കസബയ്ക്ക് ശേഷം മമ്മൂട്ടിയും നിര്മാതാവ് ജോബിജോര്ജ്ജും ഒന്നിച്ച അബ്രഹാമിന്റെ സന്തതികള് മികച്ച കളക്ഷനില് മുന്നേറുന്നു...
ഗ്രേറ്റ്ഫാദറിന് ശേഷം ഒരു മമ്മൂട്ടി ചിത്രം സൂപ്പര്ഹിറ്റിലേക്ക് കുതിക്കുന്നു... കഴിഞ്ഞ ചിത്രമായ അങ്കിള് നല്ല അഭിപ്രായം നേടിയെങ്കിലും മികച്ച കളക്ഷന് സ്കോര് ചെയ്തിരുന്നില്ല. റമസാനോട് അനുബന്ധിച്ച് റിലീസായ അബ്രഹാമിന്റെ സന്തതികള് അടുത്തകാലത്തിറങ്ങിയ ഏറ്റവും വലിയ പണംവാരി പടമാകാന് പോവുകയാണെന്ന് ബോക്സ്ഓഫീസ് റിപ്പോര്ട്ടുകള് വ്യക്തമാക്കി. പതിനൊന്നരക്കോടി മുടക്കി നിര്മിച്ച ചിത്രം ആദ്യ മൂന്ന് ദിവസം എട്ടരക്കോടി കളക്ട് ചെയ്തു. ഗ്രോസ്കളക്ഷനാണിത്.
ആദ്യ ആഴ്ച പിന്നിടുമ്പോഴേക്കും നിര്മാതാവിന്റെ പോക്കറ്റില് ലാഭം വീഴുമെന്ന് ഉറപ്പായി. കേരളത്തിലെ എല്ലാ സെന്ററുകളില് നിന്നും മികച്ച പ്രതികരണമാണ് ലഭിക്കുന്നതെന്ന് അണിയറപ്രവര്ത്തകര് വ്യക്തമാക്കി. ഇതോടെ സിനിമയുടെ വിജയാഘോഷത്തിന്റെ ഭാഗമായി മമ്മൂട്ടിയും സംവിധായകന് ഷാജി പാടൂരും നിര്മാതാവ് ജോബി ജോര്ജും നടന് സിദ്ധിഖും ചേര്ന്ന് കേക്ക് മുറിച്ചു. ചിത്രത്തിന്റെ പോസ്റ്ററിന്റെ രീതിയിലാണ് കേക്ക് ഡിസൈന് ചെയ്തത്.
2016ലെ റമസാനോട് അനുബന്ധിച്ച് റിലീസായ കസബയും മികച്ച ഇനീഷ്യല് കളക്ഷന് നേടിയിരുന്നു. ആ ചിത്രത്തിന്റെ നിര്മാതാവായ ജോബി ജോര്ജ്ജും മമ്മൂട്ടിയും വീണ്ടും ഒന്നിച്ച സിനിമയാണ് അബ്രഹാമിന്റെ സന്തതികള്. ഗ്രേറ്റ്ഫാദറിന്റെ സംവിധായകന് ഹനീഫ് അദേനി തിരക്കഥയെഴുതി എന്ന പ്രത്യേകതയുമുണ്ട്. നോണ് ലീനിയര് എഡിറ്റിംഗ് നടത്തിയ ചിത്രം മികച്ച ത്രില്ലറാണ്. അതില് ക്രൈമും അന്വേഷണവും കബളിപ്പിക്കലും എല്ലാം കടന്ന് വരുന്നു. സാധാരണ ത്രില്ലര് സിനിമകളില് നിന്ന് വ്യത്യസ്തമായി ഇതൊരു നിയോനോര് (നല്ലതും ചീത്തയും) ഗണത്തില് പെടുത്താവുന്ന സിനിമയാണ്. ഇതിലെ നായകനായ ഡെറിക് എബ്രഹാം എന്ന ഐ.പി.എസ് ഉദ്യോഗസ്ഥന് ചെയ്യുന്ന പല കാര്യങ്ങളും നിയമവിരുദ്ധമാണ്, എന്നാല് ധാര്മികവും. നിയമത്തിന്റെ കണ്ണിലൂടെ കാണുമ്പോള് കുറ്റവും ധാര്മികതയുടെ കുഴലിലൂടെ നോക്കുമ്പോള് ന്യായവും ആകുന്ന കാര്യങ്ങള്. വിജയ്സേതുപതിയും മാധവനും അഭിനയിച്ച വിക്രംവേദയും ഇതേ പ്രമേയമാണ് പറഞ്ഞത്.
20 വര്ഷമായി ജോഷി ഉള്പ്പെടെയുള്ള പ്രമുഖസംവിധായകരുടെ അസോസിയേറ്റായി പ്രവര്ത്തിച്ച ഷാജി പാടൂരിന്റെ ആദ്യസിനിമയാണ് അബ്രഹാമിന്റെ സന്തതികള്. ഷാജിക്ക് സിനിമയോടുള്ള പാഷനും ജോലി ചെയ്യുന്നതിലുളള ആത്മാര്ത്ഥതയും കണ്ട് പത്ത് വര്ഷം മുമ്പ് മമ്മൂട്ടി ഓപ്പണ്ഡേറ്റ് കൊടുത്തതാണ്. എന്നാല് ഇഷ്ടപ്പെട്ട കഥ കിട്ടാത്തതിനാല് ഷാജി കാത്തിരിക്കുകയായിരുന്നു. കഥ അവതരിപ്പിക്കുന്നതില് തഴക്കവും പഴക്കവും പുതുമയും ഷാജി കാട്ടിത്തരുന്നു. രണ്ടാഴ്ച പിന്നിടുമ്പോള് ചിത്രം വിദേശങ്ങളില് പ്രദര്ശനത്തിനെത്തും. സാധാരണ മമ്മൂട്ടി ചിത്രങ്ങള്ക്ക് 50 ലക്ഷമാണ് ഓവര്സീസ് കിട്ടുന്നത്. ഈ ചിത്രം ഷുവര്ഹിറ്റായതിനാല് അത് ചിലപ്പോള് 60 ലക്ഷംവരെയാകും. സൂര്യാടി.വിയാണ് സാറ്റലൈറ്റ് അവകാശം വാങ്ങിയത്. അതിലൂടെ ഏതാണ്ട് അഞ്ച് കോടിയോളം ലഭിച്ചിരിക്കും.
https://www.facebook.com/Malayalivartha