ദിലീപിനെ നായകനാക്കി നാദിര്‍ഷ സംവിധാനം ചെയ്യുന്ന കേശു ഈ വീടിന്റെ നാഥന്‍ എന്ന സിനിമയില്‍ ഉര്‍വശിയെ നായികയാക്കാനാണ് നേരത്തെ തീരുമാനിച്ചത്. എന്നാല്‍ നടിയെ ആക്രമിച്ച സംഭവത്തില്‍ ദിലീപ് ജയിലിലായതോടെ ഉര്‍വശി വിമര്‍ശനവുമായി രംഗത്തെത്തിയിരുന്നു. തനിക്കൊരു മകളുണ്ടെന്ന കാര്യം ദിലീപ് ഓര്‍മിക്കണമായിരുന്നെന്ന് ഉര്‍വശി പറഞ്ഞിരുന്നത്. അതിനാല്‍ ഉര്‍വശിയെ മാറ്റാന്‍ സാധ്യതയുണ്ടെന്ന് അറിയുന്നു. നാഥനായി വരുന്ന കേശു തീരെ ചെറുപ്പക്കാരനല്ല. ഷഷ്ഠി പൂര്‍ത്തിപോലും ആഘോഷിച്ചുകഴിഞ്ഞ ഒരു വൃദ്ധനാണ്. അതിനാലാണ് ഉര്‍വശിയെ നായികയാക്കാന്‍ തീരുമാനിച്ചിരുന്നത്. പൊന്നമ്മ ബാബുവാണ് സഹോദരിയായി അഭിനയിക്കുന്നത്.

ദിലീപ് കല്യാണരാമന്‍ അടക്കമുള്ള സിനിമകളില്‍ കുറച്ച് സീനുകളില്‍ വൃദ്ധവേഷം ചെയ്തിട്ടുണ്ടെങ്കിലും ഈ സിനിമയില്‍ അങ്ങനെയല്ല. അപ്പിയേറന്‍സിന് ഏറെ പ്രാധാന്യമാണുള്ളത്. ചെറുപ്പക്കാരനായി ദിലീപ് എത്തുന്ന സീനുകള്‍ കുറവാണെന്നാണ് അറിയുന്നത്. തുടര്‍ന്നാണ് ഉര്‍വശിയെ നായികയാക്കാന്‍ തീരുമാനിച്ചത്. ഇവരുടെ ഒത്തുചേരല്‍ ഏറെ പുതുമ നല്‍കുമായിരുന്നു. രണ്ട് പേരും നല്ലപോലെ കോമഡി ചെയ്യുന്നവരാണ്. അരവിന്ദന്റെ അതിഥികള്‍ എന്ന സിനിമയില്‍ ഉര്‍വശി ഗംഭീരപ്രകടനമാണ് നടത്തിയത്. ശരിക്കും പറഞ്ഞാല്‍ ആ സിനിമയുടെ നട്ടെല്ല് ഉര്‍വശിയായിരുന്നു.

ഇതേ തുടര്‍ന്ന് ഉര്‍വശിയെ മാറ്റെണ്ടെന്ന് അണിയറപ്രവര്‍ത്തകരില്‍ ചിലര്‍ പറഞ്ഞെങ്കിലും അത് നടക്കുമോ എന്ന് അറിയില്ല. തമിഴിലും തെലുങ്കിലും അടക്കം ഉര്‍വശി നല്ല തിരക്കിലാണ്. നാദിര്‍ഷ കട്ടപ്പനയിലെ ഋത്വിക് റോഷന്റെ തമിഴ് പതിപ്പായ അജിത്ത് ഫ്രം അറപ്പുകോട്ടൈയുടെ ചിത്രീകരണത്തിന്റെ തിരക്കിലാണ്. അതിന് ശേഷമായിരിക്കും ദിലീപ് ചിത്രത്തിന്റെ പണി തുടങ്ങുക. ഋതിക് റോഷന്റെ തമിഴ് പതിപ്പിന് മുമ്പ് കേശുവിന്റെ ഷൂട്ടിംഗ് പ്ലാന്‍ ചെയ്തതാണ്. എന്നാല്‍ ദിലീപിന്റെ കേസിന്റെ വിചാരണ അടക്കം നടക്കാനുള്ളതിനാല്‍ നിര്‍മാതാക്കള്‍ക്ക് ആശങ്കയുണ്ട്.