മറ്റാര്ക്കും മറുപടി നല്കേണ്ട ആവശ്യം എനിക്കില്ല...പ്രിയാ മണി
കഴിഞ്ഞ ഓഗസ്റ്റിലാണ് തെന്നിന്ത്യന് പ്രേക്ഷകരുടെ പ്രിയതാരം പ്രിയാ മണി വിവാഹിതയായത്. ബിസിനസ്സുകാരനായ മുസ്തഫ രാജാണ് പ്രിയയുടെ കഴുത്തില് മിന്നു കെട്ടിയത്. ദീര്ഘ നാളത്തെ പ്രണയത്തിനൊടുവിലാണ് ഇരുവരും വിവാഹിതരായത്. എന്നാല് വ്യത്യസ്ത മതത്തില്പ്പെട്ടവരായതിനാല് വിവാഹത്തിന്റെ പേരില് നിരവധി വിമര്ശനങ്ങളും ട്രോളുകളും പ്രിയയ്ക്ക് നേരിടേണ്ടി വന്നിട്ടുണ്ട്.
എന്നാല്, ഈ വിമര്ശനങ്ങളും ട്രോളുകളുമെല്ലാം താന് ഒരു ചെവിയില് കൂടി കേട്ട് മറ്റേ ചെവിയില് കൂടി പുറത്തു കളയുകയാണ് പതിവെന്ന് പ്രിയാമണി പറയുന്നു. ഇത്തരം പ്രവണതകള് തെന്നിന്ത്യന് താരങ്ങളോട് മാത്രമേയുള്ളൂ. താന് ഒരിക്കലും മതപരിവര്ത്തനം നടത്തുകയില്ലെന്നും പ്രിയ വ്യക്തമാക്കുകയുണ്ടായി. 2017 ഓഗസ്റ് 23നായിരുന്നു പ്രിയ മണിയും ഇവന്റ് മാനേജ്മന്റ് ബിസ്സിനസ്സ് നടത്തുന്ന മുസ്തഫ രാജും ബംഗളൂരുവിലെ രജിസ്റ്റര് ഓഫീസില് വച്ച് വിവാഹിതരായത്.
പത്രക്കുറിപ്പിലൂടെ തന്റെ വിവാഹക്കാര്യം അറിയിച്ച പ്രിയ തങ്ങള് രണ്ടു മതത്തില് പെട്ടവരായതിനാല് രണ്ടു മതവിശ്വാസങ്ങളെയും വ്രണപ്പെടുത്താന് ആഗ്രഹമില്ലാത്തത് കൊണ്ടാണ് രജിസ്റ്റര് ഓഫീസില് വച്ച് വിവാഹിതരാകാന് തീരുമാനിച്ചതെന്നും വ്യക്തമാക്കിയിരുന്നു. രജിസ്റ്റര് വിവാഹത്തിന് ശേഷം സഹപ്രവര്ത്തകര്ക്കായി ബംഗളൂരുവില് വിവാഹ സല്ക്കാരവും നടന്നു.പുതിയ കന്നഡ ചിത്രം ധ്വജയുമായി ബന്ധപ്പെട്ട് ഒരു മാധ്യമത്തിന് നല്കിയ അഭിമുഖത്തിലായിരുന്നു പ്രിയയുടെ വെളിപ്പെടുത്തലുകള്.
പ്രിയാമണി പറയുന്നതിങ്ങനെ...
'ഞാന് ഈ ട്രോളുകളും വിമര്ശനങ്ങളുമെല്ലാം ഒരു ചെവിയില് കൂടി കേട്ട് മറ്റേ ചെവിയില് കൂടി പുറത്തു കളയും. ആളുകള് നമ്മുടെ സ്വകാര്യതയിലേക്ക് കടന്നു കയറി ആക്രമിക്കുന്നത് ശരിയായ കാര്യമല്ല. ഒരു താരത്തിന്റെ ആഘോഷങ്ങളില്, സന്തോഷങ്ങളില് നിങ്ങള്ക്ക് ഭാഗമാകേണ്ട എങ്കില് അവരെ വിമര്ശിക്കാനുള്ള അധികാരവും നിങ്ങള്ക്കില്ല.
എന്തുകൊണ്ടാണ് തെന്നിന്ത്യന് താരങ്ങളെ മാത്രം ട്രോളുന്നത് എന്തുകൊണ്ട് ബോളിവുഡ് താരങ്ങളെ ഇപ്രകാരം ട്രോളുന്നില്ല.? ബോളിവുഡിലും ഇത്തരത്തില് വ്യത്യസ്ത മതവിഭാഗത്തില്പ്പെട്ട ആളുകള് വിവാഹം ചെയ്യുന്നുണ്ട്. അവരെയെല്ലാം ഇരു കയ്യും നീട്ടി സ്വീകരിക്കുന്നുമുണ്ട്. ഇവിടെ തെന്നിന്ത്യയില് മാത്രമേ ഇത്തരം ഒരു പ്രവണതയുള്ളൂ.
എനിക്കെന്റെ മാതാപിതാക്കളോടും മുസ്തഫയോടും അദ്ദേഹത്തിന്റെ മാതാപിതാക്കളോടും മാത്രമേ മറുപടി പറയേണ്ടതുള്ളൂ. മറ്റാര്ക്കും മറുപടി നല്കേണ്ട ആവശ്യം എനിക്കില്ല. എനിക്കിഷ്ടമുള്ളത് ഞാന് എനിക്ക് തോന്നുമ്പോള് ചെയ്യും.
ഞാന് ഹിന്ദുവായാണ് വളര്ന്നത്. മുസ്തഫ മുസ്ലിം ആയും. ഞാന് ഇസ്ലാമിലേക്ക് മതപരിവര്ത്തനം ചെയ്യുമെന്നാണ് ആളുകള് കരുതുന്നത്. പക്ഷെ അതിന്റെ ആവശ്യമില്ല. അതിനാണ് സ്പെഷ്യല് മാര്യേജ് ആക്ട് ഉള്ളത്. ഞങ്ങള് രണ്ടു പേരും മറ്റേയാളുടെ ആചാരങ്ങളെ ബഹുമാനിക്കുന്നു. പക്ഷേ ഞാനെന്റെ മതം മാറാന് പോകുന്നില്ല. ഇത് ഞാന് മുസ്തഫയുമായും അദ്ദേഹത്തിന്റെ മാതാപിതാക്കളുമായും പണ്ടേ സംസാരിച്ചിട്ടുള്ളതാണ്. അവര്ക്ക് അതിന് പണ്ടേ സമ്മതവുമായിരുന്നു. ' പ്രിയാ മണി പറഞ്ഞു.
https://www.facebook.com/Malayalivartha