അമ്മയുടെ നിയന്ത്രണം മോഹന്ലാല് തള്ളി രണ്ടും കല്പിച്ച് ലാലേട്ടന്
ദിലീപ് ജയിലിലായപ്പോള് ദൃശ്യമാധ്യമങ്ങള് സിനിമയോട് കാണിച്ച പ്രതികാര നടപടിയോടുള്ള പ്രതിഷേധ സൂചകമായി ദൃശ്യമാധ്യമങ്ങളെ തള്ളണമെന്ന അമ്മയുടെ ആഹ്വാനം മോഹന്ലാല് തള്ളി. വെള്ളിയാഴ്ച അമൃത ടി.വി. ആരംഭിച്ച ലാല്സലാം എന്ന പരമ്പരയിലൂടെയാണ് മോഹന്ലാല് അമ്മയുടെ കല്പന തൃണവല്ക്കരിച്ചത്.
ദിലീപിനോട് ഐക്യദാര്ഢ്യം പ്രഖ്യാപിക്കുന്നവരാണ് ഇത്തരമൊരു തീരുമാനമെടുത്തത്. സിനിമാക്കാരെ മാധ്യമങ്ങള്ക്കു വേണ്ടെങ്കില് മാധ്യമങ്ങളെ തങ്ങള്ക്കും വേണ്ടെന്നാണ് സിനിമാക്കാര് പറഞ്ഞത്. ഇതിനു ശേഷം താരങ്ങളാരും തന്നെ ദ്യശ്യ മാധ്യമങ്ങളില് പ്രത്യക്ഷപ്പെട്ടിരുന്നില്ല. സാധാരണ മാധ്യമങ്ങളുടെ ഓണക്കാലം കഴിഞ്ഞു പോകുന്നതു തന്നെ സിനിമാക്കാരുടെ സഹകരണത്തോടെയാണ്. സിനിമാക്കാര് ഇല്ലെങ്കില് ചാനലുകാരുടെ കഥ കഴിഞ്ഞു എന്നു പറഞ്ഞാല് മതി.
സിനിമാക്കാര് ചാനലുകാര്ക്ക് നേടി തരുന്ന വരുമാനം ചില്ലറയൊന്നുമല്ല. ഇത് ഒരു പരസ്പര സഹകരണ സംഘമാണ്. ചാനലുകാരില്ലെങ്കില് സിനിമാക്കാരില്ല, സിനിമാക്കാരില്ലെങ്കില് ചാനലുകാരില്ല എന്ന അവസ്ഥയാണ് നിലവിലുള്ളത്. എന്നാലിപ്പോള് ഒരുമെയ്യായി ജീവിച്ചവര് ഇരുമെയ്യാവാന് പഠിച്ചു കഴിഞ്ഞു. ചാനലുകാര്ക്കും സിനിമാക്കാര്ക്കും ഇപ്പോള് രണ്ടു വഴിയാണുള്ളത്.
സിനിമാക്കാരെ സംബന്ധിച്ചടത്തോളം ചാനല് ഇല്ലെങ്കില് പിടിച്ചു നില്ക്കാനാവില്ല. അതിനാല് ഒരു മാതിരിപ്പെട്ട എല്ലാ വിഷയങ്ങളും ഇവര് പറഞ്ഞു തീര്ക്കാറാണ് പതിവ്. പക്ഷേ ഇപ്പോഴത്തെ വിഷയം കൈവിട്ട് പോയി. ഇല്ലെങ്കില് എന്നേ വിഷയം തീര്ക്കുമായിരുന്നു.
മോഹന്ലാല് ഓണത്തിനു മാത്രമല്ല അമൃതയിലെത്തുന്നത്. ഓണം കഴിഞ്ഞും അദ്ദേഹം അമൃതയില് തുടരും. മോഹന്ലാലിനെ നിയന്ത്രിക്കാന് ആര്ക്കാണ് അധികാരം. അമ്മയിലാര്ക്കെങ്കിലും മോഹന്ലാലിനെ വിലക്കാന് കഴിയുമോ?
ദിലീപ് വിഷയത്തില് മോഹന്ലാല് കാണിച്ചിട്ടുള്ള നിലപാടില് നിന്നും അദ്ദേഹം വിഷയത്തില് സ്വീകരിക്കുന്ന മാനദണ്ഡങ്ങള് വ്യക്തമാണ്. മോഹന്ലാല് ഒരുകാലത്തും ദിലീപിന്റെ സുഹൃത്തോ അഭ്യുദയകാംക്ഷിയോ ആയിരുന്നില്ല. ലാല് ചിത്രങ്ങളുടെ റിലീസ് തടയാന് ദിലീപ് ശ്രമിച്ചതായി ആരോപണവും ഉയര്ന്നിട്ടുണ്ട്. ദിലീപിന്റെ നീക്കങ്ങളെ ലാല് സംശയത്തോടെയാണ് കണ്ടിട്ടുള്ളത്. കേസില് ദിലീപ് പ്രതിയായതോടെ ആന്റണി പെരുമ്പാവൂരിനെ ഇറക്കി മോഹന്ലാല് സംഘടന പിടിച്ചെടുത്തിരുന്നു.
മോഹന്ലാല് ചാനലില് വന്നതോടെ മറ്റ് താരങ്ങളും ചാനലിലെത്തുമെന്ന് ഉറപ്പായി കഴിഞ്ഞു. അങ്ങനെ അമ്മയുടെ ഉറപ്പ് കുറുപ്പിന്റെ ഉറപ്പ് പോലെയാകും.
https://www.facebook.com/Malayalivartha