പെരുന്നാൾ ആഘോഷിച്ച് ബഹ്റൈൻ നിവാസികൾ
മനാമ: ബഹ്റൈനില്‍ രാജ്യവ്യാപകമായി രാവിലെ 5.05 ന് വിവിധ ഇൗദ് ഗാഹുകളിലും മസ്ജിദുകളിലും ചെറിയ പെരുന്നാള്‍ നമസ്കാരം നടന്നു. അല്‍ സാകിര്‍ കൊട്ടാരത്തിലെ മസ്ജിദില്‍ നടന്ന നമസ്ക്കാരത്തിന് രാജാവ് ഹമദ് ബിന്‍ ഇൗസ ആല്‍ ഖലീഫ നേതൃത്വം നല്‍കി.
പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ ഖലീഫയുടെയും കിരീടാവകാശിയും ഒന്നാം പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് ആല്‍ എന്നിവരും മറ്റ് പ്രമുഖരും നമസ്കാരത്തില്‍ പങ്കെടുത്തു.
തുടര്‍ന്ന് ഏവര്‍ക്കും ഹമദ് രാജാവ് ഇൗദ് ആശംസകള്‍ നേര്‍ന്നു. രാജ്യത്തിന്റെ വിവിധ ഭാഗങ്ങളില്‍ സുന്നീ വഖഫ് ഡയറക്ടറേറ്റ് ഈദ് ഗാഹുകള്‍ സംഘടിപ്പിച്ചിരുന്നു. മുഹറഖ് മഖ്ബറക്ക് സമീപമുള്ള ഗ്രൗണ്ട്, ഹമദ് ടൗണ്‍ സൂഖ് വാഖിഫിന് സമീപമുള്ള ഗ്രൗണ്ട്, ഹമദ് ടൗണ്‍ 17മത് റൗണ്ട് എബൗട്ടിന് സമീപമുള്ള ഗ്രൗണ്ട് എന്നിവിടങ്ങളില്‍ ഇൗദ് ഗാഹുകളും എല്ലാ ജുമുഅത്ത് പള്ളികളിലും പെരുന്നാള്‍ നമസ്കാരവും നടന്നു. മലയാളി സംഘടനകളുടെ നേതൃത്വത്തില്‍ വിവിധ സ്ഥലങ്ങളില്‍ ഇൗദ് ഗാഹ് സംഘടിപ്പിക്കപ്പെട്ടു.
https://www.facebook.com/Malayalivartha
