കുട്ടികളുടെ ജീവനു ഭീഷണിയാകുന്ന 'കാവസാക്കി' രോഗം സംസ്ഥാനത്തു പടര്ന്നുപിടിക്കുന്നു
കുട്ടികളുടെ ജീവനു ഭീഷണിയാകുന്ന 'കാവസാക്കി' രോഗം സംസ്ഥാനത്തു പടര്ന്നുപിടിക്കുന്നു. ഒന്നിനും അഞ്ചിനുമിടയില് പ്രായമുള്ള കുട്ടികളുടെ ഹൃദയത്തെ ബാധിച്ചു മരണത്തിനിടയാക്കുന്ന രോഗത്തിന്റെ വ്യാപനനിരക്കു കഴിഞ്ഞ അഞ്ചു വര്ഷത്തിനുള്ളില് 30 ശതമാനമെത്തിയിട്ടും അധികൃതര്ക്ക് അനക്കമില്ല. കോഴിക്കോട്, തിരുവനന്തപുരം, എറണാകുളം, കോട്ടയം, ആലപ്പുഴ ജില്ലകളില് ഈ രോഗത്തിന്റെ പകര്ച്ച ഉയര്ന്ന തോതിലാണെന്ന് ആരോഗ്യവകുപ്പ് വൃത്തങ്ങള് അറിയിച്ചു. അണുബാധയാണ് മൂലകാരണം.
സാധാരണ വൈറല് പനിപോലെയാണ് ആരംഭം. പനി പെട്ടെന്നു മൂര്ച്ഛിക്കും. ശ്വാസതടസം, വിട്ടുമാറാത്ത രൂക്ഷമായ കഫക്കെട്ട്, കണ്ണിലും വായിലും ദൃശ്യമാകുന്ന ചുവപ്പുനിറം, കൈത്തണ്ടിലും പാദങ്ങളിലും ചുവപ്പുനിറവും നീരും, ചൂടുകുരുപോലെ തൊലിപ്പുറത്തു കാണുന്ന കുരുക്കള്,
കഴുത്തിലെ നീര് എന്നിവയാണ് കാവസാക്കിയുടെ ലക്ഷണങ്ങള്. വായ, കവിള്, തൊണ്ട, ചുണ്ട് ഇവ ചുവക്കും. നാവ് വീങ്ങി ചുവന്നു സ്ട്രോബറി പോലിരിക്കും. രോഗം മൂര്ച്ഛിച്ചാല് കൈകാലുകളിലെ നഖത്തിനു ചുറ്റും തൊലിയിളകും.
രോഗത്തിന്റെ രണ്ടാം ദശയിലാണ് ഹൃദയപേശികള്ക്കു നീര്ക്കെട്ടുണ്ടാകുന്നത്. ഹൃദയത്തിന്റെ പമ്പിങ് അലങ്കോലമാകും. ഹൃദയസഞ്ചിയില് ജലാംശം കെട്ടിക്കിടക്കുന്നു. ഈ ലക്ഷണങ്ങള് ദൃശ്യമായി പത്തു ദിവസത്തിനകം കുട്ടിയുടെ മരണം സംഭവിക്കുമെന്നാണ് കരുതപ്പെടുന്നത്. പനി ബാധിച്ചുവരുന്ന കുട്ടികളിലാണിത് കണ്ടുവരുന്നത്. നേരത്തെ തിരിച്ചറിഞ്ഞു കഴിഞ്ഞാല്
രോഗം ഹൃദയത്തെ ബാധിക്കുന്നത് ഒഴിവാക്കാം. 2010 ല് തിരുവനന്തപുരം എസ്.എ.ടി. ആശുപത്രിയില് 27 കുട്ടികള് ചികില്സയ്ക്കെത്തിയിരുന്നു. അതില് 62 ശതമാനം കുട്ടികളുടെയും ഹൃദയത്തില് രോഗം ബാധിച്ചിരുന്നു. എന്നാല്, ആരും മരണപ്പെട്ടില്ല.
ഇത്തവണ മഴക്കാലമാരംഭിച്ചശേഷം നിരവധി കുഞ്ഞുങ്ങള് കോഴിക്കോട്, തിരുവനന്തപുരം, കോട്ടയം, കോലഞ്ചേരി, ആലപ്പുഴ മെഡിക്കല് കോളജ് ആശുപത്രികളില് കാവസാക്കിക്കു ചികില്സ തേടി. കോലഞ്ചേരി മെഡിക്കല് കോളജ് ആശുപത്രിയില് അഞ്ചോളം കേസുകള് റിപ്പോര്ട്ട് ചെയ്തതായി വിവരമുണ്ട്.
കുട്ടികളുടെ ജീവന്തന്നെ അപകടത്തിലാക്കുന്ന മാരകമായ ഈ രോഗം ശ്രദ്ധയില്പ്പെട്ടിട്ടും ആരോഗ്യവകുപ്പ് മുന്കരുതലെടുക്കുന്നില്ലെന്നു പരാതിയുണ്ട്. ഇക്കാര്യം റിപ്പോര്ട്ട് ചെയ്യുന്നതിയല് ആശുപത്രികളും വൈമുഖ്യം കാണിക്കുന്നതിനാല് യഥാര്ത്ഥ കണക്കും ലഭ്യമല്ല. കേരളത്തില് കാവസാക്കി രോഗം കൂടുതലായി കാണുന്നതിന്റെ കാരണം വ്യക്തമല്ല. വിദേശത്തു ജപ്പാനിലാണ് കാവസാക്കി രോഗം വ്യാപകമായി
കണ്ടുവരുന്നത്.
മഴക്കാലത്താണ് ഈ അപൂര്വരോഗം തലപൊക്കുന്നത്. ഹൃദയത്തിലെ കൊറോണറി ധമനികള്ക്കു വീക്കമുണ്ടായാണു മരണം. പെണ്കുട്ടികളേക്കാള് ആണ്കുട്ടികളാണ് കൂടുതലായി അടിമപ്പെടുക. എട്ടു വയസിനു മുകളിലുള്ളവരെ സാധാരണയായി രോഗം ആക്രമിക്കാറില്ല. അതുപോലെ നവജാത ശിശുക്കളെയും. രോഗം നിര്ണയിക്കപ്പെട്ടുകഴിഞ്ഞാല് വേഗം ചികില്സ ലഭ്യമാക്കുകയാണു വേണ്ടതെന്നു ഡോക്ടര്മാര് പറയുന്നു.
https://www.facebook.com/Malayalivartha