ഹലാ ഫെബ്രുവരി ഉത്സവത്തിന് കുവൈത്തില് തുടക്കമായി
ഹലാ ഫെബ്രുവരി ഉത്സവത്തിന് കുവൈത്തിലെ സാല്മിയ സാലിം അല് മുബാറക് സ്ട്രീറ്റില് തുടക്കമായി. ഇന്ത്യയെ പ്രതിനിധാനം ചെയ്ത് 'ഇന്ക്രെഡിബിള് ഇന്ത്യ' എന്ന തലക്കെട്ടില് ഒരുക്കിയ എംബസിയുടെ സ്റ്റാള് ശ്രദ്ധനേടി. ഇന്ത്യയുടെ ടൂറിസം മേഖലയെ പരിചയപ്പെടാന് ഇത് അവസരമൊരുക്കി. എംബസി സ്റ്റാളിന് സമീപത്തുനിന്ന് ഫോട്ടോയെടുക്കാന് നിരവധി പേര് തിരക്കുകൂട്ടിയത് പവലിയന്റെ മനോഹാരിതക്ക് തെളിവായി.
കലാരൂപങ്ങളും നൃത്ത പരിപാടികളും കാര്ണിവലിന്റെ ഭാഗമായി അരങ്ങേറി. വിവിധ ഭാഗങ്ങളില്നിന്നത്തെിയ സ്വദേശികളും വിദേശികളുമായ വന് ജനകൂട്ടം നഗരിയെ ഉത്സവ നഗരിയാക്കി മാറ്റി. രാജ്യത്തുനിന്നുള്ള ബൊഹ്റ ബാന്ഡ് സംഘത്തിന്റെ സംഗീതവിരുന്നും ശ്രദ്ധപിടിച്ചുപറ്റി. ബൊഹ്റ കമ്യൂണിറ്റിയില്നിന്നുള്ള കുട്ടികള് ശുചിത്വബോധത്തിന്റെ മഹത്വം ഉയര്ത്തിപ്പിടിച്ചുകൊണ്ട് ആഘോഷസ്ഥലം വൃത്തിയാക്കി. ബൊഹ്റ ബാന്ഡും പരേഡില് പങ്കെടുത്തു. വിവിധ കുവൈത്തി സ്കൂളുകളില്നിന്നുള്ള കുട്ടികളുടെ പരേഡ് ഉദ്ഘാടന പരിപാടിക്ക് മാറ്റേകി. തുര്ക്കി, ഫലസ്തീന്, ജോര്ഡന് തുടങ്ങിയ വിദേശ എംബസികളും കാര്ണിവല് നഗരിയില് പവലിയനുകള് സജ്ജീകരിച്ചിരുന്നു. അറബ് നൃത്തസംഗീത പരിപാടികളും പ്രദര്ശന പവലിയനുകളും പരിപാടിക്ക് മിഴിവേകി.
കുവൈത്ത് പൊലീസ്, അഗ്നിശമന സേന, കോസ്റ്റ് ഗാര്ഡ് തുടങ്ങിയ സേനാവിഭാഗങ്ങള് സുരക്ഷാ വാഹനങ്ങളുടെയും ഉപകരണങ്ങളുടെയും പ്രദര്ശനം ഒരുക്കിയിരുന്നു. കുവൈത്ത് പൊലീസിന്റെ റെസ്ക്യൂ ഹെലികോപ്ടര് അടുത്തുനിന്ന് കാണാനും ചിത്രമെടുക്കാനും വന്തിരക്കാണ് അനുഭവപ്പെട്ടത്. ഹലാ ഫെബ്രുവരിയുടെ ഭാഗമായുള്ള ആഘോഷ പരിപാടികള് അടുത്ത ഒരു മാസം കുവൈത്തിന്റെ വിവിധ ഭാഗങ്ങളിലായി അരങ്ങേറും.
https://www.facebook.com/Malayalivartha