ഒരു വര്‍ഷത്തെ കാത്തിരിപ്പിനൊടുവില്‍ എസ്.എസ്. രാജമൗലിയുടെ ബാഹുബലി രണ്ടാം ഭാഗം തിയറ്ററുകളിലെത്തി. ഇന്ത്യയൊട്ടാകെ വമ്പന്‍ റിലീസാണ് ഒരുക്കിയിരുന്നത്. കേരളത്തിലും വന്‍വരവേല്‍പ്പാണു ചിത്രത്തിന്റെ ടിക്കറ്റ് ബുക്കിങ്ങിനടക്കം ലഭിച്ചത്. ഇന്ത്യയില്‍ മാത്രം 6,500 റിലീസിങ് സെന്ററുകളാണ് സിനിമയ്ക്കുള്ളത്. ഫോര്‍ കെ ഫോര്‍മാറ്റില്‍ റിലീസ് ചെയ്യുന്ന ആദ്യ തെലുങ്ക് ചിത്രം കൂടിയാണ് ബാഹുബലി.

ബാഹുബലി രണ്ടാം ഭാഗം ആദ്യം കണ്ടതു ഗള്‍ഫിലെ പ്രേക്ഷകരാണ്. ഇന്നലെ വൈകിട്ടായിരുന്നു ഗള്‍ഫിലെ റീലീസ്. എല്ലാ തിയറ്ററുകളിലും നിറഞ്ഞ സദസിലാണു പ്രദര്‍ശനം. അമരേന്ദ്ര ബാഹുബലിയുടെയും ദേവസേനയുടെയും കഥയാണു ബാഹുബലിയുടെ രണ്ടാം ഭാഗം. ഒന്നാം ഭാഗം നിര്‍ത്തിയടത്തു നിന്നാണു കഥ തുടരുന്നത്.

പ്രേക്ഷകരുടെ ആദ്യ പ്രതികരണങ്ങള്‍

ബാഹുബലി 2 കിടിലോല്‍ക്കിടിലമാണെന്ന് പ്രേക്ഷകരുടെ ആദ്യ പ്രതികരണങ്ങള്‍. രണ്ടാംഭാഗം തന്നെയാണ് യഥാർത്ഥ ബാഹുബലി എന്നും ആദ്യഭാഗം ഇതിനു മുന്നില്‍ ഒന്നുമല്ലെന്നും രണ്ടാംഭാഗം കിടിലോല്‍ക്കിടില്ലനാണെന്നും പ്രേക്ഷകര്‍ പ്രതികരിക്കുന്നു. യുഎഇ സമയമായ വൈകിട്ട് നാലിനായിരുന്നു യുഎഇയിലെ തിയേറ്ററുകളില്‍ ബാഹുബലിയുടെ ആദ്യ പ്രദര്‍ശനം നടന്നത്.

ചിത്രം കണ്ടിറങ്ങുന്ന ഒരോ പ്രേക്ഷകരോടും പുറത്ത് കാത്തിരുന്ന മറ്റ് ആരാധകര്‍ക്ക് ചോദിക്കാനുണ്ടായിരുന്ന ചോദ്യത്തോട് അത് കൊന്നാലും പറയില്ലെന്നാണ് പ്രേക്ഷകരും പറയുന്നത്. അത് കണ്ട് തന്നെ അറിയേണ്ട വിവരമാണെന്നും അവര്‍ മറുപടി കൊടുത്തു. ചിത്രം അത്യുഗ്രമാണെന്ന് തന്നെയാണ് സാമൂഹ്യ മാധ്യമങ്ങളിലും പ്രചരിക്കുന്നത്.