ന്യുനപക്ഷങ്ങള് ഇന്ത്യയില് ജീവിക്കുന്നത് ഭയത്തില്:അമേരിക്കന് സ്റ്റേറ്റ് ഡിപ്പാര്ട്ട്മെന്റ് റിപ്പോര്ട്ട്
2016-ല് ഇന്ത്യയില് മതത്തിന്റെ പേരിലുള്ള അസഹിഷ്ണുതകള് വര്ദ്ധിച്ചതായി അമേരിക്ക. മതസ്വാതന്ത്ര്യത്തെക്കുറിച്ച് അമേരിക്കന് സ്റ്റേറ്റ് ഡിപ്പാര്ട്ട്മെന്റ് തയ്യാറാക്കിയ വാര്ഷിക റിപ്പോര്ട്ടിലാണ് ഇന്ത്യയ്ക്കെതിരായ പരാമര്ശം. ഗോ സംരക്ഷണത്തിന്റെ പേരിലുള്ള അതിക്രമങ്ങള് ഇന്ത്യയില് വര്ദ്ധിച്ചിരിക്കുകയാണെന്നും ഇതിനെതിരെ സര്ക്കാരിന്റെ ഇടപെടലുകള് കാര്യക്ഷമമല്ലെന്നും റിപ്പോര്ട്ടില് കുറ്റപ്പെടുത്തുന്നു.
ഇന്ത്യയിലെ 29 സംസ്ഥാനങ്ങളില് 24-ലും കന്നുകാലി കശാപ്പിന് പൂര്ണമായോ ഭാഗികമായോ നിരോധനം നിലനില്ക്കുന്നുണ്ട്. ഗോ സംരക്ഷണത്തിന്റെ പേരിലുള്ള ആക്രമണങ്ങള്ക്കെതിരെ നിയമനടപടികളെടുക്കാന് സര്ക്കാര് തയാറാവുന്നില്ല. ഇന്ത്യയില് ഗോസംരക്ഷണ പ്രവര്ത്തനങ്ങള്ക്ക് പ്രചാരണം കിട്ടിയതിനു ശേഷമാണ് അതിക്രമങ്ങളും വര്ദ്ധിച്ചതെന്ന് റിപ്പോര്ട്ട് ചൂണ്ടികാട്ടുന്നു.
ആറു സംസ്ഥാനങ്ങളില് മതപരിവര്ത്തനം നിരോധിച്ചിട്ടുള്ള ഇന്ത്യയില് പൊതുവെ മുസ്ലിങ്ങളാണ് ആക്രമണത്തിന് ഇരയാകുന്നതെന്നും ന്യൂനപക്ഷങ്ങള് ഭയത്തിലാണു കഴിയുന്നതെന്നും റിപ്പോര്ട്ടില് പറയുന്നു. ബീഫിനെച്ചൊല്ലി ആള്ക്കൂട്ട അക്രമങ്ങള് ഇന്ത്യയില് വ്യാപകമായി. കഴിഞ്ഞ വര്ഷം ക്രിസ്ത്യാനികളെ ലക്ഷ്യമിട്ട് 300-ലധികം അക്രമസംഭവങ്ങളാണ് നടന്നതെന്നും 2015ല് ഇത് 177 ആയിരുന്നെന്നും റിപ്പോര്ട്ടില് പറയുന്നു.
2015-ല് 751 മതസംഘര്ഷങ്ങളില് 97 പേര് കൊല്ലപ്പെട്ടുകയും 2264 പേര്ക്കു പരിക്കേല്ക്കുകയും ചെയ്തിരുന്നു. 2016-ല് 644 സമുദായ കലാപങ്ങളാണ് റിപ്പോര്ട്ട് ചെയ്തത്. 95 മരണവും 1921 പേര്ക്കു പരിക്കേറ്റുമെന്നാണ് ഔദ്യോഗിക കണക്കെന്നും അമേരിക്കയുടെ റിപ്പോര്ട്ട് ചൂണ്ടിക്കാട്ടുന്നു. ഡൊണാള്ഡ് ട്രംപ് അധികാരമേറ്റ ശേഷം മതസ്വാതന്ത്ര്യത്തെക്കുറിച്ച് അമേരിക്ക തയ്യാറാക്കിയ ആദ്യ റിപ്പോര്ട്ടാണിത്.
https://www.facebook.com/Malayalivartha