ദുബായ് നിരത്തില്‍ ഇലക്ട്രിക് കാറുകള്‍ സജീവമാക്കുന്നു
ഇലക്ട്രിക് കാറുകള്‍ ദുബായ് നിരത്തില്‍ സജീവമാക്കുന്നതിനായി പ്രമുഖ കമ്പനിയായ ടെസ്ലയും ദുബായ് ഇന്‍വെസ്റ്റ്‌മെന്റ് ഡവലപ്‌മെന്റ് ഏജന്‍സിയും തമ്മില്‍ സഹകരിച്ചു പദ്ധതി നടപ്പാക്കുന്നു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം വിഭാവനം ചെയ്ത പദ്ധതിയുടെ ഭാഗമാണിത്. ദുബായിയെ സ്മാര്‍ട് സിറ്റിയും രാജ്യാന്തര സാമ്പത്തികരംഗത്തിന്റെ കേന്ദ്രസ്ഥാനവും ആക്കുകയെന്നതാണ് അദ്ദേഹത്തിന്റെ ലക്ഷ്യം. ഇതിന്റെ ഭാഗമായി മേഖലയിലെ ആദ്യ ടെസ്‌ല ഷോറൂമും, സര്‍വീസ് സെന്ററും ഷെയ്ഖ് സായിദ് റോഡില്‍ ഈ വര്‍ഷം ആരംഭിക്കുമെന്ന് ടെസ്‌ല സഹസ്ഥാപകനും ചീഫ് എക്‌സിക്യൂട്ടീവുമായ ഇലോണ്‍ മസ്‌ക് അറിയിച്ചു.
ആദ്യ ചാര്‍ജിങ് സ്‌റ്റേഷന്‍ ദുബായ് സാമ്പത്തിക വകുപ്പിന്റെ മുഖ്യകാര്യാലയത്തില്‍ ആരംഭിക്കും. സംശുദ്ധ ഊര്‍ജവും സാങ്കേതിക വിദ്യയും മേഖലയില്‍ ലഭ്യമാക്കുകയെന്ന ലക്ഷ്യത്തോടെയാണു പദ്ധതിയെന്ന് ദുബായ് സാമ്പത്തിക വകുപ്പിന്റെ മുഖ്യകാര്യാലയം ഡയറക്ടര്‍ ജനറല്‍ സമി അല്‍ ഖാംസി അറിയിച്ചു. ടെസ്‌ല പോലെയുള്ള നൂതന പദ്ധതികള്‍ നടപ്പാക്കി രാജ്യാന്തര കമ്പനികളുടെ മികച്ച വേദിയായി ദുബായി മാറുമെന്ന് എഫ്ഡിഐ സിഇഒ ഫഹദ് അല്‍ ഗെര്‍ഗാവി പറഞ്ഞു. പുതിയ പരീക്ഷണങ്ങളാല്‍ ലോകത്തു മാറ്റങ്ങള്‍ വരുത്തുന്ന കമ്പനികള്‍ക്ക് അവസരം നല്‍കി ബിസിനസ് വികസനത്തെ സഹായിക്കുമെന്നും അദ്ദേഹം അറിയിച്ചു.
https://www.facebook.com/Malayalivartha
