കസബ വിവാദത്തെ തുടര്‍ന്ന് പാര്‍വതിയുടെ മൈസ്റ്റോറിയുടെ പാട്ടിന് ഡിസ് ലൈക്ക് അടിച്ചത് പോലെ മമ്മൂട്ടിയുടെ പേരന്‍പ് സിനിമയുടെ ടീസറിനെതിരെയും ഡിസ് ലൈക്ക്
നടി പാര്‍വതിക്കെതിരെ നടന്ന മൈസ്റ്റോറി മോഡല്‍ സൈബര്‍ ആക്രമണം മമ്മൂട്ടിക്കെതിരെയും. മമ്മൂട്ടിയുടെ പേരന്‍പ് എന്ന തമിഴ് സിനിമയുടെ ടീസറിന് ഇതിനോടകം 706 ഡിസ് ലൈക്കുകളാണ് യൂട്യൂബില്‍ ലഭിച്ചത്. കസബ സിനിമയിലെ മമ്മൂട്ടിയുടെ സംഭാഷണത്തെ വിമര്‍ശിച്ചതിനെ തുടര്‍ന്ന് പാര്‍വതിയുടെ മൈസ്റ്റോറി സിനിമയുടെ ടീസറിനും ട്രെയിലറിലും മമ്മൂട്ടിയുടെ ആരാധകര്‍ ഉള്‍പ്പെടെ ഡിസ് ലൈക്ക് അടിച്ചിരുന്നു. സിനിമ ഇറങ്ങിയപ്പോഴും പാര്‍വതിക്കെതിരെ രൂക്ഷമായ സൈബര്‍ ആക്രമണമാണ് ഉണ്ടായത്. ചിത്രത്തില്‍ പാര്‍വതി വരുന്ന സീനുകളിലെല്ലാം ആദ്യദിവസം തിയേറ്ററുകളില്‍ വലിയ കൂ കൂ വിളിയായിരുന്നു.
അതേസമയം പേരന്‍പ് ടീസറിന് ഡിസ്‌ലൈക്ക് അടിച്ചവര്‍ മോഹന്‍ലാല്‍ ആരാധകര്‍ എന്ന് പറഞ്ഞു നടക്കുന്നവരാണെന്നും, പക്ഷെ അവര്‍ മോഹന്‍ലാല്‍ ആരാധകരല്ലെന്നും മമ്മൂട്ടിയെ വെറുക്കുന്ന വെറും കീടങ്ങളാണെന്നും മമ്മൂട്ടി ഫാന്‍സിലെ ചിലര്‍ ഫെയിസ്ബുക്കിലൂടെ അറിയിച്ചു. ദേശീയ തലത്തില്‍ ചര്‍ച്ചയാവാന്‍ പോവുന്ന ഈ ചിത്രത്തിനെതിരെ കുറച്ചെങ്കിലും ആളുകള്‍ തിരിയുന്നു എന്നത് സഹതാപത്തോടെയല്ലാതെ കഴിയില്ലെന്നും സത്യവാന്‍ അയ്യപ്പന്‍ എന്നയാള്‍ ഫെയിസ്ബുക്കിലൂടെ പറയുന്നു. പാര്‍വതിയുടെ മുഖമുള്ള വിഡിയോകള്‍ക്ക് എല്ലാം ഡിസ്‌ലൈക്ക് അടിച്ചവരാണ് ഇത് പറയുന്നതെന്ന് അക്ഷയ് ടി. അശോക് എന്നയാള്‍ പോസ്റ്റിന് മറുപടി നല്‍കുന്നു. ഇഷ്ടമില്ലാത്തവര്‍ ഡിസ്‌ലൈക്ക് അടിക്കും അതിനു ഇങ്ങനെ കരഞ്ഞു പോസ്റ്റ് ഇടണ്ടേ കാര്യം ഉണ്ടോ? എന്നും ചോദിക്കുന്നു.
നീണ്ട ഇടവേളയ്ക്ക് ശേഷം മമ്മൂട്ടി തമിഴില്‍ അഭിനയിച്ച പേരന്‍പിന്റെ ടീസറും ഓഡിയോയും കഴിഞ്ഞ ദിവസമാണ് ചെന്നൈയില്‍ റിലീസ് ചെയ്തത്. കസബ വിവാദത്തില്‍ പാര്‍വതിക്കെതിരെ മമ്മൂട്ടി ഫാന്‍സ് സൈബര്‍ ആക്രമണം നടത്തുകയും ഒരാള്‍ അറസ്റ്റിലാവുകയും ചെയ്തിരുന്നു. പാര്‍വതിക്കെതിരെയുള്ള ആക്രമണങ്ങളില്‍ മമ്മൂട്ടി മൗനംപാലിക്കുകയായിരുന്നു. പാര്‍വതിക്കെതിരായ മമ്മൂട്ടി ഫാന്‍സിന്റെ ആക്രമണം മൈസ്റ്റോറി എന്ന ചിത്രത്തെയും ബാധിച്ചു.
https://www.facebook.com/Malayalivartha
