പാകിസ്താനി ഭര്ത്താവിന്റെ പീഡനത്തില് നിന്ന് മോചനം; ഉസ്മ ഇന്ത്യയില് തിരിച്ചെത്തി
വിവാദങ്ങള്ക്കവസാനമിട്ട് ഉസ്മ ഇന്ത്യയിലെത്തി. പാകിസ്താനി ഭര്ത്താവിന്റെ പീഡനത്തില് നിന്ന് ഇന്ത്യക്കാരിക്ക് മോചനം. തോക്ക് ചൂണ്ടി ഭീഷണിപ്പെടുത്തി വിവാഹം കഴിച്ച പാകിസ്താനി പൗരനില് നിന്ന് രക്ഷപ്പെട്ട ഡല്ഹി സ്വദേശിനി ഉസ്മ നാട്ടില് തിരിച്ചെത്തി. ഇന്നു രാവിലെയാണ് വാഗാ അതിര്ത്തി വഴി ഉസ്മ ഇന്ത്യയില് എത്തിയത്. ഇസ്ലാമാബാദ് ഹൈക്കോടതി ഉസ്മയ്ക്ക് നാട്ടിലേക്ക് മടങ്ങാന് ഇന്നലെ അനുമതി നല്കിയിരുന്നു.
ഉസ്മയ്ക്ക് വാഗാ അതിര്ത്തി വരെ പാകിസ്താന് പോലീസ് സംരക്ഷണം നല്കിയിരുന്നു. ഇന്ത്യന് ഹൈക്കമ്മീഷനിലെ ഉദ്യോഗസ്ഥരും ഇവരെ അനുഗമിച്ചു. അതിര്ത്തിയില് ഇന്ത്യന് ഉദ്യോഗസ്ഥര്ക്ക് ഉസ്മയെ കൈമാറി. വൈകാതെ ഇവരെ ഡല്ഹിയിലേക്ക് കൊണ്ടുവരും. ഭര്ത്താവിന്റെ പിടിയില് നിന്നും രക്ഷപ്പെട്ട ഉസ്മ പാകിസ്താനിലെ ഇന്ത്യന് ഹൈക്കമ്മീഷനില് അഭയം തേടിയിരിക്കുകയായിരുന്നു.
ഉസ്മയെ സ്വാഗതം ചെയ്ത് വിദേശകാര്യമന്ത്രി സുഷ്മ സ്വരാജ് ട്വീറ്റ് അയച്ചു. ''ഇന്ത്യയുടെ മകള്ക്ക് സ്വദേശത്തേക്ക് സ്വാഗതം, നീ കടന്നുപോയ ദുരിതങ്ങളില് തനിക്ക് വിഷമമുണ്ടെന്നും'' സുഷ്മ ട്വീറ്റ് സന്ദേശത്തില് പറയുന്നു.
മലേഷ്യയില് വച്ച് പരിചയപ്പെട്ട പാകിസ്താനിയായ തഹിര് അലിയാണ് ഉസ്മയെ ഭീഷണിപ്പെടുത്തി വിവാഹം കഴിച്ചത്. അലിയെ കാണാന് ഈ മാസം ആദ്യമായാണ് ഉസ്മ പാകിസ്താനില് എത്തിയത്. ഇയാള് മുന്പ് വിവാഹിതനും മൂന്നു കുട്ടികളുടെ പിതാവുമാണെന്ന കാര്യം മറച്ചുവെച്ചാണ് ഉസ്മയുമായി പ്രണയത്തിലാണത്. വിവാഹത്തെ എതിര്ത്തപ്പോള് ഭീഷണിപ്പെടുത്തി. തുടര്ന്ന് ക്രൂരമായ പീഡനവും ഉപദ്രവവും ഇവര്ക്ക് നേരിടേണ്ടിവന്നു. യാത്രാരേഖകളും ഇയാള് കൈക്കലാക്കി. ഇതോടെ വീട്ടില് നിന്നും രക്ഷപ്പെട്ട ഉസ്മ ഇന്ത്യന് ഹൈക്കമ്മീഷനില് അഭയം തേടുകയും കോടതിയെ സമീപിക്കുകയുമായിരുന്നു
https://www.facebook.com/Malayalivartha