വാറ്റ് പരിമിതപ്പെടുത്താന്‍ കുവൈറ്റ് ആലോചിക്കുന്നു
വാറ്റ് ചില മേഖലകളില്‍ മാത്രം ക്ലിപ്തപ്പെടുത്താന്‍ കുവൈത്ത് ആലോചിക്കുന്നു. അടുത്തവര്‍ഷം ആദ്യം പ്രാബല്യത്തില്‍ വരുംവിധം വാറ്റ് സംവിധാനവുമായി ജിസിസി രാജ്യങ്ങള്‍ മുന്നോട്ടു പോകുന്നുമുണ്ട്. വാറ്റ് വഴി ജിസിസി രാജ്യങ്ങള്‍ക്ക് 25ബില്യണ്‍ ഡോളര്‍ പ്രതിവര്‍ഷ വരുമാനമാണു പ്രതീക്ഷിക്കുന്നത്. യുഎഇ ജനുവരി ഒന്നിന് വാറ്റ് നടപ്പാക്കുമെന്നു പ്രഖ്യാപിച്ചിട്ടുണ്ട്. എന്നാല്‍ ആ തീയതിയില്‍ വാറ്റ് കുവൈത്തില്‍ നടപ്പാകാന്‍ സാധ്യതയില്ലെന്നാണ് ഇപ്പോള്‍ ലഭിക്കുന്ന സൂചന.
വ്യാപാരമേഖലയില്‍ പകുതിയിലേറെയും നികുതി സംവിധാനം നടപ്പാക്കുന്നതിനു തയാറായിട്ടില്ലെന്നാണ് അടുത്തിടെ പുറത്തുവന്ന സര്‍വേ റിപ്പോര്‍ട്ട്. വാറ്റ് ഏര്‍പ്പെടുത്തുന്നതിന്റെ പ്രത്യാഘാതം സ്വദേശികള്‍ക്കും കുറഞ്ഞവരുമാനക്കാര്‍ക്കും ഇല്ലാതാക്കുന്ന നടപടികളെക്കുറിച്ചാണ് ആലോചിക്കുന്നതെന്നു ധനമന്ത്രി അനസ് അല്‍ സാലെ അറിയിച്ചു. വാറ്റ് ഏര്‍പ്പെടുത്തുമ്പോഴുണ്ടാകുന്ന നിഷേധഫലം ഇല്ലാതാക്കുന്നതിനുള്ള ബദല്‍ സംവിധാനം പഠിച്ചുവരികയാണെന്ന് അദ്ദേഹം പറഞ്ഞു.
എണ്ണവിലയിലുണ്ടായ ഇടിവ് കാരണം ഏര്‍പ്പെടുത്തിയ സാമ്പത്തിക പരിഷ്‌കാരങ്ങളില്‍ പ്രയാസപ്പെടുന്ന കുറഞ്ഞവരുമാനക്കാരെ പരിഹരിക്കാതെ മുന്നോട്ടുപോകാന്‍ കഴിയില്ലെന്നാണു പൊതുവികാരം. പെട്രോള്‍ വില വര്‍ധിപ്പിച്ചത് ഉള്‍പ്പെടെയുള്ള നടപടികള്‍ക്കെതിരെ എംപിമാരും മറ്റും രംഗത്തു വന്നിരുന്നു. അഞ്ചുശതമാനം വാറ്റ് ഏര്‍പ്പെടുത്തുന്നതിനാണു ജിസിസി തലത്തില്‍ തീരുമാനമായത്.
https://www.facebook.com/Malayalivartha
