ഐസിസിന്റെ ശക്തികേന്ദ്രമായ ഇറാക്കിലെ മൊസൂളില്‍ നിന്ന് കാണാതായ 39 ഇന്ത്യാക്കാരുടെ ബന്ധുക്കളുടെ ഡി.എന്‍.എ സാംപിളുകള്‍ സര്‍ക്കാര്‍ ശേഖരിച്ചു തുടങ്ങി. മൂന്ന് വര്‍ഷം മുന്പ്. കാണാതായ ഇവരെ കുറിച്ച് യാതൊരു വിവരവും ലഭിക്കാതെ വന്നതിനെ തുടര്‍ന്നാണിത്.

2014 മുതലാണ് 39 പേരെ കാണാതായത്. ഇവരെ കുറിച്ച് അന്വേഷണ ഏജന്‍സികള്‍ പലവഴിക്ക് അന്വേഷണം നടത്തിയെങ്കിലും കണ്ടെത്താനായിരുന്നില്ല. പഞ്ചാബില്‍ നിന്നുള്ള 25 പേരെയാണ് കാണാതായത്. അമൃത്‌സര്‍ ജില്ലയില്‍ നിന്നുള്ളവരോട് സര്‍ക്കാര്‍ മെഡിക്കല്‍ കോളജിലെത്തി ഡി.എന്‍.എ സാംപിളുകള്‍ നല്‍കാനാണ് ആവശ്യപ്പെട്ടിരിക്കുന്നത്.

ഒരാഴ്ചയ്ക്കുള്ളില്‍ തന്നെ ഇന്ത്യയില്‍ നിന്നുള്ള സംഘം ഇറാക്കിലേക്ക് പോകുന്നുണ്ട്. 23ന് പോകാനാണ് ആദ്യം തീരുമാനിച്ചിരുന്നത്. എന്നാല്‍, അത് നീട്ടിവച്ചതായാണ് ഇപ്പോള്‍ അറിയുന്നത്. കാണാതായവരെ കുറിച്ച് അറിയുന്നതിനായി ഇറാക്കിലെ പ്രാദേശിക ഭരണകൂടവുമായി നിരന്തരം ബന്ധപ്പെടുന്നുണ്ടെന്ന് വിദേശകാര്യ മന്ത്രാലയത്തിലെ ഉദ്യോഗസ്ഥര്‍ പറഞ്ഞു. ഡി.എന്‍.എ സാമ്പിളുകള്‍ ലഭിച്ചാല്‍ അത് അവിടെ കസ്റ്റഡിയിലുള്ള ആളുകളുമായും കൊല്ലപ്പെട്ടവരുടെ മൃതദേഹങ്ങളുമായും ചേര്‍ത്ത് നോക്കി മരിച്ചോ ഇല്ലയോ എന്ന തീരുമാനത്തിലെത്താന്‍ കഴിയൂ.