കുഞ്ഞുങ്ങളിലെ ശ്രവണവൈകല്യത്തിന് പരിഹാരവുമായി 'സോഹം'
ഓരോ വര്ഷവും ശ്രവണവൈകല്യവുമായി ജനിക്കുന്ന ലോകമെമ്പാടുമുളള എട്ടുലക്ഷത്തോളം കുഞ്ഞുങ്ങളില് ഒരു ലക്ഷത്തോളം പേര് ഇന്ത്യയില് നിന്നാണ്. ജന്മനാലുള്ള ശ്രവണവൈകല്യം തിരിച്ചറിഞ്ഞാല് അത് പിന്നീട് കുട്ടികളുടെ ബൗദ്ധികമായ വികാസത്തില് വരെ നിര്ണായക സഹായമായിരിക്കും ചെയ്യുക. നാലോ അതില്കൂടുതലോ വയസ്സാകുമ്പോള് കുട്ടികളുടെ ശ്രവണവൈകല്യം തിരിച്ചറിഞ്ഞ് ചികിത്സിക്കുന്നത് പരിഹരിക്കുന്നതിനുളള സാധ്യത കുറയ്ക്കും. കുട്ടികളുടെ ആശയവിനിമയത്തിനുള്ള കഴിവിനെയും മാനസിക വളര്ച്ചയെയും വരെ ബാധിക്കുന്നതാണ് കേള്വിക്കുണ്ടാകുന്ന തകരാര്. ഇന്ത്യ പോലുള്ള അവികസിത രാജ്യങ്ങളില് ഭൂരിപക്ഷം ആശുപത്രികളിലും ജന്മനാ തന്നെ കുട്ടികളിലുണ്ടാകുന്ന വൈകല്യങ്ങള് കണ്ടെത്താനുള്ള സൗകര്യമില്ല. അതിനു വേണ്ടി വരുന്ന ഉപകരണങ്ങളുടെ വര്ധിച്ച വില തന്നെ കാരണം.
പക്ഷേ കുട്ടികളുടെ ജന്മനാലുള്ള ശ്രവണവൈകല്യം കണ്ടെത്തുന്നതിന് ചെലവു കുറഞ്ഞ, എളുപ്പം ഉപയോഗിക്കാവുന്ന പുതിയ ഉപകരണം കണ്ടെത്തിയിരിക്കുകയാണ് ഒരു സ്റ്റാര്ടപ് കമ്പനി. ഏകദേശം 2.6 കോടി കുഞ്ഞുങ്ങളാണ് ഓരോ വര്ഷവും ഇന്ത്യയില് ജനിക്കുന്നത്. ഇവരില് രണ്ടു ശതമാനം വരുന്നവരെയും 'സോഹം' എന്നു പേരിട്ടിരിക്കുന്ന ഈ ഉപകരണത്താല് പ്രതിവര്ഷം പരിശോധിക്കാനാണു തീരുമാനം. പ്രാദേശികമായി 'സോഹ'ത്തിന്റെ ഉല്പാദനം ആരംഭിക്കുന്നതോടെ കൂടുതല് സ്ഥലങ്ങളിലേക്ക് ഇത് എത്തിക്കാനുമാകും; വിലയും കുറയും. ജനന സമയത്തു തന്നെ കുട്ടികളുടെ ശ്രവണപ്രശ്നം തിരിച്ചറിഞ്ഞാല് എളുപ്പത്തില് ചികിത്സയും ആരംഭിക്കാം. ജനിതകപരവും അല്ലാത്തതുമായ കാരണങ്ങളാല് ശ്രവണവൈകല്യം സംഭവിക്കാറുണ്ട്.
