സൗദി ഉള്പ്പെടെയുള്ള രാജ്യങ്ങള് മുന്നോട്ടുവച്ച 13 ഉപാധികള് തള്ളി ഖത്തര്
പ്രതിസന്ധി പരിഹരിക്കുന്നതിനായി സൗദി അറേബ്യ ഉള്പ്പെടെയുള്ള രാജ്യങ്ങള് മുന്നോട്ടുവച്ച ഉപാധികള് ഖത്തര് തള്ളി. ഇതോടെ പ്രശ്ന പരിഹാരം ഉടന് ഉണ്ടാകില്ല എന്നത് വ്യക്തമായി. പ്രശ്നപരിഹാരത്തിന് മധ്യസ്ഥത വഹിക്കുന്ന കുവൈത്ത് വഴിയാണ് ഇവര് ഉപാധികള് ഖത്തറിനു കൈമാറിയത്.ഭീകരവാദത്തെ പിന്തുണയ്ക്കുന്നുവെന്ന ആരോപണത്തെ തുടര്ന്നാണ് സൗദി ഉള്പ്പെടെയുള്ള രാജ്യങ്ങള് ഖത്തറിനുമേല് ഉപരോധം ഏര്പ്പെടുത്തിയത്.
13 ഉപാധികളാണ് പ്രതിസന്ധി പരിഹരിക്കുന്നതിനായി സൗദിയും കൂട്ടരും മുന്നോട്ടുവച്ചത്. സൗദി അറേബ്യ, യുഎഇ, ഈജിപ്ത്, ബഹ്റൈന് എന്നീ രാജ്യങ്ങള് സംയുക്തമായാണ് പ്രശ്നപരിഹാരത്തിനു മധ്യസ്ഥത വഹിക്കുന്ന കുവൈത്തിനു മുന്നില് ഇത്രയും ഉപാധികള് വച്ചത്. ഉപാധികളിന്മേലുള്ള തീരുമാനം അറിയിക്കാന് 10 ദിവസത്തെ സമയമാണ് ഇവര് ഖത്തറിനു നല്കിയിട്ടുള്ളത്. ഇതിനു പിന്നാലെയാണ് ഉപാധികള് തള്ളിയും നിലപാട് കടുപ്പിച്ചു പറഞ്ഞു ഖത്തര് മുന്നോട്ടുവന്നത്.
അല് ജസീറ ചാനലും അനുബന്ധ സ്ഥാപനങ്ങളും അടച്ചുപൂട്ടുക, ഖത്തറില് തുര്ക്കി സൈന്യത്തിന്റെ സൈനികവിന്യാസം കുറയ്ക്കുക, ഇറാനുമായുള്ള നയതന്ത്രബന്ധം കുറയ്ക്കുക, തീവ്രവാദ സ്വഭാവമുള്ള സംഘടനകളുമായുള്ള ബന്ധം അവസാനിപ്പിക്കുക, തങ്ങളുടെ (സൗദി, ബഹ്റൈന്, യുഎഇ, ഈജിപ്ത്) ആഭ്യന്തര കാര്യങ്ങളില് പരിധിവിട്ട് ഇടപെടാതിരിക്കുക, ഈ നാലു രാജ്യങ്ങളില്നിന്നുള്ള പൗരന്മാര്ക്ക് ഖത്തര് പൗരത്വം നല്കുന്നത് അവസാനിപ്പിക്കുക തുടങ്ങിയ ഉപാധികളാണ് പ്രശ്നപരിഹാരത്തിന് ഇവര് നിര്ദേശിച്ചിരുന്നത്.
ഇപ്പോഴത്തെ അവസ്ഥ സന്തുഷ്ടവും സുഖകരമാണ്. എന്നാല്, സൗദിയും കൂട്ടാളികളും മുന്നോട്ടുവച്ച ഉപാധികള് യുക്തിരഹിതവും അപ്രായോഗികവുമാണെന്ന് ഖത്തര് പ്രതികരിച്ചു. ഖത്തറിന്റെ ഇഷ്ടത്തിനനുസരിച്ച് തുടര്ന്നും പ്രവര്ത്തിക്കുമെന്നും അതില് യാതൊരു പ്രശ്നവുമില്ലെന്നും യുഎസിലെ ഖത്തര് സ്ഥാനപതി പ്രതികരിച്ചു. പ്രതിസന്ധി ഉടന് പരിഹരിക്കാന് ഖത്തറിനുമേല് സമ്മര്ദമില്ലെന്നും അദ്ദേഹം വ്യക്തമാക്കി.
രാജ്യത്തിന്റെ പരമാധികാരവും സ്വതന്ത്രമാധ്യമ പ്രവര്ത്തനവും നിയന്ത്രിക്കാനുമാണ് സൗദിയും കൂട്ടരും ശ്രമിക്കുന്നതെന്ന് ഖത്തര് ആരോപിച്ചു. അവര് മറ്റുള്ളവരെ ഭയപ്പെടുത്തി അവരുടെ ആശയങ്ങള് മറ്റുള്ളവരുടെ മേല് അടിച്ചേല്പ്പിക്കാന് ശ്രമിക്കുകയാണ്.
https://www.facebook.com/Malayalivartha