അറഫ സംഗമം നാളെ; മിനാ പ്രാര്ഥനനിര്ഭരം, ഹജ്ജ് തീര്ത്ഥാടകരെ വരവേല്ക്കാന് മിന ഒരുങ്ങി
ഹജ്ജ് തീര്ഥാടകരെ വരവേല്ക്കാന് ഒരുങ്ങിയ മിന ഒരുങ്ങികഴിഞ്ഞു. പ്രാര്ഥനകളില് കഴുകിയെടുത്ത ഹൃദയവുമായി ഹാജിമാര് മിനായിലെ കൂടാരങ്ങളിലേക്ക് എത്തിയതോടെ ഹജ്ജിന് തുടക്കമായി. വ്യാഴാഴ്ച അറഫയില് സംഗമിച്ച് സായുജ്യമടയാനുള്ള മാനസിക തയാറെടുപ്പിലാണ് 20 ലക്ഷത്തിലധികം തീര്ഥാടകര്. ചൊവ്വാഴ്ച രാത്രി മുതല് ഹജ്ജിന്റെ ലളിതവസ്ത്രമണിഞ്ഞ്, ലബ്ബൈക്ക ചൊല്ലി, ഋജുമാനസരായി അവര് കര്മഭൂമിയായ മിനാ താഴ്വരയിലേക്ക് ഒഴുകുകയായിരുന്നു. മലയാളികളുള്പ്പെടെ ഇന്ത്യന് ഹാജിമാര് രാത്രി എട്ടുമണിയോടെയാണ് നീങ്ങിത്തുടങ്ങിയത്.
മിനയില് ഇന്ത്യന് ഹാജിമാര്ക്കുള്ള എല്ലാ സൗകര്യങ്ങളും സജ്ജമായികഴിഞ്ഞു. ഹജ്ജിന്റെ സുപ്രധാന കര്മമായ അറഫ സംഗമം വ്യാഴാഴ്ചയാണ്. ഉപമകളില്ലാത്ത മനുഷ്യമഹാ സംഗമത്തിനാണ് അറഫ മൈതാനം ഒരിക്കല്കൂടി സാക്ഷിയാവുക. അല്ലാഹുവിന്റെ ഇഷ്ടദാസ്യം നേടാനുള്ള തേട്ടവുമായാണ് ഓരോ തീര്ഥാടകനും ദൈവത്തിന്റെ ദര്ബാറില് ഹാജരാവുക.
ചരിത്രമുറങ്ങുന്ന ജബലുര്റഹ്മയുടെ താഴ്വാരം അല്ലാഹുവിന്റെ വിരുന്നുകാരുടെ മിഴിനീരില് കുതിര്ന്ന പ്രാര്ഥനകള്ക്ക് കാതോര്ക്കുകയാണ്. അറഫ കഴിഞ്ഞ് ഒരു രാത്രി മുസ്ദലിഫയില് ചെലവഴിച്ച്, വീണ്ടും നാലു ദിവസം മിനായിലെ തമ്പുകളില് താമസിച്ചാണ് ഹാജിമാര് മറ്റു കര്മങ്ങള് പൂര്ത്തിയാക്കുക.
ഇത്തവണ കഴിഞ്ഞ വര്ഷത്തെക്കാള് നാലു ലക്ഷത്തിലേറെ വിദേശ ഹാജിമാര് അധികമുണ്ട് എന്ന് സൗദി പാസ്പോര്ട്ട് വിഭാഗം മേധാവി വ്യക്തമാക്കിയിരുന്നു. 9,30,000 പുരുഷന്മാരും 8,04,000 വനിതകളുമാണ് വിദേശ രാജ്യങ്ങളില്നിന്ന് ബുധനാഴ്ച ഉച്ചവരെ ഹജ്ജിന് എത്തിയത്. ഇന്ത്യന് ഹജ്ജ് സൗഹൃദസംഘത്തില് കേന്ദ്ര വിദേശകാര്യ സഹമന്ത്രി എം.ജെ. അക്ബറും ബി.ജെ.പി വക്താവ് സയ്യിദ് മുസഫര് ഇസ്ലാമും മക്കയിലെത്തിയിട്ടുണ്ട്്.
https://www.facebook.com/Malayalivartha