യഥാര്ഥ കാരണം ആരംഭത്തില് തന്നെ കണ്ടെത്തി തിരുത്താനുള്ള അവസരമാണ് 'സോഹം' സമ്മാനിക്കുക. ബാറ്ററിയില് പ്രവര്ത്തിക്കുന്ന ഈ ഉപകരണം ശരീരത്തിനകത്ത് ഘടിപ്പിക്കേണ്ടതില്ല. അതിനാല്ത്തന്നെ നവജാതശിശുക്കളെ വേദനിപ്പിക്കുകയോ മയക്കിക്കിടത്തുകയോ വേണ്ട. ഉപകരണം കൊണ്ടുനടക്കാവുന്നതുമാണ്. കുഞ്ഞിന്റെ നെറ്റിയില് ഘടിപ്പിക്കുന്ന 'സോഹ'ത്തിന്റെ മൂന്ന് ഇലക്ട്രോഡുകള് പ്രത്യേക സ്ക്രീനിങ് ഡിവൈസുമായി ബന്ധിപ്പിച്ചാണ് പരിശോധന. ഇലക്ട്രോഡുകളെ ഉത്തേജിപ്പിക്കുമ്പോള് മസ്തിഷ്കത്തിലെ കേള്വിക്കു സഹായിക്കുന്ന ഭാഗത്തു നിന്ന് പ്രത്യേക 'പള്സുകള്' സൃഷ്ടിക്കപ്പെടും. ഇതിനെയാണ് ഡിവൈസ് വഴി വിശകലനം ചെയ്യുക.
മസ്തിഷ്കത്തില് നിന്ന് 'സിഗ്നലുകളൊ'ന്നും ലഭിച്ചില്ലെങ്കില് കുട്ടിക്ക് കേള്വിപ്രശ്നമുണ്ടെന്ന് ഉറപ്പിക്കാം. അമേരിക്കന് അസോസിയേഷന് ഓഫ് പീഡിയാട്രിക്സ്, യുകെ നാഷനല് ഹെല്ത്ത് സര്വീസസ് എന്നിവ അംഗീകരിച്ച രീതി കൂടിയാണിത്. രാജ്യത്തെ എല്ലാ സര്ക്കാര് ആശുപത്രികളിലും വൈകാതെ ലഭ്യമാക്കാന് സാധിക്കുമെന്നതാണ് 'സോഹ'ത്തിന്റെ ഗുണം. ജനിക്കുന്ന എല്ലാ കുട്ടികളെയും ഈ ഉപകരണം വഴി പരിശോധിക്കേണ്ടതും നിര്ബന്ധമാക്കും. ഇതിനോടകം അഞ്ചിടത്ത് പദ്ധതി നടപ്പാക്കിയിട്ടുണ്ട്. ശാസ്ത്രസാങ്കേതിക മന്ത്രാലയം പുറത്തിറക്കിയ ഈ ഉപകരണം പൂര്ണമായും ഇന്ത്യയുടെ സൃഷ്ടിയാണ്.
രാജ്യത്തെ ജൈവസാങ്കേതിക വകുപ്പിന്റെ നിര്ണായക പദ്ധതികളിലൊന്നാണ് സ്കൂള് ഓഫ് ഇന്റര്നാഷനല് ബയോഡിസൈന്(എസ്ഐബി). ഇതുവരെ ഇന്ത്യയില് പരിഹരിക്കപ്പെടാന് പറ്റാതെ കിടക്കുന്ന ആരോഗ്യപ്രശ്നങ്ങള്ക്ക് പരിഹാരം നിര്ദേശിക്കുന്ന തരം ഉപകരണങ്ങളും മറ്റും തയാറാക്കുന്ന സ്റ്റാര്ട്ടപ്പുകളെ സഹായിക്കുകയാണ് എസ്ഐബിയുടെ ലക്ഷ്യം. അങ്ങനെ സഹായം ലഭിച്ച സോഹം ഇന്നവേഷന് ലാബ്സ് ആണ് ഈ പുതിയ സ്ക്രീനിങ് ഡിവൈസിനു പിന്നില്. മെഡിക്കല് ടെക്നോളജിയില് പുത്തന് ആശയങ്ങളുമായെത്തുന്ന ഇത്തരം പുതുസംരംഭകര്ക്ക് അവസരങ്ങളുടെ വാതിലാണ് എസ്ഐബി തുറന്നിടുന്നത്. മെയ്ക് ഇന് ഇന്ത്യ പ്രകാരമുള്ള ആനുകൂല്യങ്ങളും കമ്പനികള്ക്ക് ലഭിക്കും.
https://www.facebook.com/Malayalivartha