എമര്‍ജെന്‍സി നമ്പറിൽ വിളിച്ച്‌ തനിക്ക് സ്ട്രോക്ക് ആണെന്ന് പറയുകയും ആംബുലന്‍സ് ആവശ്യപ്പെടുകയും ചെയ്തയാൾക്ക് യഥാർത്ഥത്തിൽ സംഭവിച്ചതെന്താണെന്ന് കേട്ടാൽ ഏവരും ഒന്ന് ഞെട്ടും.

സംഭവം എന്താണെന്നല്ലേ ?...ആംബുലൻസ് ആവശ്യപ്പെട്ടയാൾക്ക് യാതൊരു വിധ പ്രശ്നങ്ങളുമുണ്ടായിരുന്നില്ല. എന്നാൽ ആശുപത്രിയിൽ കഴിയുന്ന തന്റെ സുഹൃത്തിനെ കാണുവാൻ ഒരു ലിഫ്റ്റിനു വേണ്ടിയാണ് ഇയാൾ ആംബുലന്‍സ് വിളിച്ചു വരുത്തിയതെന്നാണ് റിപ്പോർട്ടുകൾ.

യുകെയിലാണ് ഇത്തരത്തിലൊരു സംഭവം. ആശുപത്രിയില്‍ കിടക്കുന്ന സുഹൃത്തിനെ കാണാനായിട്ടായിരുന്നു ഇയാള്‍ എനോര്‍ത്ത് വെസ്റ്റ് ആംബുലന്‍സ് സര്‍വീസിന്റെ എമര്‍ജെന്‍സി നമ്ബറായ 999ല്‍ വിളിച്ചത്. ആശുപത്രിയില്‍ എത്തിയ ഉടനെ തനിക്ക് കുഴപ്പം ഒന്നും ഇല്ലെന്ന് പറഞ്ഞ ശേഷം ഇയാള്‍ ഇതേ ആശുപത്രിയിലെ വാര്‍ഡില്‍ അഡ്മിറ്റായിട്ടുള്ള സുഹൃത്തിനെ കാണാന്‍ പോവുകയായിരുന്നു.

എമർജൻസി നമ്പറിൽ വിളിച്ചു ആംബുലസ് ആവശ്യപ്പെട്ട ഇയാളുടെ രണ്ടു കാലുകളും തളർന്നു പോയെന്നും നടക്കുവാൻ സാധിക്കുന്നില്ലെന്നുമാണ് അറിയിച്ചിരുന്നത്. എന്നാൽ ആശുപത്രിയിൽ എത്തുന്നത് വരെ അഭിനയിച്ചിരുന്ന ഇയാൾ അഡ്മിറ്റ് ചെയ്യാനായി പോകുന്ന വഴിമദ്ധ്യേ എഴുന്നേറ്റു നടക്കുന്നത് കണ്ടു മറ്റുള്ളവർ അമ്പരന്നു. തുടർന്നായിരുന്നു ഇയാൾ തന്റെ സുഹൃത്തിനെ കാണാനെത്തിയ കാര്യം വ്യക്തമാക്കിയത്.

സംഭവത്തില്‍ ആംബുലന്‍സ് വിഭാഗം കടുത്ത അമർഷം അറിയിച്ചിരുന്നുവെങ്കിലും ഇയാള്‍ക്കെതിരെ ഇതുവരെ യാതൊരു നടപടിയും എടുത്തിട്ടില്ലായെന്നാണ് വിവരം. ഇയാള്‍ക്ക് യാതൊരു കുഴപ്പവും ഇല്ലെന്ന് ആശുപത്രി അധികൃതര്‍ അറിയിച്ചിട്ടുണ്ട്.