പുതിയ പരിഷ്‌ക്കാരവുമായി റിയാദിലെ ഇന്ത്യന്‍ എംബസി. ഏപ്രില്‍ ഒന്ന്​ മുതല്‍ ഇന്ത്യൻ പാസ്​പോര്‍ട്ട്​ എടുക്കാനും പുതുക്കാനും തിരുത്തലുകൾക്കും പുതിയത്​ കൂട്ടിച്ചേര്‍ക്കാനും പുതിയ അപേക്ഷ ഫോറം. ഇതിനെല്ലാംകൂടി ഈ ഒരു അപേക്ഷാഫോറം മതി. പാസ്​പോര്‍ട്ടിലെ പേര്​ മാറ്റല്‍, ഭാര്യ/ഭര്‍ത്താവി​ന്റെ പേര്​ ചേര്‍ക്കല്‍/ഒഴിവാക്കല്‍​/തിരുത്തല്‍, മാതാപിതാക്കളുടെ പേര്​ തിരുത്തല്‍, ജനന തീയതി/ജനന സ്ഥലം തിരുത്തല്‍, ഫോട്ടോ​/ വിലാസം​/ഒപ്പ്​​ മാറ്റല്‍, ഇ.സി.ആര്‍ പദവി​ മാറ്റല്‍ എന്നീ സേവനങ്ങള്‍ക്ക്​​ പ്രത്യേക ഫോറങ്ങള്‍ കൂടി അനുബന്ധമായി നല്‍കണമായിരുന്നു.

പൊതുവായ അപേക്ഷയും ഇൗ അനുബന്ധ ഫോറങ്ങളും ചേര്‍ത്ത്​ വലിയ ഫയല്‍ തന്നെ ഹാജരാക്കേണ്ട സ്ഥിതിയാണ്​ നിലവിലുണ്ടായിരുന്നത്​. ഇതിനാണ്​​ ഇപ്പോള്‍ മാറ്റം വരുത്തിയിരിക്കുന്നത്​. എല്ലാ സേവനങ്ങള്‍ക്കും ഒറ്റ ഫോറം ഉപയോഗിച്ചാല്‍ മതി. ഏപ്രില്‍ ഒന്നു മുതല്‍ പുതിയ ​ഫോറത്തിലുള്ള അപേക്ഷ മാത്രമേ സ്വീകരിക്കൂ. എന്നാല്‍ ഇൗയാഴ്​ച മുതല്‍ തന്നെ പുതിയ ഫോറത്തിലുള്ള അപേക്ഷയും സ്വീകരിച്ചുതുടങ്ങിയിട്ടുണ്ട്​. പുതിയ ​അപേക്ഷ ഫോറം ഇന്ത്യന്‍ എംബസിയുടെ www.indianembassy.org.sa/consular/passport/reissue-of-the-passport എന്ന വെബ്​സൈറ്റില്‍ നിന്ന്​ ഡൗണ്‍ലോഡ്​ ചെയ്​ത്​ ഉപയോഗിക്കാം.

അപേക്ഷ ഫോറത്തി​ന്റെ തുടക്കത്തില്‍ തന്നെ ഏതൊക്കെ സേവനങ്ങള്‍ക്കാണ്​ ഇൗ ഫോറം ഉപയോഗിക്കുന്നത്​ എന്ന്​ അടയാളപ്പെടുത്താനുള്ള കള്ളികളുണ്ട്​. ഇതാണ്​ ഫോറത്തിലെ പ്രധാന മാറ്റം. ഏതൊക്കെ സേവനങ്ങള്‍ വേണമെന്ന്​ കള്ളികളില്‍ ശരി അടയാളമിട്ട്​ രേഖപ്പെടുത്താം. എമിഗ്രേഷന്‍ ക്ലിയറന്‍സ്​ ആവശ്യമുള്ള (ഇ.സി.ആര്‍) വിഭാഗത്തില്‍ പെടുന്നവര്‍ വിദേശ രാജ്യത്ത്​ മൂന്നുവര്‍ഷത്തില്‍ കൂടുതല്‍ താമസിച്ചാല്‍ എമിഗ്രേഷന്‍ ക്ലിയറന്‍സ്​ ആവശ്യമില്ലാത്ത (ഇ.സി.എന്‍.ആര്‍) വിഭാഗത്തിലേക്ക്​ മാറും.