പാഠം 1 ഒരു വിലാപം; പ്രസ്ക്ലബ് വിവാദത്തെപ്പറ്റി പ്രസ് ക്ലബിന് വേണ്ടി എസ്. ചന്ദ്രമോഹന് തുറന്നെഴുതുന്നു
പ്രസ്ക്ലബിലെ ബാര് വിവാദത്തില് ഇങ്ങനെ തലയിടണമെന്ന് കരുതിയതല്ല. എന്നാല് മാധ്യമ ഗുണ്ട, കൂലിയെഴുത്ത്, മദ്യക്കച്ചവടം, അനധികൃത ബാര് തുടങ്ങിയ പ്രയോഗങ്ങള് സഹിച്ചു മടുത്തു. പരിചയക്കാര് പലരും ചോദിച്ചു തുടങ്ങി. 'നിങ്ങളുടെ പ്രസ് ക്ലബില് ഇതൊക്കെയാണോ പരിപാടി?' എന്ന്. അടുത്ത സുഹൃത്തുക്കളുടെ സ്നേഹത്തിന്റെ മേമ്പൊടിയുള്ള 'കോനയടി' വേറെ. മാനം പോയെന്ന് പറഞ്ഞാല് മതിയല്ലോ.
അതുകൊണ്ടാണ് ചില കാര്യങ്ങള് വിശദീകരിക്കുന്നത്. ആദ്യമേ പറയാം. സുനിതാദേവദാസിനോട് എനിക്ക് വിരോധമില്ല. പ്രസ്ക്ലബ് വാര്ത്തകള് അതീവ പ്രാധാന്യത്തോടെ പ്രസിദ്ധീകരിക്കുന്ന മറുനാടന് മലയാളി എഡിറ്റര് ഷാജന് സ്കറിയയോടും വിരോധമില്ല. ഈ വിഷയത്തില് ഞാനും ഷാജനും പല തവണ തെറ്റിയിട്ടുണ്ട്. കഴിഞ്ഞ ദിവസം നടന്ന ജനറല് ബോഡിയില് ഷാജനും മറ്റുമെതിരേ നിയമനടപടി വേണമെന്ന് ശക്തമായി വാദിച്ചതും ഞാനാണ്. എന്നാല് വിരോധമില്ല. എല്ലാവര്ക്കും വിമര്ശിക്കുവാന് അവകാശമുണ്ട്. പക്ഷേ അത് അധിക്ഷേപമായും, അപമാനിക്കലായും മാറുമ്പോഴാണ് പ്രതികരിക്കുന്നത്.
1. എന്താണ് പ്രസ് ക്ലബ് ബാര്?
പ്രസ്ക്ലബിന്റെ സ്ഥാപന കാലം മുതല് സീനിയര് മാധ്യമപ്രവര്ത്തകര് അവിടെ ഒത്തുകൂടുകയും മദ്യപിക്കുകയുമൊക്കെ ചെയ്യാറുണ്ടായിരുന്നു. പ്രസ്ക്ലബ് വികസിച്ച്, മൂന്ന് പത്രസമ്മേളന ഹാളുകളും, തൊട്ടടുത്ത കെട്ടിടത്തില് ജേര്ണലിസം ഇന്സ്റ്റിറ്റിയൂട്ടും ഏറ്റവും താഴെ സെല്ലാര് എന്ന സങ്കേതവും ഉണ്ടായി. ഇപ്പോള് പ്രചരിപ്പിക്കുന്നപോലെ കൊള്ള സങ്കേതമല്ല.
ജോലി കഴിഞ്ഞ മാധ്യമ പ്രവര്ത്തകര് ഒത്തു കൂടന്ന സ്ഥലം. ഇവിടെ 'ബാര്' ഇല്ല. ബാര് എന്നാല് ലാഭത്തിന് മദ്യം വില്ക്കുന്ന സ്ഥലമാണ്. ഇവിടെ ചിലര് മദ്യം വാങ്ങിവരികയും, ചിലര് പ്രസ്ക്ലബിലെ രണ്ട് സ്റ്റാഫിനെക്കൊണ്ട് മദ്യം വാങ്ങി കഴിക്കുകയും ചെയ്യും.
ഇതിന് ഒരു കാലത്ത് മദ്യ പെര്മിറ്റ് ഉണ്ടായിരുന്നു. കാലക്രമത്തില് പുതുക്കിയില്ല. ഇപ്പോള് മദ്യ നയം കര്ശനമായപ്പോള് വിമര്ശനം ഉയര്ന്നു. ഇവിടെ മദ്യക്കച്ചവടമില്ലെന്നും, സര്ക്കാര് വിലയ്ക്ക് മദ്യം വാങ്ങി കഴിക്കലേ ഉള്ളുവെന്നും പലതവണ അധികാരികളെ ബോധ്യപ്പെടുത്തി. നിങ്ങളുടെ കൂട്ടത്തിലുള്ളവര് തന്നെ വിമര്ശിക്കുന്നതിനാല് ഈ പരിപാടി നിര്ത്തണമെന്ന് അധികൃതര് ആവശ്യപ്പെട്ടു. നിര്ത്തി. പെര്മിറ്റ് പുതുക്കാന് ശ്രമിക്കുന്നു.
ഇത് മഹാപരാധമായി ചിത്രീകരിക്കുന്നവര്ക്ക് ചില അംഗങ്ങളോടുള്ള വ്യക്തി വിരോധമാവണം. എന്തായാലും ചിത്രീകരിക്കപ്പെടുന്നതുപോലെ അധോലോക കേന്ദ്രമല്ല സങ്കേതം.
https://www.facebook.com/Malayalivartha