തമിഴ് സൂപ്പര്‍ ഹിറ്റ് ചിത്രം 'മാരി' യുടെ രണ്ടാം ഭാഗം 'മാരി 2'വിന്‍റെ ചിത്രീകരണത്തിനിടെ നടൻ ധനുഷിന് പരിക്കേറ്റു. നായകൻ ധനുഷും വില്ലൻ ടൊവിനോ തോമസും തമ്മിലുള്ള ക്ലൈമാസ് സംഘട്ടന രംഗങ്ങൾ ചിത്രീകരിക്കുന്നതിനിടെയായിരുന്നു താരത്തിന് അപ്രതീക്ഷിതമായി പരിക്കേറ്റത്.

പെട്ടെന്ന് തിരിയുന്നതിനിടെ ധനുഷിന്‍റെ വലത് കാലിന്‍റെ മുട്ടിനും ഇടത് കൈക്കും പരിക്കേല്‍ക്കുകയായിരുന്നു. എന്നാൽ പരിക്കിനെ തുടർന്ന് കഠിനവേദന ഉണ്ടായിരുന്നെങ്കിലും ധനുഷ് സംഘട്ടന രംഗത്തിന്‍റെ ചിത്രീകരണം പൂർത്തിയാക്കി.

അതേസമയം തന്‍റേത് ഗുരുതര പരിക്കല്ലെന്നും സുഖമായിരിക്കുന്നുവെന്നും ധനുഷ് ട്വീറ്റിലൂടെ ആരാധകരെ അറിയിച്ചു. തനിക്ക് വേണ്ടി പ്രാർഥിക്കുകയും വളരെ അധികം സ്‌നേഹം കാണിക്കുകയും ചെയ്ത ആരാധകര്‍ക്ക് താരം നന്ദി പറഞ്ഞു. നിങ്ങളാണ് എന്‍റെ ശക്തിയെന്നും ധനുഷ് കൂട്ടിച്ചേർത്തു.

ധനുഷും സംവിധായകന്‍ ബാലാജി മോഹനും ഒന്നിക്കുന്ന രണ്ടാമത്തെ ചിത്രമായ മാരി 2ൽ സായി പല്ലവിയാണ് നായിക. വരലക്ഷ്മി ശരത് കുമാര്‍, ക്രെഷ്ന, റോബോ ശങ്കര്‍ എന്നിവരും പ്രധാന വേഷങ്ങളിലുണ്ട്. സംഗീതം: യുവന്‍ ശങ്കര്‍ രാജ.