തെരേസാ മേയുടെ നേതൃത്വത്തിലുള്ള ന്യൂനപക്ഷ സര്‍ക്കാരിനെ പുറത്തുനിന്നു പിന്തുണയ്ക്കാന്‍ ഡെമോക്രാറ്റിക് യൂണിയനിസ്റ്റ് പാര്‍ട്ടി, കണ്‍സര്‍വേറ്റീവ് പാര്‍ട്ടിയുമായി ധാരണയിലെത്തി. ഇതോടുകൂടി കോമണ്‍സ് വോട്ടെടുപ്പില്‍ ഡിയുപിയുടെ പത്ത് എംപിമാര്‍ തെരേസാ മേ സര്‍ക്കാരിന് അനുകൂലമായി വോട്ട് ചെയ്യും.

ഫലം പുറത്തുവന്ന് രണ്ടാഴ്ച നീണ്ട ചര്‍ച്ചകള്‍ക്കൊടുവിലാണ് ഇരുപാര്‍ട്ടികളും ധാരണയിലെത്തിയത്. മേ സര്‍ക്കാരിന് പിന്തുണ നല്‍കാന്‍ സമ്മതിച്ചതിനു പകരമായി വടക്കന്‍ അയര്‍ലന്‍ഡിന് അടുത്ത രണ്ടു വര്‍ഷത്തിനുള്ളില്‍ നൂറു കോടി പൗണ്ട് അധിക ധനസഹായം നല്‍കാനും ധാരണ ഉണ്ടായിട്ടുണ്ട്. വടക്കന്‍ അയര്‍ലന്‍ഡിലെ സ്‌കൂളുകള്‍, ആശുപത്രികള്‍, അടിസ്ഥാന വികസന മേഖല എന്നിവിടങ്ങളില്‍ രണ്ടു വര്‍ഷത്തിനുള്ളില്‍ നൂറു കോടി രൂപയുടെ അധിക ഫണ്ടിങ് നല്‍കാനാണ് ധാരണയായിരിക്കുന്നത്. ഡൗണിങ് സ്ട്രീറ്റില്‍ ഇരു പാര്‍ട്ടികളുടെയും ചീഫ് വിപ്പുമാര്‍ ധാരണയില്‍ ഒപ്പുവച്ചു.

ഡിയുപി സര്‍ക്കാരിന്റെ ഭാഗമാകില്ല എന്നും. പുറത്തുനിന്നു പിന്തുണ നല്‍കാനാണ് തീരുമാനമെന്നുമാണ് അറിയിച്ചിരിക്കുന്നത്. നിലവില്‍ ടോറികള്‍ക്കുള്ള 317 എംപിമാര്‍ക്കൊപ്പം ഡിയുപിയുടെ പത്തു പേര്‍ കൂടി ചേരുന്നതോടെ പൊതുസഭയില്‍ മേ സര്‍ക്കാരിന് 13 പേരുടെ ഭൂരിപക്ഷമുണ്ടാകും.