Widgets Magazine
27
Apr / 2017
Thursday

പാകിസ്താനില്‍ ന്യുനപക്ഷമായ ഹിന്ദുക്കളുടെ വിവാഹം സംബന്ധിച്ച് പ്രത്യേക നിയമം നിലവില്‍ വന്നു

20 MARCH 2017 03:01 PM IST
മലയാളി വാര്‍ത്ത

പാകിസ്താനില്‍ ന്യുനപക്ഷമായ ഹിന്ദുക്കളുടെ വിവാഹം സംബന്ധിച്ച് പ്രത്യേക നിയമം നിലവില്‍ വന്നു. പ്രസിഡന്റ് മാമൂണ്‍ ഹുസൈന്‍ ഒപ്പുവച്ചതോടെയാണ് ഹിന്ദു വിവാഹ വ്യക്തിനിയമം പ്രാബല്യത്തില്‍ വന്നത്. ബില്ലിന് അംഗീകാരം ലഭിച്ചതോടെ ഹിന്ദു മതാചാരപ്രകാരമുള്ള വിവാഹങ്ങള്‍ നിയമപ്രാബല്യം ലഭിക്കും.

ഹിന്ദു കുടുംബങ്ങളുടെ അവകാശങ്ങളും താല്‍പര്യങ്ങളും സംരക്ഷിക്കുന്നതിനും വിവാഹങ്ങളും കുടുംബങ്ങളെയും കുട്ടികളെയും അമ്മമാരേയും അംഗീകരിക്കുന്നതിനും നിയമം ഗുണം ചെയ്യുമെന്ന് പ്രധാനമന്ത്രി നവാസ് ഷെരീഫിന്റെ ഓഫീസ് വ്യക്തമാക്കി.

വിവാഹങ്ങള്‍ രജിസ്റ്റര്‍ ചെയ്യാന്‍ പ്രത്യേക ഓഫീസുകള്‍ തുറക്കണമെന്നും ബില്ലില്‍ വ്യവസ്ഥ ചെയ്യുന്നു. പുതിയ നിയമത്തിന്റെ ഭാഗമായി രജിസ്‌ട്രേഷനും മറ്റു കാര്യങ്ങള്‍ക്കുമായി ആവശ്യമായ സ്ഥലങ്ങളിലെല്ലാം പ്രത്യേക രജിസ്ട്രാറെ നിയമിക്കും. ഹിന്ദു വിഭാഗങ്ങള്‍ കൂടുതലുള്ള മേഖലയിലായിരിക്കും ഇതെന്നും പ്രധാനമന്ത്രി അറിയിച്ചു.
പാകിസ്താനില്‍ താമസിക്കുന്ന ഹിന്ദു കുടുംബങ്ങളുടെ വിവാഹം ദൃഢമാക്കുന്നതിനുള്ള ശക്തമായ നിയമമാണിത്. രാജത്തെ ന്യൂനപക്ഷ വിഭാഗങ്ങള്‍ക്കെല്ലാം തുല്യ അവകാശങ്ങള്‍ നല്‍കുന്നതിലാണ് സര്‍ക്കാരിന്റെ ശ്രമമെന്നും പ്രധാനമന്ത്രിയുടെ ഓഫീസ് അറിയിച്ചു.

വിവാഹവുമായി ബന്ധപ്പെട്ട നഷ്ടപരിഹാരത്തിനുള്ള അവകാശങ്ങള്‍, കോടതി വഴിയുള്ള വിവാഹമോചനം, നിയമപരവും അല്ലാത്തതുമായി വിവാഹങ്ങള്‍, വിവാഹം അസാധുവാക്കല്‍, പുനര്‍വിവാഹം, ഭാര്യയുടേയും കുട്ടികളുടേയും സാമ്പത്തിക ഭദ്രത, ഉഭയസമ്മതത്തോടെയുള്ള വിവാഹമോചനം തുടങ്ങിയവയുമായി ബന്ധപ്പെട്ട കാര്യങ്ങളും നിയമത്തില്‍ ഉള്‍പ്പെടുത്തിയിട്ടുണ്ട്. നിയമം ലംഘിക്കുന്നവര്‍ക്ക് തടവുശിക്ഷയും ഒരു ലക്ഷം രൂപയും പിഴയും ചുമത്താനും നിയമത്തില്‍ വ്യവസ്ഥ ചെയ്യുന്നു. ഇത്തരം കുറ്റകൃത്യങ്ങള്‍ ജില്ലാ മജിസ്‌ട്രേറ്റ് കോടതിയിലായിരിക്കും പരിഗണിക്കേണ്ടത്.

നാഷണല്‍ അസംബ്ലി ഈ മാസം പത്തിന് ഐക്യകണേ്ഠനയാണ് ബില്‍ പാസാക്കിയത്. സെനറ്റ് നിര്‍ദേശിച്ച ഭേദഗതികളും നിയമത്തില്‍ ഉള്‍പ്പെടുത്തിയിട്ടുണ്ട്. സിന്ധ് പ്രവിശ്യ ഒഴികെ പാകിസ്താനില്‍ എല്ലായിടത്തും ഈ നിയമം ബാധകമായിരിക്കും. പ്രത്യേക ഹിന്ദു വിവാഹ നിയമമുള്ളതിനാലാണ് സിന്ധിനെ നിയമത്തിന്റെ പരിധിയില്‍ നിന്നും ഒഴിവാക്കിയത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്‌ബുക്ക്‌ പേജ് LIKE ചെയ്യുക
https://www.facebook.com/Malayalivartha
Latest News
Most Read
Malayali Vartha Recommends
MalayaliVartha_300x250_GL