ലോകം ചുറ്റുന്ന പറക്കും കണ്ണാശുപതി ദോഹയിലെത്തി
അന്ധതയ്ക്കെതിരെയുളള ബോധവല്ക്കരണവുമായി ലോകം ചുറ്റുന്ന പറക്കും കണ്ണാശുപത്രി ദോഹയിലെ ഹമദ് രാജ്യാന്തര വിമാനത്താവളത്തിലെത്തി. ഖത്തറിലെ ബ്രിട്ടിഷ് സ്ഥാനപതി അജയ് ശര്മ, ബംഗ്ലദേശ് അംബാസഡര് അഷുദ് അഹമ്മദ്, ഖത്തര് ഫണ്ട് ഫോര് ഡവലപ്മെന്റ് എക്സിക്യൂട്ടീവ് ഡയറക്ടര് മിസ്ഫിര് ഹമദ് അല് ഷഹ്വാനി, ഹമദ് വിമാനത്താവളം വൈസ് പ്രസിഡന്റ് അബ്ദുല് അസീസ് അല് മാസ് തുടങ്ങിയവര് ചേര്ന്നു സ്വീകരിച്ചു. മൂന്നു ജീവകാരുണ്യ സംഘടനകളും 19 ആശുപത്രികളും സഹകരിച്ചാണു പദ്ധതി നടപ്പാക്കുക. 'ഖത്തര് ക്രിയേറ്റിങ് വിഷന്' എന്ന ഈ പദ്ധതിക്കു ഖത്തര് ഡവലപ്മെന്റ് ഫണ്ടാണു സാമ്പത്തിക സഹായം നല്കുന്നത്. 2012 മുതല് ഓര്ബിസിനു പിന്തുണ നല്കിവരുന്നതായി ഖത്തര് എയര്വേയ്സ് ഗ്രൂപ്പ് സിഇഒ അക്ബര് അല് ബേക്കര് പറഞ്ഞു.
പ്രത്യേക പരിശീലന സൗകര്യങ്ങളൊരുക്കിയ എംഡി-10 എന്ന വിമാനമാണ് ഇതിനായി ഉപയോഗിക്കുന്നത്. ലണ്ടന്, അയര്ലന്ഡ് എന്നിവിടങ്ങളിലെ പര്യടനത്തിനുശേഷമാണു 'ഓര്ബിസ്' വിമാനം ദോഹയിലെത്തിയത്. വിദ്യാര്ഥികള്ക്കും ആരോഗ്യ പ്രഫഷനലുകള്ക്കും പറക്കും ആശുപത്രി കാണാന് അവസരമുണ്ട്. 2020ന് അകം ഇന്ത്യയിലെയും ബംഗ്ലദേശിലെയും 55 ലക്ഷം കുട്ടികള്ക്കു നേത്ര പരിശോധനയും ചികിത്സയും നടത്തുക എന്ന ഖത്തറിന്റെ പദ്ധതിക്കു പറക്കും ആശുപത്രി പ്രചാരണം നല്കും. അന്ധതയ്ക്കെതിരെയുള്ള ഖത്തറിന്റെ പ്രവര്ത്തനത്തെ ശ്രദ്ധേയമാക്കാന് ഓര്ബിസിന്റെ സന്ദര്ശനത്തിലൂടെ കഴിയുമെന്നാണ് വിശ്വാസം.
https://www.facebook.com/Malayalivartha