മമ്മൂട്ടി ആദ്യമായി പെണ്വേഷം കെട്ടി വിസ്മയിപ്പിക്കുന്ന മാമാങ്കത്തിലെ പ്രധാന രംഗങ്ങള് കൊച്ചിയില് കഴിഞ്ഞയാഴ്ച ചിത്രീകരിച്ചു
തെന്നിന്ത്യന് സിനിമയിലെ സൗന്ദര്യ സൗങ്കല്പങ്ങളുടെ അവസാന വാക്കായ മമ്മൂട്ടി പെണ്ണാകുന്നു. നവാഗതനായ സജീവ് പിള്ള സംവിധാനം ചെയ്യുന്ന മാമാങ്കത്തിലാണ് താരം പെണ്വേഷം കെട്ടുന്നത്. കൊച്ചി മരടില് മമ്മൂട്ടി പെണ്വേഷം കെട്ടിയാടുന്ന രംഗങ്ങള് അടുത്തിടെ ചിത്രീകരിച്ചു. ഒരു കോട്ടയ്ക്കുള്ളില് കടക്കുന്നതിനാണ് മമ്മൂട്ടിയുടെ നായക കഥാപാത്രം പെണ്വേഷം കെട്ടുന്നത്. പല സിനിമകളിലും തമാശയ്ക്കായി മമ്മൂട്ടി സ്ത്രീവേഷം കെട്ടിയിട്ടുണ്ടെങ്കിലും ആദ്യമായാണ് ഒരു സീരിയസായ പെണ്കഥാപാത്രമായി താരം അഭിനയിക്കുന്നത്. ഇത് മമ്മൂട്ടിയുടെ അഭിനയ ജീവിതത്തിലെ ഏറെ നിര്ണായകമായ കഥാപാത്രവും സിനിമയും ആയിരിക്കും എന്നാണ് വിലയിരുത്തല്. മംഗലാപുരത്ത് 12 ദിവസത്തെ ചിത്രീകരണം ആദ്യം പൂര്ത്തിയായിരുന്നു. അതിന് ശേഷം കഴിഞ്ഞയാഴ്ചയാണ് കൊച്ചിയില് രണ്ടാം ഷെഡ്യൂള് തുടങ്ങിയത്.
പടവെട്ടി മരിക്കാന് വിധിക്കപ്പെട്ട ചാവേറായാണ് മാമാങ്കത്തില് മമ്മൂട്ടി അഭിനയിക്കുന്നത്. ഏതാണ്ട് ആയിരത്തോളം ജൂനിയര് ആര്ടിസ്റ്റുകള് ഉള്പ്പെടെ സിനിമയിലുണ്ട്. 12 വര്ഷം നീണ്ട ഗവേഷണത്തിന് ശേഷമാണ് സജീവ് പിള്ള മാമാങ്കത്തിന്റെ തിരക്കഥ എഴുതിയത്. വ്യവസായിയായ വേണു കുന്നപ്പള്ളിയാണ് നിര്മാതാവ്. കേരളത്തില് അറിയപ്പെടുന്ന ചരിത്രകാലത്തിനും മുന്പു മുതല് പന്ത്രണ്ടു വര്ഷത്തിലൊരിക്കല് നടന്നിരുന്ന ബൃഹത്തായ നദീതീര ഉത്സവമായിരുന്നു മാമാങ്കം. സാധാരണ ഇത്തരം സിനിമകള് ഹൈദരാബാദിലെ റാമോജി റാവു സ്റ്റുഡിയോയിലാണ് ചിത്രീകരിച്ചിരുന്നത്. എന്നാല് കൊച്ചി മരടില് കൊട്ടാരത്തിന്റെയും മറ്റും സെറ്റിട്ട് ഷൂട്ടിംഗ് നടത്താന് നിര്മാതാവ് തീരുമാനിക്കുകയായിരുന്നു.
ഭാരതപ്പുഴയുടെ തീരത്ത് ഇന്നത്തെ മലപ്പുറം ജില്ലയിലെ തിരൂരിന് ഏഴു കിലോമീറ്റര് തെക്കുമാറിയുള്ള തിരുനാവായ എന്ന സ്ഥലത്തായിരുന്നു മാമാങ്കം അരങ്ങേറിയിരുന്നത്. മാഘമാസത്തിലെ മകം നാളിലെ ഉത്സവമാണ് മാമാങ്കം ആയത്. കേരളത്തിലെ മറ്റു ചില ക്ഷേത്രങ്ങളിലും മാമാങ്കം നടക്കാറുണ്ടെങ്കിലും അവയെല്ലാം സ്ഥലപ്പേരു കൂട്ടിയാണ് അറിയപ്പെടുന്നത്. ഏതാണ്ട് ഒരു മാസക്കാലം (28 ദിവസം) നീണ്ടുനില്ക്കുന്ന ഒരു ആഘോഷമായാണ് അവസാനകാലങ്ങളില് മാമാങ്കം നടത്തിവരുന്നത്. ഇക്കാലമായപ്പോഴേക്കും ഭാരതത്തിലെ മറ്റു പ്രദേശങ്ങളില്നിന്നെല്ലാം നിരവധി ജനങ്ങള് ഇതില് പങ്കെടുക്കാന് എത്തിയിരുന്നു. ഇതിനോടനുബന്ധിച്ച് വ്യാപാരമേളകള്, കായിക പ്രകടനങ്ങള്, കാര്ഷികമേളകള്, സാഹിത്യ, സംഗീത, കരകൗശല വിദ്യകളുടെ പ്രകടനങ്ങള്, എന്നിവയും അരങ്ങേറിയിരുന്നു. സ്വന്തം കഴിവുകളില് മികവു പ്രകടിപ്പിക്കുന്നവര്ക്ക് സമ്മാനങ്ങളും നല്കിയിരുന്നു.
മാമാങ്കത്തിന്റെ രക്ഷാധികാരിയാവുക എന്നത് ആഭിജാത്യം നല്കിയിരുന്ന ഒരു പദവിയായിരുന്നു. അതിനായി വള്ളുവക്കോനാതിരിയും സാമൂതിരിയും തമ്മില് നടന്ന വഴക്കും യുദ്ധങ്ങളും ചരിത്രപ്രസിദ്ധമാണ്. മാമാങ്കത്തിന് കൈവന്ന രാഷ്ട്രീയപ്രാധാന്യത്തെ തുടര്ന്ന് കാലാന്തരേണ മാമാങ്കവേദിയില് ചാവേറുകളായി പോരാടാനെത്തിയിരുന്ന വള്ളുവനാടന് സേനാനികളുടെ പോരാട്ടം മാമാങ്കത്തിലെ പ്രധാന ഇനമായിത്തീര്ന്നു.
ഇതാണ് സിനിമയുടെ കേന്ദ്രഭാഗം.
https://www.facebook.com/Malayalivartha