വിശുദ്ധിയുടെ നിറവില് കുവൈത്ത് ഈദുല് ഫിത്ര് ആഘോഷിച്ചു
കുവൈത്ത്: ഒരു മാസം നീണ്ട വ്രതാനുഷ്ഠാനം സമ്മാനിച്ച വിശുദ്ധിയുടെ നിറവില് രാജ്യത്തെ മുസ്ലിംകള് ഈദുല് ഫിത്ര് ആഘോഷിച്ചു. ആത്മസമര്പ്പണത്തിന്റെ ചൈതന്യം നിറഞ്ഞ 29 രാപ്പകലുകള്ക്കുശേഷം വെള്ളിയാഴ്ച പുലര്ന്നതു തന്നെ തക്ബീര് ധ്വനികളുടെ മുഴക്കത്തിലേക്കായിരുന്നു. രാജ്യത്തിന്റെ വിവിധ ഭാഗങ്ങളിലെ പള്ളികളില് പെരുന്നാള് നമസ്കാരങ്ങള് അരങ്ങേറി.
പ്രത്യേക സുരക്ഷാ സാഹചര്യം മുന്നിര്ത്തി ഈദ്ഗാഹുകള്ക്ക് സര്ക്കാര് നിയന്ത്രണമേര്പ്പെടുത്തിയതിനാല് ഇത്തവണയും പള്ളികളില് മാത്രമായിരുന്നു പെരുന്നാള് നമസ്കാരം. വിവിധ പള്ളികളില് മലയാളി കൂട്ടായ്മകളുടെ ആഭിമുഖ്യത്തിലും പെരുന്നാള് നമസ്കാരങ്ങള് അരങ്ങേറി. റമദാനിലെ ത്യാഗനിര്ഭരമായ ജീവിതത്തിലൂടെ നേടിയെടുത്ത ജീവിത വിശുദ്ധി തുടര്ജീവിതത്തിലും കൈമോശം വരാതെ സൂക്ഷിക്കാന് ഖതീബുമാര് വിശ്വാസികളെ ഉണര്ത്തി.
സ്നേഹത്തിന്റെയും സാഹോദര്യത്തിന്റെയും കാരുണ്യത്തിന്റെയും സന്ദേശമാണ് പെരുന്നാള് മുന്നോട്ടുവെക്കുന്നതെന്നും അവര് കൂട്ടിച്ചേര്ത്തു. പെരുന്നാള് ദിനത്തിലും ലോകത്തിന്റെ വിവിധ ഭാഗങ്ങളില് ദുരിതമനുഭവിക്കുന്നവര്ക്ക് ഐക്യദാര്ഢ്യം പ്രകടപ്പിക്കാനും ഖതീബുമാര് മറന്നില്ല.
കേരള ഇസ്ലാമിക് ഗ്രൂപ്പിന്റെ ആഭിമുഖ്യത്തില് വിവിധ പള്ളികളില് മലയാളം ഖുതുബയോടെ പെരുന്നാള് നമസ്കാരം നടന്നു. അബ്ബാസിയ മസ്ജിദ് ഉവൈദ് അല് മുതൈരി (അനീസ് ഫാറൂഖി), സാല്മിയ മസ്ജിദ് ആയിശ (ഫൈസല് മഞ്ചേരി), ഫഹാഹീല് ബലദിയ മസ്ജിദ് (എസ്. എം.ബഷീര്), ഫര്വ്വാനിയ മസ്ജിദ് നിസാല് (സക്കീര് ഹുസൈന് തുവ്വൂര്), കുവൈത്ത് സിറ്റി മസ്ജിദ് ഗര്ബലി (നിയാസ് ഇസ്ലാഹി), മഹ്ബൂല മസ്ജിദ് റഹ്മാന് (ഇ.എം. സിദ്ദീഖ് ഹസന്), റിഗ്ഗഇ മസ്ജിദ് സഹവ് അല് മുതൈരി (മുഹമ്മദ് ഹാറൂണ്) എന്നിവര് നേതൃത്വം നല്കി.
ലോകകപ്പ് ഫുട്ബാള് മത്സരം കൂട്ടമായി കണ്ട് ആസ്വദിക്കുന്നതായിരുന്നു ഇത്തവണത്തെ പ്രധാന വിനോദം. വലിയ സ്ക്രീനില് കളി കാണാന് പലയിടത്തും സൗകര്യം ഒരുക്കിയിരുന്നു. ഇതിനിടയിലും ബന്ധുക്കളെയും സുഹൃത്തുക്കളെയും സന്ദര്ശിച്ച് ആശംസ കൈമാറാനും എല്ലാവരും സമയം കണ്ടെത്തി. നാട്ടിലെ ബന്ധുക്കളെയും സുഹൃത്തുക്കളെയും വിളിച്ച് പെരുന്നാള് ആശംസകള് കൈമാറാനും മറന്നില്ല. നാടാകെ ഫുട്ബാള് ലഹരിയിലായതിനാല് ഇൗദ് സംഗമങ്ങള് ഇത്തവണ കാര്യമായി നടന്നില്ല. അടുപ്പിച്ച് കിട്ടിയ അവധി മുതലാക്കി നാട്ടിലേക്ക് പറന്നവരും ഏറെയാണ്.
https://www.facebook.com/Malayalivartha