ടൂറിസ്റ്റ് വിസകള്‍ക്കായി സന്ദര്‍ശകര്‍ക്ക് നേരിട്ട് അപേക്ഷിക്കാന്‍ സാധിക്കും വിധത്തിലുള്ള ഇ-വിസ സംവിധാനത്തിന് ആഭ്യന്തരമന്ത്രാലയം, ഖത്തര്‍ എയര്‍വേയ്‌സ്, ഖത്തര്‍ ടൂറിസം അതോറിറ്റി എന്നിവര്‍ ചേര്‍ന്ന് തുടക്കം കുറിച്ചു. ഇതോടെ ടൂറിസ്റ്റ് വിസ അപേക്ഷ പ്രക്രിയ പുതിയ സംവിധാനം വഴിയാകും പൂര്‍ത്തിയാകുക. നിലവില്‍ പ്രാരംഭ ഘട്ടത്തിലുള്ള ഇ-വിസ സംവിധാനം  www.qatarvisaservice.com എന്ന വെബ്‌സൈറ്റിലാണ് ഉള്‍പ്പെടുത്തിയിട്ടുള്ളത്.

പുതിയ ഇ-വിസ നിലവില്‍ വന്നതോടെ സന്ദര്‍ശകര്‍ക്ക് ഖത്തറിലേക്ക് എത്തുന്നതിനുള്ള നടപടിക്രമങ്ങള്‍ പൂര്‍ത്തീകരിക്കുന്നത് എളുപ്പമാകും. കൂടുതല്‍ കാര്യക്ഷമവും സുതാര്യവുമായ വിസ സേവനം, ന്യായമായ ഫീസുമാണ് ഈടാക്കുന്നത്. ഖത്തര്‍ കേന്ദ്രീകരിച്ചുള്ള അംഗീകൃത ഹോട്ടലുകള്‍ വഴിയോ ടൂര്‍ ഓപറേറ്റര്‍മാര്‍ വഴിയോ ആയിരുന്നു നേരത്തെ ടൂറിസ്റ്റ് വിസക്ക് അപേക്ഷിക്കാന്‍ സാധിച്ചിരുന്നത്.

എന്നാല്‍ പുതിയ രീതിയില്‍ നേരിട്ട് അപേക്ഷിക്കാന്‍ സാധിക്കുന്നതിന് പുറമേ, വിസയുടെ സ്റ്റാറ്റസും ട്രാക്കിംഗും ഓണ്‍ലൈന്‍ വഴി സന്ദര്‍ശകര്‍ക്ക് അറിയാനും സാധിക്കും. സര്‍വീസ് ചാര്‍ജ്ജടക്കം 42 ഡോളറാണ് വിസയുടെ ചാര്‍ജ്ജ്. വിസ കാര്‍ഡോ മാസ്റ്റര്‍കാര്‍ഡോ ഉപയോഗിച്ച് വിസക്ക് പെയ്മന്റ് നടത്താവുന്നതാണ്. പാസ്‌പോര്‍ട്ടിന്റെ സ്‌കാന്‍ കോപ്പി, ഫോട്ടോ, യാത്രക്കാരന്റ വിമാനടിക്കറ്റ്, ഖത്തറില്‍ താമസിക്കുന്ന സ്ഥലത്തെ അഡ്രസ് എന്നിവ വിസക്ക് അപേക്ഷിക്കുന്ന സമയത്ത് അപേക്ഷാ ഫോറത്തോടൊപ്പം നല്‍കണം.

ഖത്തര്‍ എയര്‍വേയ്‌സ് വഴിയുള്ള യാത്രക്കാരാണെങ്കില്‍ ഓട്ടോമാറ്റിക് ടിക്കറ്റ് വാലിഡേഷന്‍ സൗകര്യമുണ്ട്. വിസക്ക് അപേക്ഷിച്ചതിന് ശേഷം പ്രതികരണം 48 മണിക്കൂറിനുള്ളില്‍ അറിയാനും സാധിക്കും. അപേക്ഷകന്റെ വിസ അപേക്ഷ സ്വീകരിച്ച് കഴിഞ്ഞാല്‍ ഉടന്‍ തന്നെ ഉപഭോക്താവിന്റെ സ്വകാര്യ മെയില്‍ അഡ്രസിലേക്ക് വിസയുടെ കോപ്പി എത്തിച്ചേരും.

സന്ദര്‍ശകരുടെ എണ്ണം വര്‍ധിപ്പിക്കുകയെന്ന ലക്ഷ്യത്തോടെയാണ് പുതിയ സര്‍വീസ് ആരംഭിച്ചിരിക്കുന്നതും വിസ നടപടിക്രമങ്ങള്‍ കൂടുതല്‍ സുതാര്യമാക്കിയിട്ടുള്ളതും. ഇത് കൂടാതെ സൗജന്യമായി ഖത്തര്‍ എയര്‍വേയ്‌സിന്റെ നാല് ദിവസത്തെ ട്രാന്‍സിറ്റ് സംവിധാനവും നിലവിലുണ്ട്. ഖത്തര്‍ ടൂറിസം അതോറിറ്റി, ഖത്തര്‍ എയര്‍വേയ്‌സ്, ആഭ്യന്തരമന്ത്രാലയം എന്നിവയുടെ സംയുക്ത സഹകരണത്തിന്റെ ഫലമാണ് പുതിയ ഇ-വിസ സംവിധാനം. കഴിഞ്ഞ വര്‍ഷം സെപ്റ്റംബറിലാണ് ഇത് സംബന്ധിച്ച് കരാറില്‍ എത്തിച്ചേരുന്നത്.