ജെറുസലേമിലെ സംഘര്‍ഷം;യുദ്ധം പുകയുന്നു!
ജെറുസലേമിലെ അല്‍ അഖ്‌സ പള്ളി സമുച്ചയത്തില്‍ മെറ്റല്‍ ഡിറ്റക്റ്റര്‍ സ്ഥാപിച്ചതുമായി ബന്ധപ്പെട്ട് ഇസ്രായേല്‍-പലസ്തിന്‍ സംഘര്‍ഷം രൂക്ഷമാകുന്നു. ഇതുവരെ അഞ്ച് പലസ്തീന്‍കാരും മൂന്ന് ഇസ്രായേല്‍ക്കാരും കൊല്ലപ്പെട്ടു.
വെള്ളിയാഴ്ച ഇസ്രയേല്‍ പൊലീസ് നടത്തിയ വെടിവയ്പില്‍ മൂന്നു പലസ്തീന്‍കാരും പലസ്തീന്‍ യുവാവിന്റെ കുത്തേറ്റു മൂന്ന് ഇസ്രയേലുകാരും കൊല്ലപ്പെട്ടിരുന്നു. ഇസ്രയേല്‍ കുടുംബത്തെ ആക്രമിച്ച പത്തൊന്‍പതുകാരനായ യുവാവിന്റെ വീട് ഇടിച്ചുനിരത്താനെത്തിയ സൈന്യത്തിനു നേരെ പലസ്തീന്‍കാര്‍ കല്ലും പെട്രോള്‍ ബോംബുമെറിഞ്ഞു. ആക്രമണം നടത്തുന്ന പലസ്തീന്‍കാരുടെ വീട് മുദ്രവയ്ക്കുകയോ ഇടിച്ചുനിരത്തുകയോ ഇസ്രയേല്‍ സേനയുടെ പതിവാണ്.
കിഴക്കന്‍ ജറുസലമിലും വെസ്റ്റ് ബാങ്കിനു സമീപം പലസ്തീന്‍ ഗ്രാമങ്ങളിലും പൊലീസുമായി യുവാക്കള്‍ ഏറ്റുമുട്ടി. പൊലീസ് വെടിവയ്പിലാണു കിഴക്കന്‍ ജറുസലമില്‍ പതിനേഴുവയസ്സുകാരന്‍ കൊല്ലപ്പെട്ടത്. പെട്രോള്‍ ബോംബ് പൊട്ടിത്തെറിച്ചാണു പതിനെട്ടുകാരനായ മറ്റൊരു യുവാവിന്റെ മരണം. ഗാസയില്‍നിന്ന് ഇസ്രയേലിനു നേരെ റോക്കറ്റ് തൊടുത്തതായും ആകാശത്തുവച്ചുതന്നെ പൊട്ടിയതിനാല്‍ ആളപായം ഉണ്ടായില്ലെന്നും ഇസ്രയേല്‍ സൈന്യം ആരോപിച്ചു.
ജറുസലമിലെ സംഘര്‍ഷത്തെക്കുറിച്ചു യുഎന്‍ രക്ഷാസമിതി ഇന്നു ചര്‍ച്ച ചെയ്യും. ഈജിപ്ത്, ഫ്രാന്‍സ്, സ്വീഡന്‍ എന്നീ രാജ്യങ്ങള്‍ അടിയന്തര ചര്‍ച്ച ആവശ്യപ്പെട്ടിരുന്നു. ഇസ്രയേല്‍ തീ കൊണ്ടു കളിക്കുകയാണെന്ന് അറബ് ലീഗ് സെക്രട്ടറി ജനറല്‍ അഹമ്മദ് അബൗല്‍ ഗെയ്ത് പറഞ്ഞു. എല്ലാവര്‍ക്കും സുരക്ഷ ഉറപ്പുവരുത്താന്‍ ഇസ്രയേലും ജോര്‍ദാനും സംയുക്തമായി പ്രവര്‍ത്തിക്കണമെന്നു യൂറോപ്യന്‍ യൂണിയന്‍ ആവശ്യപ്പെട്ടു. ജറുസലമില്‍ സംഘര്‍ഷം കനത്തതു അസ്വസ്ഥതയുണ്ടാക്കുന്നതായും ചര്‍ച്ചകളിലൂടെയും മൃദുസമീപനത്തിലൂടെയും സമാധാനം പുനഃസ്ഥാപിക്കണമെന്നും ഫ്രാന്‍സിസ് മാര്‍പാപ്പ സെന്റ് പീറ്റേഴ്‌സ് ചത്വരത്തില്‍ നടത്തിയ പ്രസംഗത്തിനിടെ പറഞ്ഞു.
അല്‍ അഖ്‌സ പള്ളി കവാടത്തിലെ മെറ്റല്‍ ഡിറ്റക്ടര്‍ ഒഴിവാക്കില്ലെന്ന് ഇസ്രയേല്‍ പ്രഖ്യാപിച്ചെങ്കിലും ഇവയുടെ എണ്ണം കുറയ്ക്കുമെന്ന സൂചന നല്‍കി. കവാടത്തിനു സമീപം സുരക്ഷാ ക്യാമറകള്‍ ഇന്നലെ മുതല്‍ സ്ഥാപിച്ചുതുടങ്ങി. പകരം സംവിധാനത്തെ കുറിച്ച് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു ആലോചിക്കുന്നതായാണു റിപ്പോര്‍ട്ടുകള്‍ ഉണ്ട്.
ഇസ്രായേലിലെ വീടുകള്‍ക്ക് നേരെ കത്തിയുമായി പലസ്തിന്‍ യുവാക്കള്‍ ആക്രമണത്തിന് മുതിരുന്നത് അതിര്‍ത്തിയില്‍ പതിവായ കാര്യമാണ്. സൈന്യം ഇവരെ കീഴ്‌പ്പെടുത്താനാണ് ശ്രമിക്കുക എന്ന് അവിടെ താമസമാക്കിയിട്ടുള്ള തിരുവനന്തപുരം സ്വദേശി മലയാളി വാര്‍ത്തയോട് പറഞ്ഞു. എല്ലാ രാജ്യങ്ങളും കൂടിച്ചേര്‍ന്ന് ഇസ്രായേലിനെ ക്രൂശിക്കുന്നതിന് പകരം ഇവിടെ എന്താണ് നടക്കുന്നത് എന്ന സത്യം മനസ്സിലാക്കണമെന്നും അദ്ദേഹം പറയുന്നു.
https://www.facebook.com/Malayalivartha
