എസ്.എസ്.എല്.സി പരീക്ഷാ തീയതിയില് മാറ്റം
എസ്.എസ്.എല്.സി പരീക്ഷ തീയതിയില് മാറ്റം. മാര്ച്ച് 12ന് നടത്താനിരുന്ന ഇംഗ്ലീഷ് പരീക്ഷ മാര്ച്ച് 28ലേക്ക് മാറ്റാന് പൊതുവിദ്യാഭ്യാസ ഡയറക്ടര് കെ.വി. മോഹന്കുമാറിന്റെ അധ്യക്ഷതയില് ചേര്ന്ന ക്വാളിറ്റി ഇംപ്രൂവ്മന്റെ് പ്രോഗ്രാം (ക്യു.ഐ.പി) യോഗം തീരുമാനിച്ചു. 12ന് വൈകുണ്ഠസ്വാമി ജന്മദിനം പ്രമാണിച്ച് സംസ്ഥാനത്ത് നിയന്ത്രിത അവധി പ്രഖ്യാപിച്ച സാഹചര്യത്തിലാണിത്. മറ്റ് പരീക്ഷകളുടെ തീയതിയില് മാറ്റമില്ല. ഇതോടെ മാര്ച്ച് ഏഴിന് തുടങ്ങി 26ന് അവസാനിക്കേണ്ട എസ്.എസ്.എല്.സി പരീക്ഷ 28നായിരിക്കും പൂര്ത്തിയാവുക.
ഉച്ചക്കുശേഷം 1.45 മുതലാണ് പരീക്ഷസമയം. പുതുക്കിയ ടൈംടേബിള്: മാര്ച്ച് ഏഴിന് ഒന്നാം ഭാഷ, പാര്ട്ട് ഒന്ന്, എട്ട് ഒന്നാം ഭാഷ പാര്ട്ട് രണ്ട്, 13 ഹിന്ദി, 15 ഫിസിക്സ്, 19 ഗണിതം, 21 കെമിസ്ട്രി, 22 ബയോളജി, 26 സോഷ്യല് സയന്സ്, 28 ഇംഗ്ലീഷ്.
എസ്.എസ്.എല്.സി പരീക്ഷക്ക് ഇടയിലുള്ള വെള്ളിയാഴ്ചകളില് എട്ട്, ഒമ്പത് ക്ലാസുകളിലെയും ഹൈസ്കൂളുകളോട് ചേര്ന്നുള്ള എല്.പി, യു.പി ക്ലാസുകളിലെയും വാര്ഷികപരീക്ഷകള് നടത്താനും തീരുമാനിച്ചു. വെള്ളിയാഴ്ചകളില് എസ്.എസ്.എല്.സി പരീക്ഷയില്ലാത്ത സാഹചര്യത്തിലാണ് മറ്റ് ക്ലാസുകളിലെ പരീക്ഷ നടത്തുന്നത്. ഇതുപ്രകാരം മാര്ച്ച് ഒമ്പത്, 16, 23 തീയതികളില് പരീക്ഷ നടക്കും. എട്ട്, ഒമ്പത് ക്ലാസുകളിലെ വാര്ഷികപരീക്ഷ ഫെബ്രുവരി 28ന് തുടങ്ങും. മാര്ച്ച് ഒന്ന്, അഞ്ച്, ഒമ്പത്, 16, 23, 27 തീയതികളിലായിരിക്കും പരീക്ഷ. ഹൈസ്കൂളുകളോട് ചേര്ന്നുള്ള എല്.പി, യു.പി ക്ലാസുകളില് മാര്ച്ച് ഒന്ന്, അഞ്ച്, ഒമ്പത്, 16, 23, 27 തീയതികളിലാകും പരീക്ഷ. ഹൈസ്കൂളുകള്ക്കൊപ്പമല്ലാത്ത എല്.പി, യു.പി സ്കൂളുകളില് മാര്ച്ച് 20, 21, 22, 23, 26, 27 തീയതികളിലാണ് വാര്ഷികപരീക്ഷ. മുസ്ലിം കലണ്ടര് പിന്തുടരുന്ന സ്കൂളുകളില് ഏപ്രില് 19, 21, 23, 24, 25, 26 തീയതികളിലാണ് പരീക്ഷ.
https://www.facebook.com/Malayalivartha