മുറിച്ചുമാറ്റിയ കാല് ജീവിതത്തിന്റെ ഭാഗമാക്കിയ പെണ്കുട്ടി
ക്രിസ്റ്റി ലോയല് എന്ന 25 വയസ്സുകാരി പോകുന്നിടത്തെല്ലാം തന്റെ മുറിച്ചുമാറ്റിയ കാലുംകൊണ്ടാണ് പോകുന്നത്. ഇന്സ്റ്റഗ്രാമില് വണ്ഫൂട്ട് വണ്ടര് എന്ന പേരില് അക്കൗണ്ട് തുടങ്ങിയതോടെയാണ് ക്രിസ്റ്റിയുടെ കഥ ലോകമറിഞ്ഞത്. പലമുറുമുറുപ്പുകള് ഉയര്ന്നെങ്കിലും ക്രിസ്റ്റി ലോയല് തളര്ന്നില്ല. ഊണിലും ഉറക്കത്തിലും അവള് ആ കാല് കൈയില് കരുതി. അപൂര്വമായ അര്ബുദരോഗം വളരെപ്പെട്ടന്നു തന്നെ കാലുകളെ തട്ടിയെടുക്കുമെന്നറിഞ്ഞിട്ടും അവള് പരമാവധി ശ്രമിച്ചു.
കാല് മുറിച്ചു കളയാതിരിക്കാന് പറ്റുമോയെന്ന് ഡോക്ടര്മാരോട് കെഞ്ചി. നാലുവര്ഷത്തോളം അവളുടെ കാലുകളെ ചികിത്സയിലൂടെ ഡോക്ടര്മാര് സംരക്ഷിച്ചു. പക്ഷെ രോഗം മറ്റു ശരീരഭാഗങ്ങളിലേക്കും പടരാന് തുടങ്ങിയപ്പോള് അവര് കാല് മുറിച്ചു കളയാന് തന്നെ തീരുമാനിച്ചു. സങ്കടത്തോടെയാണെങ്കിലും പക്ഷെ ഒരു ഉപാധിയോടെ മാത്രം അവള് അതിന് സമ്മതം മൂളി. തന്റെ വലതുകാല് മുറിച്ചോളൂ പക്ഷെ അതെനിക്കു തിരിച്ചു നല്കണം. അവള്ക്കു നല്കിയ വാക്ക് അവര് പാലിച്ചു.
ഒരുമാസത്തിനു ശേഷം എപ്പിത്തീലിയോയ്ഡ് സര്ക്കോമ എന്ന അര്ബുദം രോഗം ബാധിച്ച കാലുകള് ആശുപത്രിയിലെ പതോളജി വിഭാഗം അവള്ക്കു തിരിച്ചുനല്കി. ഒപ്പം കൊണ്ടുനടക്കാന് പാകത്തില് ആ കാലിന്റെ രൂപം മാറ്റുന്നതിനായി അവള് അത് ഓസ്റ്റിയോളജി മ്യൂസിയത്തില് ഏല്പിച്ചു. എല്ലുകളൊന്നും തകര്ന്നുപോകാതെ കാലിന്റെ അസ്ഥികൂടം അവര് അവളെ തിരികെയേല്പിച്ചു. അന്നുമുതല് ഇന്നുവരെ ഓരോനിമിഷത്തിലും ആ കാല് അവളുടെയൊപ്പമുണ്ട്.
https://www.facebook.com/Malayalivartha