വെണ്ടയ്ക്ക കഴിക്കൂ!ഉയര്ന്ന രക്തസമ്മര്ദം കുറയ്ക്കാം
രക്തസമ്മര്ദം കുറയ്ക്കുന്നതിനും ഹൃദയാരോഗ്യം മെച്ചപ്പെടുത്തുന്നതിനും വെണ്ടയ്ക്കയിലുള്ള പൊട്ടാസ്യം സഹായകം. രക്തം കട്ടപിടിക്കുന്നതിനും ആര്ട്ടീരിയോ സ്ളീറോസിസിനുമുളള സാധ്യത കുറയ്ക്കുന്നു. വെണ്ടയ്ക്കയിലുളള ജലത്തില് ലയിക്കുന്നതരം നാരുകള് രക്തത്തിലെ സെറം കൊളസ്ട്രോള് നില കുറയ്ക്കുന്നതിനു സഹായകം. അതു വിവിധതരം ഹൃദയരോഗങ്ങള്ക്കുളള സാധ്യത കുറയ്ക്കുന്നു.
വെണ്ടയ്ക്കയില് സോഡിയം കുറവും, പൊട്ടാസ്യം ഇഷ്ടംപോലെയുമാണ്. ശരീരത്തിലെ സോഡിയത്തിന്റെ തോത് സംതുലനം ചെയ്തു നിര്ത്തുന്നതില് പൊട്ടാസ്യത്തിനു പങ്കുണ്ട്. വെണ്ടയ്ക്കയിലുളള വിറ്റാമിന് എ എന്ന ആന്റിഓക്സിഡന്റ് ചര്മാരോഗ്യം സംരക്ഷിക്കുന്നു. ചുളിവുകള് നീക്കുന്നു. പാടുകളും കുരുക്കളും കുറയ്ക്കുന്നു. ചര്മകോശങ്ങള്ക്കു കേടുപാടു വരുത്തുന്ന ഫ്രീറാഡിക്കലുകളെ വെണ്ടയ്ക്കയിലുളള ആന്റിഓക്സിഡന്റുകള് നിര്വീര്യമാക്കുന്നു.
സ്ത്രീകളുടെ ആരോഗ്യജീവിതത്തിനും വെണ്ടയ്ക്ക ഗുണകരമാണ്. പ്രത്യേകിച്ചു ഗര്ഭിണികളുടെ. ഭ്രൂണാവസ്ഥയില് തലച്ചോറിന്റെ വികാസത്തിനു ഫോളിക്കാസിഡ് അവശ്യം. വെണ്ടയ്ക്കയില് ഫോളേറ്റുകള് ധാരാളം ഉണ്ട്. ഗര്ഭസ്ഥശിശുവിന്റെ ന്യൂറല് ട്യൂബിനെ തകരാറില് നിന്നു രക്ഷിക്കുന്നതിനും ഫോളേറ്റുകള് അവശ്യം. 4-12 ആഴ്ചകളിലെ ഗര്ഭകാലത്താണ് ഫോളിക്കാസിഡ് വേണ്ടിവരുന്നത്. വെണ്ടയ്ക്കയിലുളള ഇരുമ്പും ഫോളേറ്റും ഹീമോഗ്ലോബിന്റെ നിര്മാണം ത്വരിതപ്പെടുത്തുന്നു. ഗര്ഭകാലത്തെ വിളര്ച്ച തടയുന്നതിനും അതു സഹായകം. അതിനാല് ഗര്ഭിണികളുടെ ഭക്ഷണക്രമത്തില് വെണ്ടയ്ക്ക പതിവായി ഉള്പ്പെടുത്തണം.
ശരീരമെമ്പാടും ഓക്സിജന് എത്തിക്കുന്നതു രക്തത്തിലെ ഹീമോഗ്ലോബിനാണ്. ഹീമോഗ്ലോബിന്റെ ഉത്പാദനം കൂടുന്നതോടെ രക്തസഞ്ചാരവും മെച്ചപ്പെടുന്നു. ചര്മത്തിനു തിളക്കവും സ്വാഭാവിക നിറവും നിലനിര്ത്താനാകുന്നു. ശിരോപരിതലത്തിലേക്കുളള രക്തസഞ്ചാരം മെച്ചപ്പെടുന്നതു മുടിവളര്ച്ചയ്ക്കു സഹായകം.താരന്, മുടിയുടെ വരള്ച്ച, മുടികൊഴിച്ചില് എന്നിവ കുറയും.
