കുറച്ചു നാളുകൾക്ക് മുമ്പ് തമിഴ് നടന്‍ ആര്യ വിവാഹം കഴിക്കാന്‍ പോവുകയാണെന്നും ഇതിനായി വിവാഹാലോചനകൾ ക്ഷണിച്ചുകൊണ്ട് ഫേസ്ബുക്കിൽ വീഡിയോ പോസ്റ്റ് ചെയ്തത് ആരാധകരെ ശരിക്കും ഞെട്ടിച്ചിരുന്നു. പൊതുവെ സിനിമാക്കാരെല്ലാം വിവാഹക്കാര്യം ഉറപ്പിച്ചതിന് ശേഷമാണ് വിവരങ്ങൾ പുറത്തുവിടുക.

എന്നാൽ ആര്യ ഇതിൽ നിന്നൊക്കെ വ്യത്യസ്തനാണ് . ജീവിത സഖിക്കായി ഇപ്പോഴും കാത്തിരിക്കുകയാണ് ആര്യ. തനിക്ക് ചേരുന്ന വധുവിനെ കണ്ടെത്താൻ സ്വയം ഇറങ്ങിത്തിരിച്ചിരിക്കുകയാണ് അദ്ദേഹം. ഇതിനായി താരം 16 സുന്ദരിമാരെ കണ്ടെത്തിക്കഴിഞ്ഞു.

ഒരു റിയാലിറ്റി ഷോയിലൂടെയാണ് ആര്യ തന്റെ ജീവിത പങ്കാളിയെ കണ്ടെത്താൻ പോകുന്നത്. കളേഴ്സ് ടിവിയിലൂടെയാണ് താരത്തിന്റെ വിവാഹം നടക്കുന്നത്. ഒരു ലക്ഷത്തിലധികം കോളുകളും 7000 അപേക്ഷകളുമാണ് ആര്യക്ക് ഇതിനോടകം തന്നെ വന്നത്.എങ്കെ വീട്ടുമാപ്പിളെ എന്ന് പേരുള്ള റിയാലിറ്റി ഷോയിലൂടെയാണ് ഇതില്‍ നിന്ന് പതിനാറ് പേരെ തിരഞ്ഞെടുത്തത്.

അതില്‍ വിജയിക്കുന്ന പെണ്‍കുട്ടിയാണ് ആര്യയുടെ ജീവിത പങ്കാളിയാവുക. വീട്ടുകാരുടെയോ സമൂഹത്തിന്റെയോ സമ്മര്‍ദ്ദത്തിന് വഴങ്ങി വിവാഹം കഴിച്ച് ഡൈവേഴ്‌സാകാന്‍ തനിക്ക് താത്പര്യമില്ല. തന്റേത് നൂറ് ശതമാനം പ്രണയവിവാഹമായിരിക്കുമെന്ന് വിവാഹ വാർത്ത പ്രചരിച്ചിരുന്ന സമയത്ത് ആര്യ പ്രതികരിച്ചിരുന്നു.