യുഎഇയില് നിക്ഷേപകര്ക്കും, ആരോഗ്യം, ശാസ്ത്രം തുടങ്ങിയ വിവിധ മേഖലകളിലെ വിദഗ്ദ്ധര്ക്കും വിദ്യാഭ്യാസ മേഖലയില് അസാമാന്യ കഴിവ് തെളിയിച്ച വിദ്യാര്ത്ഥികള്ക്കും ഇനി 10 വര്ഷത്തേക്ക് വിസ
നിക്ഷേപകര്ക്കും ഡോക്ടര്മാര്, എഞ്ചിനീയര്മാര് തുടങ്ങിയ വിദഗ്ദ്ധ തൊഴിലാളികള്ക്കും അവരുടെ കുടുംബങ്ങള്ക്കും 10 വര്ഷത്തേക്ക് റെസിഡന്സ് വിസ അനുവദിക്കുമെന്ന് യു.എ.ഇ പ്രധാനമന്ത്രിയും ദുബായ് ഭരണാധികാരിയുമായ ഷെയ്ക് മുഹമ്മദ് ബിന് റാഷിദ് അല് മഖ്തൂം അറിയിച്ചു. ഇത് കൂടാതെ ഉയര്ന്ന നിലവാരം പുലര്ത്തുന്ന വിദ്യാര്ത്ഥികള്ക്കും 10 വര്ഷത്തേക്ക് വിസ അനുവദിക്കാന് ഇന്ന് ചേര്ന്ന മന്ത്രിസഭാ യോഗം തീരുമാനിച്ചു.
വിദേശ നിക്ഷേപകര്ക്ക് യു.എ.ഇയിലെ തങ്ങളുടെ സംരംഭങ്ങളില് നൂറ് ശതമാനം ഉടമസ്ഥാവകാശം നല്കുമെന്നും അദ്ദേഹം കൂട്ടിച്ചേര്ത്തു. ആരോഗ്യം, ശാസ്ത്രം, ഗവേഷണം, സാങ്കേതികം തുടങ്ങിയ മേഖലകളിലെ വിദഗ്ദ്ധര്ക്കും വിദ്യാഭ്യാസ മേഖലയില് അസാമാന്യ കഴിവ് തെളിയിച്ച വിദ്യാര്ത്ഥികള്ക്കുമാണ് 10 വര്ഷത്തെ വിസ അനുവദിക്കുന്നത്. തീരുമാനം ഈ വര്ഷം അവസാനത്തോടെ നടപ്പിലാക്കാന് ഷെയ്ക് മുഹമ്മദ് ബിന് റാഷിദ് എല്ലാ സര്ക്കാര് ഏജന്സികള്ക്കും നിര്ദ്ദേശം നല്കിയിട്ടുണ്ട്. ഇത്തരക്കാരുടെ നിലവിലെ വിസാ കാലാവധി അടക്കമുള്ള കാര്യങ്ങള് പരിശോധിക്കാനും നിര്ദ്ദേശമുണ്ട്.
യൂണിവേഴ്സിറ്റി പഠനം പൂര്ത്തിയാക്കിയ ശേഷം മാതാപിതാക്കളുടെ സ്പോണ്സര്ഷിപ്പില് നില്ക്കുന്നവര്ക്ക് താമസ വിസ നല്കുന്നത് പരിശോധിക്കും. യു .എ.ഇ.യുടെ തുറന്ന അന്തരീക്ഷം ,സഹിഷ്ണുത, മൂല്യങ്ങള്, നിയമനിര്മ്മാണം തുടങ്ങി നിരവധി ഘടകങ്ങളാണ് ആഗോളതലത്തില് നിക്ഷേപമാകര്ഷിക്കാന് സഹായമാകുന്നതെന്നും സ്വപ്നങ്ങള് സാക്ഷാത്കരിക്കാനുള്ള അവസരങ്ങളുടെ നാടായി യു.എ.ഇ തുടരുമെന്നും ഷെയ്ക് മുഹമ്മദ് ബിന് റാഷിദ് ട്വിറ്ററിലൂടെ വ്യക്തമാക്കി. നിക്ഷേപകരുടെ പ്രിയപ്പെട്ട ലക്ഷ്യസ്ഥാനമാക്യും , പ്രതിഭകളുടെ ക്രിയാത്മകമായ കഴിവുകള്ക്ക് വേദിയായും യു.എ.ഇയെ മാറ്റുകയാണ് ലക്ഷ്യമെന്നും അദ്ദേഹം കൂട്ടിച്ചേര്ത്തു.
"
https://www.facebook.com/Malayalivartha