പ്രമുഖ നടിയെ ആക്രമിക്കപ്പെട്ടതുമായി ബന്ധപ്പെട്ട് മകനെതിരെ ഉയരുന്ന ആരോപണങ്ങള്‍ തെറ്റാണെന്ന് ചലച്ചിത്ര താരം കെപിഎസി ലളിത. തന്റെ കുടുംബത്തെ അപകീര്‍ത്തിപ്പെടുത്താനുള്ള ശ്രമത്തിന്റെ ഭാഗമാണ് ഇതെന്നും കെപിഎസി ലളിത പ്രതികരിച്ചു.

ലളിതയുടെ മകനും നടനുമായ സിദ്ധാര്‍ത്ഥ് ഭരതന്റെ കാക്കനാട്ടെ ഫ്‌ളാറ്റില്‍ കൊച്ചി പൊലീസ് ഇന്നലെ റെയ്ഡ് നടത്തിയെന്നും നടിയെ തട്ടിക്കൊണ്ടു പോയ കേസിലെ ഒരു പ്രതിയെ ഇവിടെനിന്ന് പിടികൂടിയതായും റിപ്പോര്‍ട്ട് വന്നെങ്കിലും സ്ഥിരീകരണമില്ല. സിദ്ധാര്‍ത്ഥ് ആരോപണം നിഷേധിച്ചതിനു പിന്നാലെയാണ് മകനെ പ്രതിരോധിച്ച് കെ.പി.എ.സി ലളിതയും രംഗത്തെത്തിയിരിക്കുന്നത്.

തന്റെ മകന്‍ ഇത്തരമൊരു തെറ്റു ചെയ്തിട്ടുണ്ടെങ്കില്‍ അവനെ ചാട്ടവാറിനടിച്ച് ജനങ്ങളുടെ മുന്നില്‍വച്ച് തല്ലിക്കൊല്ലണമെന്ന് മാത്രമേ താന്‍ പറയൂ എന്നും കെപിഎസി ലളിത വ്യക്തമാക്കി. നടിക്കെതിരായ ആക്രമണത്തില്‍ പ്രതിഷേധിച്ച് കൊച്ചിയില്‍ ചേര്‍ന്ന യോഗത്തില്‍ സംസാരിക്കുകയായിരുന്നു അവര്‍.

സംഭവം നടന്ന് അഞ്ചു ദിവസം പിന്നിട്ടിട്ടും പ്രതികളെ പിടികൂടാതെ വീട്ടില്‍ അടങ്ങിയൊതുങ്ങി കഴിയുന്ന മക്കളെ എന്തിനു പഴിപറയുന്നുവെന്നും കെസിഎസി ലളിത ചോദിച്ചു. പ്രതിയെ എത്രയും വേഗം പിടികൂടി തക്കശിക്ഷ ഉറപ്പുവരുത്തണം. ഗോവിന്ദച്ചാമിയെപ്പോലെ, പ്രതിയെ തീറ്റിപ്പോറ്റി പുറത്തുവിടരുതെന്നും അവര്‍ ആവശ്യപ്പെട്ടു. ആവശ്യമെങ്കില്‍ തൂക്കിക്കൊല്ലുക തന്നെ വേണം. അതല്ലെങ്കില്‍ പ്രതിയെ പൊതുജനങ്ങള്‍ക്ക് ഇടയിലേക്ക് ഇറക്കിവിടുക. അവര്‍ വേണ്ടതു ചെയ്തുകൊള്ളുമെന്നും കെപിഎസി ലളിത പറഞ്ഞു.

നടിയെ തട്ടിക്കൊണ്ടുപോയി ആക്രമിച്ച കേസിലേക്കു തന്റെ പേരും വലിച്ചിഴച്ചത്തില്‍ ഏറെ വേദനയുണ്ടെന്ന് സംവിധായകനും നടനുമായ സിദ്ധാര്‍ഥ് ഭരതന്‍ ഓണ്‍ലൈനിനോട് വ്യക്തമാക്കിയിരുന്നു. തനിക്കെതിരെ വന്ന വാര്‍ത്ത വസ്തുതാവിരുദ്ധമാണെന്നും അതു തന്നെ ഏറെ വേദനിപ്പിച്ചുവെന്നും അദ്ദേഹം പറഞ്ഞു. യാതൊരു വിധത്തിലും വാസ്തവമല്ലാത്ത വാര്‍ത്ത വന്നതിന്റെ ആഘാതം മാറിയിട്ടില്ല. മനസ്സൊന്ന് ശാന്തമായതിനുശേഷം വിശദമായി തന്നെ ഇതിനെതിരെ പ്രതികരിക്കുമെന്നും സിദ്ധാര്‍ഥ് വ്യക്തമാക്കിയിരുന്നു.