സിറിയയിലെ ഇസ്ലാമിക് സ്റ്റേറ്റിന്റെ കേന്ദ്രങ്ങള്ക്കുനേരെ ഇറാന്റെ മിസൈല് ആക്രമണം
സിറിയയില് ഭീകരസംഘടനയായ ഇസ്ലാമിക് സ്റ്റേറ്റിന്റെ (ഐഎസ്) കേന്ദ്രങ്ങള്ക്കെതിരെ ഇറാന്റെ മിസൈല് ആക്രമണം. പരമോന്നത നേതാവ് ആയത്തുല്ല അലി ഖമനയി നല്കിയ ഉത്തരവ് അനുസരിച്ച് ഞായര് രാത്രി പടിഞ്ഞാറന് ഇറാനില്നിന്നു സിറിയയിലെ ദെയ്ര് അല് സൗര് പ്രവിശ്യയില് ഇറാന്റെ റെവല്യൂഷണറി ഗാര്ഡുകള് മിസൈല് ആക്രമണം നടത്തിയിരുന്നു.
ആറു മധ്യദൂര മിസൈലുകളാണ് ഇറാന് വര്ഷിച്ചത്. വര്ഷങ്ങള്ക്കുശേഷം ആദ്യമായാണ് ഇതുപോലൊരു ആക്രമണം ഇറാന്റെ ഭാഗത്തുനിന്ന് ഉണ്ടാകുന്നത്. അതേസമയം, ഇറാന്റെ മിസൈല് ആക്രമണം സുപ്രീം നാഷനല് സെക്യൂരിറ്റി കൗണ്സിലിന്റെ ഉത്തരവാണെന്ന പ്രസിഡന്റ് ഹസ്സന് റൂഹാനിയുടെ പ്രസ്താവനയ്ക്കു ഘടകവിരുദ്ധമാണ്.
ഖമനയിയുടെ ഉത്തരവാണു മിസൈല് ആക്രമണത്തിനു പിന്നിലെന്നാണു റെവലൂഷണറി ഗാര്ഡുകള് ഇപ്പോള് അറിയിച്ചിരിക്കുന്നത്. രണ്ടാഴ്ച മുന്പ് ഇറാന്റെ തലസ്ഥാനമായ ടെഹ്റാനില് നടത്തിയ ഭീകരാക്രമണത്തിനു ശക്തമായ മറുപടിയായാണ് ആക്രമണമെന്നു മുതിര്ന്ന ഗാര്ഡ് കമാന്ഡര്മാര് തിങ്കളാഴ്ച അറിയിച്ചിരുന്നു.
ഖമനയിയുടെ നേരിട്ടുള്ള ഇടപെടല് സംഭവത്തിന്റെ പ്രാധാന്യം വര്ധിപ്പിക്കുന്നു. സിറിയയിലെ ആഭ്യന്തര യുദ്ധത്തില് ബഷാര് അല് അസ്സദ് സര്ക്കാരിനെ പിന്തുണയ്ക്കുന്ന നിലപാടാണ് ഇറാന് എന്നും സ്വീകരിച്ചിരുന്നത്. അതിന്റെ ഭാഗമായി വിമതരോടും ഐഎസ് ഭീകരരോടുമുള്ള സിറിയന് സര്ക്കാരിന്റെ നടപടികള്ക്ക് ഇറാന് പൂര്ണ പിന്തുണ നല്കിയിരുന്നു.
https://www.facebook.com/Malayalivartha