വിവിധ കേസുകളില് പ്രതിയായ അധോലോക നായകനും തീവ്രവാദിയുമായ ഫാറൂക് ദേദിവാലയെ വിട്ടുകിട്ടണമെന്ന ഇന്ത്യയുടെ ആവശ്യം തള്ളി യു.എ.ഇ സര്ക്കാര്
വിവിധ കേസുകളില് പ്രതിയായ അധോലോക നായകനും തീവ്രവാദിയുമായ ഫാറൂക് ദേദിവാലയെ വിട്ടുകിട്ടണമെന്ന ഇന്ത്യയുടെ ആവശ്യം തള്ളിയ യു.എ.ഇ സര്ക്കാര് ഇയാളെ പാകിസ്ഥാന് കൈമാറി. അധോലോക സംഘമായ ഡി കമ്പനിയിലും പാകിസ്ഥാന് ഇന്ത്യയില് മുജാഹിദീനിലും അംഗമായ ഫാറൂകിനെ മേയ് 12ന് ദുബായില് വച്ച് അറസ്റ്റ് ചെയ്യുന്നത്. ദുബായ് പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു അറസ്റ്റ്. തുടര്ന്ന് ഇയാളെ വിട്ടുകിട്ടണമെന്ന് മഹാരാഷ്ട്ര തീവ്രവാദ വിരുദ്ധ സ്ക്വാഡോ ഔദ്യോഗികമായി യു.എ.ഇയോട് ആവശ്യപ്പെട്ടിരുന്നു. എന്നാല് ഇത് നിരാകരിച്ചാണ് ഇയാളെ പാകിസ്ഥാനിലേക്ക് നാടുകടത്തിയത്.
പാകിസ്ഥാനിലെ തീവ്രവാദി സെല്ലുകളുമായും രഹസ്യാന്വേഷണ ഏജന്സിയായ ഐ.എസ്.ഐയുമായും അടുത്ത ബന്ധം പുലര്ത്തുന്ന ഫാറൂക് 17 വര്ഷമായി ഒളിവിലാണ്. ഗുജറാത്തിലെ ഡി കമ്പനിയുടെ പ്രവര്ത്തനങ്ങള് നിയന്ത്രിച്ചിരുന്നത് ഫാറൂക്കായിരുന്നു. ദാവൂദ് ഇബ്രാഹീം, ഛോട്ടാ ഷക്കീല് എന്നിവരുമായി അടുത്ത ബന്ധം പുലര്ത്തിയിരുന്ന ഇയാള് ഇന്ത്യാക്കാര്ക്ക് തീവ്രവാദ പരിശീലനം നല്കുന്നതിലും വ്യാപൃതനായിരുന്നു. ഇത്തരത്തില് ഫാറൂക് പാകിസ്ഥാനിലേക്ക് തീവ്രവാദ പരിശീലനത്തിന് അയച്ച രണ്ട് പേര് ഇപ്പോള് മഹാരാഷ്ട്ര തീവ്രവാദ വിരുദ്ധ വിഭാഗത്തിന്റെ കസ്റ്റഡിയിലാണ്.
ഫാറൂക് തങ്ങളുടെ പൗരനാണെന്നും ഇന്ത്യയ്ക്ക് വിട്ടുനല്കരുതെന്നും പാക് അധികൃതട ആവശ്യപ്പെട്ടത് പ്രകാരമാണ് ഇയാളെ ദുബായ് പൊലീസ് പാകിസ്ഥാന് കൈമാറിയത്. ഇയാള് ഇന്ത്യന് വംശജനാണെന്ന രേഖകളുമായി ഗുജറാത്ത് പൊലീസ് സംഘം ദുബായിലെത്തിയിരുന്നു.
എന്നാല് ദുബായില് പാക് പാസ്പോര്ട്ടിലെത്തിയ ഇയാളെ ഇന്ത്യയ്ക്ക് വിട്ടുനല്കാന് യു.എ.ഇ അധികൃതര് വിസമ്മതിക്കുകയായിരുന്നു. 2003ല് ഗുജറാത്ത് ആഭ്യന്തരമന്ത്രിയായിരുന്ന പാണ്ഡ്യയെ വധിച്ച കേസിലെ മുഖ്യപ്രതിയാണ് ഫാറൂക് എന്നാണ് കരുതുന്നത്.
https://www.facebook.com/Malayalivartha