നഗരത്തിലെ ഗതാഗതക്കുരുക്കുകള്‍ക്ക് ആകാശത്ത് പരിഹാരമൊരുക്കി ദുബായ്
നഗരത്തിലെ ഗതാഗതക്കുരുക്കുകള്‍ക്ക് പരിഹാരമായി ആകാശത്ത് സ്വയം ഓടിക്കുന്ന ഓട്ടോണമസ് ഏരിയല്‍ വെഹിക്കിള്‍ (എഎവി) പരീക്ഷിക്കാന്‍ ഒരുങ്ങുകയാണ് ദുബായ് ആര്‍ടിഎ. ചൈനീസ് കമ്പനി ഇഹാങ്ങാണ് ആര്‍ടിഎയുടെ പങ്കാളി. ജൂലൈയില്‍ സര്‍വീസ് ആരംഭിക്കാനാണു ലക്ഷ്യമിടുന്നത്. മനുഷ്യരെ വഹിക്കുന്ന ഇഹാങ് 184 എന്ന വാഹനം നേരത്തേ ദുബായിയുടെ ആകാശത്തു പരീക്ഷണ പറക്കല്‍ നടത്തിയിരുന്നു. ദുബായ് സിവില്‍ ഏവിയേഷന്‍ അതോറിറ്റിയുടെ സുരക്ഷാനിയമങ്ങള്‍ക്കു വിധേയമാണു പരിശീലന പറക്കല്‍ നടത്തുന്നത്.
വാഹനത്തിലെ ടച്ച് സ്‌ക്രീനില്‍ അടയാളപ്പെടുത്തുന്ന നിര്‍ദ്ദിഷ്ട സ്ഥലത്തേക്ക് ഓട്ടോമാറ്റിക് പ്രവര്‍ത്തനത്തിലൂടെ എത്തിക്കുന്നതാണു വാഹനം. ഗ്രൗണ്ട് കണ്‍ട്രോള്‍ സെന്റര്‍ പ്രവര്‍ത്തനത്തിനു മുഴുവന്‍ മേല്‍നോട്ടം വഹിക്കുകയും നിയന്ത്രിക്കുകയും ചെയ്യും. രാജ്യാന്തര സര്‍ക്കാര്‍ ഉച്ചകോടിയില്‍ എഎവി പ്രദര്‍ശിപ്പിച്ചിരുന്നു. രൂപകല്‍പനയിലും നിര്‍മാണത്തിലും മികച്ച സുരക്ഷ ഉറപ്പാക്കാന്‍ ആര്‍ടിഎ ശ്രമിച്ചിരുന്നെന്ന് ആര്‍ടിഎ ഡയറക്ടര്‍ ജനറലും ബോര്‍ഡ് ഓഫ് എക്‌സിക്യുട്ടീവ് ഡയറക്ടേഴ്‌സ് ചെയര്‍മാനുമായ മത്തര്‍ അല്‍ തായര്‍ പറഞ്ഞു.
മികച്ച സുരക്ഷയാണ് ഈ വാഹനത്തില്‍ ഏര്‍പ്പെടുത്തിയിട്ടുളളത്. എട്ട് മുഖ്യ പ്രൊപ്പെല്ലറുകളാണ് വാഹനത്തിനുള്ളത്. ഒരു സമയം ഒരു പ്രൊപ്പെല്ലര്‍ മാത്രമാണു പ്രവര്‍ത്തിക്കുന്നത്. ഒന്നിനു കേടുപറ്റിയാല്‍ മറ്റ് ഏഴെണ്ണവും സഞ്ചാരം പൂര്‍ത്തിയാക്കാനും ലാന്‍ഡ് ചെയ്യാനും പ്രവര്‍ത്തന സജ്ജമാകും. കൂടാതെ, ഓരോ സംവിധാനത്തിനും സ്റ്റാന്‍ഡ് ബൈയും നല്‍കിയിട്ടുണ്ട്. പരമാവധി 30 മിനിറ്റാണ് പറക്കാവുന്ന സമയം. വേഗം പരമാവധി മണിക്കൂറില്‍ 160 കിലോമീറ്റര്‍. ഉയരുന്നതും താഴുന്നതും സെക്കന്‍ഡില്‍ ആറുമീറ്റര്‍ എന്ന വേഗത്തിലായിരിക്കും.
ലാന്‍ഡിങ് വേഗം സെക്കന്‍ഡില്‍ നാല് മീറ്റര്‍. 3.9 മീറ്റര്‍ നീളവും 4.02 മീറ്റര്‍ വീതിയും 1.60 മീറ്റര്‍ ഉയരവുമാണ് എഎവിക്കുള്ളത്. ഭാരം 250 കിലോഗ്രാം. മൂവായിരം അടി ഉയരത്തിലാണു പരമാവധി പറക്കാന്‍ കഴിയുന്നത്. പരമാവധി രണ്ടുമണിക്കൂറാണ് ബാറ്ററി ചാര്‍ജ്. കൊടുങ്കാറ്റ് ഒഴികെ, എല്ലാ കാലാവസ്ഥയിലും വാഹനത്തിനു പ്രവര്‍ത്തിക്കാനാവും. സൂക്ഷ്മതയുള്ള സെന്‍സറുകള്‍ സ്ഥാപിച്ചിരിക്കുന്ന വാഹനത്തിന് കുലുക്കം കുറവും കടുത്ത ചൂട് നേരിടാനുള്ള ശേഷിയുമുണ്ട്. . ഇത്തിസലാത്ത് ആണ് എഎവിയും ഗ്രൗണ്ട് കണ്‍ട്രോള്‍ സെന്ററും തമ്മിലുള്ള ആശയവിനിമയത്തിന് പിന്തുണ നല്‍കുന്നത്.
https://www.facebook.com/Malayalivartha
