കോണ്സ്റ്റബിള് പരീക്ഷ മുതല് പി.എസ്.സി കണ്ഫര്മേഷന് സംവിധാനം നിലവില് വരും
അടുത്തമാസം 26 ന് നടക്കുന്ന സിവില് പൊലീസ് ഓഫീസര് തസ്തികയിലേക്കുള്ള പരീക്ഷ മുതല് പി.എസ്.സിയില് ഹാള് ടിക്കറ്റ് കണ്ഫര്മേഷന് സംവിധാനം നിലവില് വരുമെന്ന് ചെയര്മാന് അഡ്വ. എം.കെ.സക്കീര് വാര്ത്താസമ്മേളനത്തില് അറിയിച്ചു. 6.60 ലക്ഷം പേരാണ് സിവില് പൊലീസ് ഓഫീസര് പരീക്ഷയ്ക്ക് അപേക്ഷിച്ചിട്ടുള്ളത്. 2.32 ലക്ഷം പേര് ഇതിനകം ഹാള് ടിക്കറ്റ് ഡൗണ്ലോഡ് ചെയ്ത് എടുത്തിട്ടുണ്ട്. അത് കണ്ഫര്മേഷനായി കരുതും. അവര് ഡൗണ്ലോഡ് ചെയ്തെടുത്ത ഹാള് ടിക്കറ്റ് അസാധുവാക്കും. കണ്ഫര്മേഷന് നടത്തുന്നവര്ക്കെല്ലാം നല്കുന്നതുപോലത്തെ ഹാള് ടിക്കറ്റ് അവര്ക്കും നല്കും. മേയ് 20 വരെ കണ്ഫര്മേഷന് നടത്താവുന്നതാണ്.
അപേക്ഷിച്ചിട്ട് പരീക്ഷ എഴുതാത്തത് മൂലമുണ്ടാകുന്ന അധിക ചെലവും കൂടുതലായി പരീക്ഷാ കേന്ദ്രങ്ങള് അനുവദിക്കുന്നതും ഒഴിവാക്കാനാണ് പുതിയ സംവിധാനം. അടുത്ത ശനിയാഴ്ച നടക്കുന്ന ഡ്രഗ്സ് ആന്ഡ് ഫാര്മസ്യൂട്ടിക്കല്സ് ഗാര്ഡനര് പരീക്ഷയ്ക്ക് 5 ലക്ഷം പേരാണ് അപേക്ഷിച്ചത്. ഹാള് ടിക്കറ്റ് ഡൗണ്ലോഡ് ചെയ്തത് 2.40 ലക്ഷം പേരും.
ഇരട്ടിയിലധികം പേര് പരീക്ഷ എഴുതുന്നില്ല. ഈ അപാകത പുതിയ സംവിധാനം നിലവില് വരുന്നതോടെ ഇല്ലാതാകും. ഞാന് പരീക്ഷ എഴുതും എന്ന് പി.എസ്.സിയുടെ ഓണ്ലൈനിലൂടെ കണ്ഫര്മേഷന് നടത്തുവര്ക്ക് മാത്രമേ ഹാള് ടിക്കറ്റ് അയയ്ക്കുകയുള്ളൂ. പരീക്ഷ നടത്തുന്നതിന്റെ 70 ദിവസം മുമ്പേ പരീക്ഷാ കലണ്ടര് പ്രസിദ്ധീകരിക്കും. കണ്ഫര്മേഷന് നടത്തേണ്ട തീയതി എസ്.എം.എസ് വഴി ഉദ്യോഗാര്ത്ഥികളെ അറിയിക്കും. മെഡിക്കല് കോളേജ് ഡോക്ടര്മാരെ നിയമിക്കുന്നതിന് ചോദ്യ ബാങ്ക് തയ്യാറാക്കുമെന്നും ചെയര്മാന് പറഞ്ഞു.
https://www.facebook.com/Malayalivartha