത്തിയിട്ടില്ല.
ഫെബ്രുവരിയില് ഹയര് സെക്കന്ഡറി മോഡല് പരീക്ഷയും മാര്ച്ചില് പൊതുപരീക്ഷയും നടക്കാനിരിക്കെയാണ് ചോദ്യമാതൃക സംബന്ധിച്ച് ആശയക്കുഴപ്പം തുടരുന്നത്. പരീക്ഷണാര്ഥം ഹയര് സെക്കന്ഡറി രണ്ടാം വര്ഷ വിദ്യാര്ഥികള്ക്ക് ഓണപ്പരീക്ഷക്കും ഒന്നും രണ്ടും വര്ഷ വിദ്യാര്ഥികള്ക്ക് ക്രിസ്മസ് പരീക്ഷക്കും പുതിയ പാറ്റേണില് ചോദ്യം നല്കിയിരുന്നു. മാറ്റം അറിയാതെയാണ് വിദ്യാര്ഥികള് പരീക്ഷ എഴുതിയത്. പൊതു പരീക്ഷകള്ക്ക് ഏത് മാതൃകയിലാണ് ചോദ്യം എന്നത് സംബന്ധിച്ച് വിദ്യാര്ഥികളില് ആശങ്കയുമുണ്ട്. നിലവില് ഒബ്ജക്ടീവ് ചോദ്യങ്ങള് പലയിടത്തായി ചിതറിക്കിടക്കുകയും ചോദ്യങ്ങളെ പല പാര്ട്ടായി തിരിക്കുന്ന രീതിയുമുണ്ടായിരുന്നു. ഇതിനുപകരം കൂടുതല് ശാസ്ത്രീയം എന്ന നിലയിലാണ് പുതിയ ചോദ്യമാതൃക കൊണ്ടുവരാന് കരിക്കുലം കമ്മിറ്റി തീരുമാനിച്ചത്.
എന്നാല്, തീരുമാനം ഓണം, ക്രിസ്മസ് പരീക്ഷകളില് മുന്നൊരുക്കമില്ലാതെ പരീക്ഷിച്ചതല്ലാതെ വിദ്യാര്ഥികള്ക്ക് ഇതുസംബന്ധിച്ച് ഔദ്യോഗിക അറിയിപ്പോ ബോധവത്കരണമോ നല്കിയില്ല. ചോദ്യമാതൃക മാറുമ്പോള് മൂല്യനിര്ണയത്തില് ശ്രദ്ധിക്കേണ്ട കാര്യങ്ങളില് അധ്യാപകര്ക്ക് പരിശീലനവും നല്കണം. പുതിയ മാതൃക പ്രകാരം ഒബ്ജക്ടീവ് ചോദ്യങ്ങള് ഒന്നിച്ച് വരികയും വിവരണാത്മക ചോദ്യങ്ങള് തെരഞ്ഞെടുത്ത് എഴുതാവുന്നതുമായരീതിയാണ് നടപ്പാക്കുന്നത്. എട്ട് ചോദ്യങ്ങള് നല്കി അവയില്നിന്ന് നിശ്ചിത ചോദ്യങ്ങള്ക്ക് ഉത്തരമെഴുതാന് നിര്ദേശിക്കുന്നതും പുതിയ ചോദ്യമാതൃകയില് ഉള്പ്പെടുന്നു. മുഴുവന് ചോദ്യങ്ങള്ക്കും ഉത്തരമെഴുതുന്ന കുട്ടികളുടെ ഏത് ഉത്തരത്തിന് മാര്ക്ക് നല്കണമെന്നത് ഉള്പ്പെടെ കാര്യങ്ങളിലും തീരുമാനമെടുക്കണം.
ആദ്യത്തെ ഉത്തരങ്ങള്ക്ക് മാര്ക്ക് നല്കണമെന്ന് ചിലര് പറയുമ്പോള് മികച്ച ഉത്തരങ്ങള്ക്ക് മാര്ക്ക് നല്കണമെന്ന് മറ്റ് ചിലരും ചൂണ്ടിക്കാട്ടുന്നു. ഫെബ്രുവരിയില് നടക്കുന്ന മോഡല് പരീക്ഷയിലും മാര്ച്ചില് നടക്കുന്ന പൊതുപരീക്ഷയിലും ഏത് മാതൃകയിലുള്ള ചോദ്യമാണ് വരുന്നതെന്ന് വിദ്യാര്ഥികളെ ഇതുവരെയും അറിയിച്ചിട്ടുമില്ല. ഇതുസംബന്ധിച്ച് വിശദവിജ്ഞാപനം ഹയര് സെക്കന്ഡറി ഡയറക്ടറേറ്റ് പുറത്തിറക്കേണ്ടതുണ്ട്. അധ്യാപകര്ക്ക് പരിശീലനം സംഘടിപ്പിക്കേണ്ടത് എസ്.സി.ഇ.ആര്.ടിയാണ്.
എന്ജിനീയറിങ് പ്രവേശനത്തിന് ഉള്പ്പെടെ ഹയര് സെക്കന്ഡറി പരീക്ഷയിലെ മാര്ക്ക് പരിഗണിക്കുന്നതിനാല് ചോദ്യ മാതൃകയിലെ മാറ്റം സംബന്ധിച്ച അവ്യക്തത രക്ഷിതാക്കളെയും ആശങ്കയിലാക്കിയിട്ടുണ്ട്. അതേസമയം, ചോദ്യപേപ്പര് പാറ്റേണിലെ മാറ്റം സംബന്ധിച്ച് ജനുവരിയില്തന്നെ അധ്യാപകര്ക്ക് പരിശീലനം നല്കാനുള്ള നടപടികള് സ്വീകരിച്ചുവരികയാണെന്നാണ് ഹയര് സെക്കന്ഡറി ഡയറക്ടറേറ്റ് അധികൃതര് പറയുന്നത്.
https://www.facebook.com/Malayalivartha