മേയ്ദിന പരിപാടികള്ക്ക് നാളെ ഷാര്ജയില് തുടക്കമാകുന്നു
ലോക തൊഴിലാളിദിനമായ മേയ് ഒന്നിന് ഷാര്ജയിലും വിപുലമായ പരിപാടികള് സംഘടിപ്പിക്കും. ഷാര്ജ ലേബര് ഡെയ്സ്' എന്നപേരില് ഷാര്ജ ഗവണ്മെന്റ് ആണ് പരിപാടികള് സംഘടിപ്പിക്കുന്നത്. ശനി മുതല് മെയ്ദിനമായ തിങ്കളാഴ്ച വരെ നീണ്ടുനില്ക്കുന്നതാണ് ഷാര്ജ ലേബര് ഡെയ്സ് ആഘോഷങ്ങള്. സജ വ്യവസായ മേഖലയിലാണ് ആഘോഷങ്ങള്. 'ദി ലേബര് സ്റ്റാന്ഡേര്ഡ് ഡവലപ്പ്മെന്റ് അതോറിറ്റി' (എല്.എസ്.ഡി.എ. ) യാണ് പരിപാടിക്ക് നേതൃത്വംകൊടുക്കുന്നത്. കഴിഞ്ഞ വര്ഷമാണ് ആദ്യമായി ഷാര്ജ ഗവണ്മെന്റ് നേതൃത്വത്തില് തൊഴിലാളിദിനപരിപാടികള് ആഘോഷിക്കാനാരംഭിച്ചത്.
22,000 ത്തിലധികം തൊഴിലാളികള് മുന് വര്ഷത്തെ മേയ് ദിനാഘോഷത്തില് പങ്കെടുത്തതായാണ് കണക്ക്. ഇന്ത്യന് കോണ്സുലേറ്റ് കൂടാതെ പാകിസ്താന്, ബംഗഌദേശ്, ശ്രീലങ്ക, നേപ്പാള്, ഫിലിപ്പെന്സ് തുടങ്ങിയ കോണ്സുലേറ്റുകളും ഷാര്ജ ഇന്ത്യന് അസോസിയേഷനും ഷാര്ജ ലേബര് ഡെയ്സ് ആഘോഷത്തില് സഹകരിക്കും. കൂടാതെ എമിറേറ്റിലെ തൊഴിലുടമകളും തൊഴിലാളികളും തൊഴിലാളിദിന പരിപാടിക്ക് പിന്തുണ നല്കുന്നുണ്ട്.ശനിയാഴ്ച വൈകീട്ട് നാലുമണിക്ക് ഷാര്ജ എല്.എസ്.ഡി.എ. ചെയര്മാന് സലിം യൂസഫ് അല് ഖ്വസീര് ഷാര്ജ തൊഴിലാളിദിന ആഘോഷങ്ങള് ഉദ്ഘാടനം ചെയ്യും.
ഷാര്ജ പോലീസ്, സിവില് ഡിഫന്സ് ജനറല് ഡയറക്ടറേറ്റ്, ഷാര്ജ മാനവശേഷി മന്ത്രാലയം, ഷാര്ജ ആരോഗ്യവകുപ്പ് എന്നിവ സംയുക്തമായി ജനങ്ങള്ക്ക് ആവശ്യമായ ബോധവത്കരണവും സംഘടിപ്പിക്കും. തുടര്ന്ന് ആരോഗ്യക്യാമ്പ്, ഷാര്ജ യൂണിവേഴ്സിറ്റിയുടെ സഞ്ചരിക്കുന്ന ദന്തല് ക്ലിനിക്ക് എന്നിവയും ഉണ്ടായിരിക്കും. ആഘോഷത്തിന്റെ രണ്ടാംദിവസമായ ഞായറാഴ്ച രാവിലെ 11 മണിക്ക് ഷാര്ജ ഇന്സ്റ്റിറ്റിയൂഷണല് സപ്പോര്ട്ട് ആന്ഡ് കമ്യൂണിക്കേഷന് ഡിപ്പാര്ട്ട്മെന്റ് ഡയറക്ടര് ഒമര് സലിം അല് ഷാര്ജി കായികപരിപാടികള് ഉദ്ഘാടനം ചെയ്യും.
വൈകീട്ട് അഞ്ചുമണിമുതല് ഏഴുവരെ അഞ്ചുരാജ്യക്കാര് പങ്കെടുക്കുന്ന വിനോദപരിപാടികളും ആരോഗ്യ ക്യാമ്പും ഉണ്ടായിരിക്കും. തിങ്കളാഴ്ച മേയ് ദിന ആഘോഷ പരിപാടികളുടെ സമാപനസമ്മേളനം വൈകീട്ട് ആറുമണിക്ക് എമിറേറ്റിലെ സര്ക്കാര് വകുപ്പ് തലവന് ശൈഖ് മുഹമ്മദ് ബിന് സഖര് അല് ഖാസിമി ഉദ്ഘാടനംചെയ്യും. വിവിധ രാജ്യങ്ങളുടെ കോണ്സുലാര് ജനറല്മാരും ചടങ്ങില് സന്നിഹിതരായിരിക്കും. തൊഴിലാളിദിന പ്രഭാഷണം, കാര്ണിവല്, തിരഞ്ഞെടുക്കപ്പെടുന്ന തൊഴിലാളികള്ക്കും തൊഴില് സ്ഥാപനങ്ങള്ക്കും അവാര്ഡ് വിതരണം എന്നിവയും ഉണ്ടായിരിക്കും.
കായിക, വിനോദ മത്സരങ്ങളിലെ വിജയികള്ക്കും സമാപനസമ്മേളനത്തില് അവാര്ഡുകള് വിതരണംചെയ്യും. ഷാര്ജ സിവില് ഡിഫന്സ് ജനറല് കമാണ്ട് ക്യാപ്റ്റന് അഹ്മദ് ഖയീദ്, ലേബര് സ്റ്റാന്ഡേര്ഡ്സ് ഡവലപ്മെന്റ് അതോറിറ്റി മേധാവി ഡോ. സലീം യൂസഫ് അല് ക്വസീര്, ഷാര്ജ പോലീസ് സോഷ്യല് ഡിപ്പാര്ട്മെന്റ് മേധാവി ബ്രിഗേഡിയര് ജനറല് അലി സെയ്ഫ് അല് നാദിസ്, ഷാര്ജ ഇന്ത്യന് അസോസിയേഷന് പ്രസിഡന്റ് അഡ്വ. വൈ.എ.റഹിം എന്നിവര് മെയ്ദിനാഘോഷ പരിപാടികള് വിശദീകരിച്ചു.
https://www.facebook.com/Malayalivartha