പസഫിക്കില് അമേരിക്ക ഭൂഖണ്ഡാന്തര അണ്വായുധ മിസൈല് വിക്ഷേപിച്ചു
അണ്വായുധ പരീക്ഷണങ്ങളില് നിന്ന് പിന്നോട്ടില്ലെന്ന് ഉത്തരകൊറിയ വീണ്ടും വ്യക്തമാക്കിയതോടെ അമേരിക്കന് സേനയുടെ സന്നാഹങ്ങള് തുടരുകയാണ്. സിഎന്എന് ചാനലിനു നല്കിയ അഭിമുഖത്തിലും ആണവ പരീക്ഷണങ്ങളില് നിന്ന് വിട്ടുനില്ക്കില്ലെന്നാണ് ഉത്തരകൊറിയയുടെ വക്താവ് അറിയിച്ചത്. ഇതോടെ യുദ്ധക്കപ്പലുകളും മിസൈലുകളും സജ്ജമാക്കുന്നതിന്റെ തിരക്കിലാണ് അമേരിക്കന് സേന.
അമേരിക്കന് നാവികസേനയുടെ അഭ്യാസപ്രകടത്തിന്റെ ഭാഗമായി കഴിഞ്ഞ ദിവസം ദക്ഷിണ പസഫിക്കില് ഭൂഖണ്ഡാന്തര മിസൈല് (ഐസിബിഎം) പരീക്ഷിച്ചു. നാലായിരം മൈല് സഞ്ചരിക്കാന് ശേഷിയുള്ള മിസൈലാണ് പരീക്ഷിച്ചത്. കലിഫോര്ണിയയില് നിന്നു വിക്ഷേപിച്ച മിസൈല് പതിച്ചത് ദക്ഷിണ പസഫിക്കിലാണ്. യുഎസ് വ്യോമസേനയാണ് പരീക്ഷണം നടത്തിയത്. എന്നാല് ഏതു വിഭാഗത്തിലുള്ള മിസൈലാണ് വിക്ഷേപിച്ചതെന്ന് ഔദ്യോഗികമായി വെളിപ്പെടുത്തിയിട്ടില്ല.
അണ്വായുധം വഹിക്കാന് ശേഷിയുള്ള മിസൈല് ആയുധം ഘടിപ്പിക്കാതെയാണ് പരീക്ഷണം നടത്തിയത്. ഘഏങ30 മിനുറ്റ്മാന് എന്ന മിസൈലാണ് പരീക്ഷിച്ചതെന്നും റിപ്പോര്ട്ടുകളുണ്ട്. എന്നാല് ഈ പരീക്ഷണം മാസങ്ങള്ക്കു മുന്പെ തീരുമാനിച്ചതാണെന്നും നിലവിലെ പ്രശ്നങ്ങളുമായി ബന്ധമില്ലെന്നും യുഎസ് വ്യോമസേന വക്താവ് അറിയിച്ചു. ഈ പരീക്ഷണം ഉപേക്ഷിച്ചിരുന്നു എങ്കില് അത് മറ്റൊരു വലിയ വാര്ത്തയാകുമായിരുന്നു എന്നും അദ്ദേഹം പറഞ്ഞു. അമേരിക്കന് വ്യോമസേനയുടെ കൈവശം 450 മിനുറ്റ്മാന് 3 മിസൈലുകളുണ്ട്.
https://www.facebook.com/Malayalivartha