വീട്ടുവളപ്പില് ജൈവരീതിയില് വിളയിച്ച വെണ്ടയ്ക്ക പച്ചയ്ക്കും കഴിക്കാം. വെണ്ടയ്ക്ക വിഭവങ്ങള് കുറഞ്ഞ തീയില് വേവിച്ചെടുക്കാന് ശ്രദ്ധിക്കണം. അതിലുളള നാരുകള് ഉള്പ്പെടെയുളള പോഷകങ്ങള് നഷ്ടമാകുന്നത് ഒരുപരിധി വരെ അങ്ങനെ തടയാം. എണ്ണയില് വറുത്ത വിഭവങ്ങളിലൂടെയാണ് കൊളസ്ട്രോള് അമിതമായി ശരീരത്തിലെത്തുന്നത്.
വെണ്ടയ്ക്ക കഴിവതും ഫ്രൈ ചെയ്തു കഴിക്കുന്നത് ഒഴിവാക്കണം. മറ്റു രീതികളില് പാകം ചെയ്തു കഴിക്കുന്നതാണ് ഉചിതം. മുറിവുകളുണ്ടാകുമ്പോള് രക്തം കട്ടപിടിക്കുന്നതിനു വെണ്ടയ്ക്കയിലുളള വിറ്റാമിന് കെ സഹായകം. വെണ്ടയ്ക്കയിലുളള മഗ്നീഷ്യം, സെലിനിയം, മാംഗനീസ്, കാല്സ്യം, കോപ്പര് തുടങ്ങിയ അവശ്യം വേണ്ട പോഷകങ്ങള് ഉപദ്രവകാരികളായ ഫ്രീ റാഡിക്കലുകളെ തുരത്തുന്നതിനു സഹായകം. എല്ലുകളുടെ ആരോഗ്യത്തിനും വെണ്ടയ്ക്ക ഗുണപ്രദം. ബോണ് ഡെന്സിറ്റി കൂട്ടുന്നു. പ്രായമാകുന്നതോടെ എല്ലുകളെ ബാധിക്കുന്ന ഓസ്റ്റിയോപൊറോസിസ്, ആര്ത്രൈറ്റിസ് തുടങ്ങിയ ആരോഗ്യപ്രശ്നങ്ങള് തടയുന്നതിനും വെണ്ടയ്ക്കയിലെ പോഷകങ്ങള് സഹായകം. വെണ്ടയ്ക്കയിലുളള ഫോളേറ്റുകള് തലച്ചോറിന്റെ പ്രവര്ത്തനങ്ങള്ക്കു സഹായകമായ ചില ഘടകങ്ങള് ഉത്പാദിപ്പിക്കുന്നു.
വെണ്ടയ്ക്കയെന്നല്ല അധികമായാല് എന്തും വിഷം തന്നെ. വെണ്ടയ്ക്കയിലുളള ഓക്സാലിക് ആസിഡ് വൃക്കയില് കല്ലുണ്ടാക്കുന്നതായി ചില പഠനങ്ങള് സൂചിപ്പിക്കുന്നു. ചിലപ്പോള് ഓക്സാലിക് ആസിഡ് സന്ധികളില് അടിഞ്ഞുകൂടി സന്ധിവേദനയ്ക്ക് ഇടയാക്കാം. അതിനാല് മിതമായി മാത്രം ഉപയോഗിക്കുക. എല്ലാത്തരം വിഭവങ്ങളും മിതമായി ഉള്പ്പെടുത്തിയ ആഹാരക്രമം(ഡയറ്റ്) അതാണ് ആരോഗ്യജീവിതത്തിനു ഗുണപ്രദം.
https://www.facebook.com/Malayalivartha