ലോകത്തിലെ ആദ്യത്തെ 4 ഡി കെട്ടിടം ദുബായിയിൽ
ദുബായ് എന്നും വിസ്മയങ്ങളുടെയും പ്രതീക്ഷകളുടെയും നാടാണ്. മനുഷ്യനിർമിതമായതും അല്ലാത്തതുമായ നിരവധി വിസ്മയങ്ങളുടെ നഗരമാണ് ദുബായ്. ലോകത്തെ ഏറ്റവും വലിയ കെട്ടിടം മുതൽ ഏറ്റവും വലിയ മനുഷ്യനിർമിത ദ്വീപ് വരെ ആ പട്ടിക നീളുന്നു. ലോകത്തിലെ ഏറ്റവും വലിയ കെട്ടിടമായ ബുര്ജ്ഖലീഫക്ക് ശേഷം ദുബായിയുടെ വിസ്മയ പട്ടികയിലേക്ക് പുതിയൊരു അതിഥി കൂടിയെത്തുകയാണ്. ഡൈനാമിക് ടവർ അഥവാ ഡാവിഞ്ചി ടവർ എന്നാണ് ആ വിസ്മയത്തിനു പേരിട്ടിരിക്കുന്നത്.
നിർമ്മാണം പൂർത്തിയാകുമ്പോൾ ലോകത്തിലെ ആദ്യത്തെ രൂപം മാറാൻ കഴിവുള്ള കെട്ടിടമാകും ഡൈനാമിക് ടവർ. വോയിസ് ആക്ടിവേറ്റഡ് സാങ്കേതികവിദ്യയുടെ സഹായത്തോടെ താമസക്കാർക്ക് അപ്പാർട്മെന്റുകൾ നിയന്ത്രിക്കാൻ കഴിയും. 80 നിലകളുള്ള അംബരചുംബിക്ക് ഇരു വശങ്ങളിലേക്കും 360 ഡിഗ്രി കറങ്ങാൻ സാധിക്കും എന്നത് അത്ഭുതം തന്നെയല്ലേ. സ്വതന്ത്രമായി തിരിയുന്നതോടൊപ്പം നിര്ദ്ദേശങ്ങള് നല്കി ഏത് ഭാഗത്തേക്കാണോ അപ്പാര്ട്ട്മെന്റ് തിരിയേണ്ടതെന്ന് അഡ്ജസ്റ്റ് ചെയ്ത് വെക്കാനും സാധിക്കും. ഇതുതന്നെയാണ് ഇതിന്റെ ഏറ്റവും വലിയ സവിശേഷത. പ്രീഫാബ്രിക്കേറ്റഡ് ശൈലിയിൽ പണിയുന്ന ആദ്യ അംബരചുംബി എന്ന സവിശേഷതയുമുണ്ട് ഡാവിഞ്ചി ടവറിന്സ്വന്തം.
പദ്ധതിയനുസരിച്ച് ഓരോ നിലയ്ക്കും സമാന്തരമായി വിൻഡ് ടർബൈനുകൾ സ്ഥാപിക്കും. ഈ ടര്ബൈനുകളാണ് കെട്ടിടത്തിന് വേണ്ട വൈദ്യുതി ഉത്പാദിപ്പിക്കുക. മേൽക്കൂരയിൽ സോളാർ പാനലുകളും. സ്റ്റീൽ, അലുമിനിയം, കാർബൺ ഫൈബറുകൾ കൊണ്ട് പുറത്തെ ഫാക്ടറിയിൽ നിർമിക്കുന്ന ചുവരുകൾ ഇവിടെ കൂട്ടിയോജിപ്പിക്കുകയാകും ചെയ്യുന്നത്. 2006 ൽ ആണ് ഇതിന്റെ പണി ആരംഭിച്ചത്. ഇതിന്റെ നിര്മ്മാണം നടത്തുന്ന ഡൈനമിക് ആര്കിടെക്ച്ചര് എന്ന കമ്പനിയാണ് കെട്ടിടം 2020 ല് തുറന്ന് നല്കുമെന്ന് പ്രഖ്യാപിച്ചത്.
സ്വിമ്മിംഗ് പൂളുകള്, പൂന്തോട്ടങ്ങള്, അപ്പാര്ട്ട്മെന്റിന് പുറത്ത് കാര് പാര്ക്ക് ചെയ്യാനുള്ള ലിഫ്റ്റ് തുടങ്ങിയവയെല്ലാം ഈ ടവറിലുണ്ടാകും. ഇതിന്റെ ഓരോ യൂണിറ്റിനും ഏകദേശം 3 കോടി ഡോളര് ചിലവാണ് കണക്കാക്കുന്നത്. 80 നിലയുള്ള കെട്ടിടത്തിന് 1.2 മില്ല്യന് സ്ക്വര് ഫീറ്റ് വിസ്തൃതിയും 420 മീറ്റര് ഉയരവുമാണ് ഉണ്ടാവുക. നിര്മ്മാണം പൂര്ത്തിയാകുന്നതോടെ ലോകത്തിലെ ആദ്യത്തെ 4 ഡി അംബരചുംബിയായി ഇത് മാറും. പ്രശസ്ത വാസ്തുശില്പി ഡേവിഡ് ഫിഷറാണ് രൂപകൽപ്പന നിർവഹിക്കുന്നത്.
https://www.facebook.com/Malayalivartha