നടിയെ തട്ടിക്കൊണ്ടു പോയ കേസില്‍ ജാമ്യം കിട്ടാതെ ദിലീപ് അലയുമ്പോള്‍ രാമലീല ഉടന്‍ റിലീസാവുകയാണ്. ആദ്യം ജൂലൈ ഏഴിന് നിശ്ചയിച്ചിരുന്ന റിലീസ് സെപ്റ്റംബര്‍ അവസാനത്തിലേക്ക് മാറ്റുകയായിരുന്നു. സെപ്റ്റംബര്‍ 28നാണ് ചിത്രം റിലീസാവുക. പുലിമുരുകന് ശേഷം ടോമിച്ചന്‍ മുളകുപാടം നിര്‍മ്മിക്കുന്ന ചിത്രമാണ് രാമലീല. അതിനാല്‍ തന്നെ വലിയ പ്രതീക്ഷയാണുള്ളത്. 

നടിയെ ആക്രമിച്ച കേസില്‍ ദിലീപിനെതിരായ ജനവികാരം ചിത്രത്തിന് തീയറ്ററില്‍ തിരിച്ചടിയാകുമോ എന്ന് അണിയറ പ്രവര്‍ത്തകര്‍ക്ക് ആശങ്കയുണ്ട്. ഈ സാഹചര്യത്തില്‍ ചിത്രത്തിന് പരമാവധി പ്രചാരണമാണ് അണിയറ പ്രവര്‍ത്തകര്‍ നല്‍കുന്നത്. ഇതിനകം നിരവധി പോസ്റ്ററുകളും പ്രമോഷന്‍ വീഡിയോകളും ചിത്രത്തിന്റേതായി പുറത്ത് വന്നു കഴിഞ്ഞു. ദിലീപ് എന്ന താരം ഇപ്പോള്‍ നേരിടുന്ന പ്രതിസന്ധികള്‍ ഓര്‍മ്മപ്പെടുത്തുന്നതാണ് ചിത്രത്തിന്റെ ടീസറുകളും പോസ്റ്ററുകളും. നടിയെ ആക്രമിച്ച കേസ് ഓര്‍മ്മിപ്പിച്ചുകൊണ്ട് പ്രതി ഞാനാവണമെന്ന് തീരുമാനമുള്ളത് പോലെ എന്ന ഡയലോഗ് ഉള്ള ടീസര്‍ വീഡിയോയാണ് ആദ്യം പുറത്ത് വന്നത്. 

ഏറ്റവും ഒടുവില്‍ പുറത്ത് വന്ന പോസ്റ്ററും ഇത്തരത്തില്‍ ശ്രദ്ധേയമാകുകയാണ്. നായകന്‍ ദിലീപ് ബലികര്‍മ്മം ചെയ്യുന്നതിന്റെ ചിത്രമാണ് ഏറ്റവും ഒടുവില്‍ പുറത്ത് വന്ന പോസ്റ്ററിലുള്ളത്. രണ്ടാഴ്ച മുന്‍പ് ദിലീപ് അച്ഛന് ശ്രാദ്ധമിടാന്‍ വീട്ടില്‍ എത്തിയിരുന്നു. ദിലീപ് ഇപ്പോള്‍ നേരിടുന്ന പ്രതിസന്ധികള്‍ മുന്‍കൂട്ടി പ്രവചിച്ചത് പോലെയാണ് ചിത്രത്തിന്റെ ഓരോ ടീസറും പോസ്റ്ററുകളും പുറത്തിറക്കിയിരിക്കുന്നത്. 

ലയണ്‍ എന്ന ചിത്രത്തിന് ശേഷം ദിലീപ് രാഷ്ട്രീയ പശ്ചാത്തലമുള്ള സിനിമയില്‍ നായകനാകുന്നത് രാമലീലയിലാണ്. ഏതായാലും ചിത്രത്തിന് ദിലീപിന്റെ ജീവിതവുമായുള്ള അപുര്‍വ സാദൃശ്യം ചിത്രത്തിന്റെ പ്രചരണത്തിന് വേണ്ടി അണിയറ പ്രവര്‍ത്തകര്‍ സൃഷ്ടിച്ചതാണോ എന്ന് മാത്രമേ ഇനി അറിയാനുള്ളൂ. എന്തായാലും ദിലീപിന്റെ കണ്ണീര് വിറ്റ് കാശാക്കാനുള്ള ശ്രമത്തിലാണ് അണിയറക്കാര്‍.