ചന്ദ്രനില്‍ മൂന്നാമതു കാലു കുത്തിയ യുഎസ് ബഹിരാകാശസഞ്ചാരി അലന്‍ ബീന്‍ (86) അന്തരിച്ചു. യുഎസിലെ ടെക്‌സസിലെ ആശുപത്രിയിലായിരുന്നു അന്ത്യം. 1932ല്‍ യുഎസ് സംസ്ഥാനമായ ടെക്‌സസില്‍ ജനിച്ചു. ടെക്‌സസ് സര്‍വകലാശാലയില്‍ നിന്ന് നിന്ന് എയ്‌റൊനോട്ടിക്കല്‍ എന്‍ജിനീയറിംഗ് പാസായി. യുഎസ് നാവികസേനയില്‍ ടെസ്റ്റ് പൈലറ്റായി പ്രവര്‍ത്തിച്ചു. 1963ലാണ് നാസയിലെത്തിയത്. 

1969 നവംബറില്‍ അപ്പോളോ 12 ദൗത്യത്തിന്റെ ഭാഗമായാണ് ബീന്‍ ചന്ദ്രോപരിതലത്തില്‍ ഇറങ്ങിയത്. പീറ്റ് കോണ്‍റാഡിനു പിന്നാലെയാണു സഹപൈലറ്റായ അലന്‍ ബീന്‍ ചന്ദ്രനില്‍ കാലുകുത്തിയത്. 1973ല്‍ നാസയുടെ ബഹിരാകാശ ഗവേഷണ കേന്ദ്രമായ സ്‌കൈലാബിലേക്കു ബഹിരാകാശ യാത്രികരുടെ കമാന്‍ഡറും ബീന്‍ ആയിരുന്നു. 1981 ല്‍ നാസയില്‍ നിന്നു വിരമിച്ചു. ചിത്രകലയില്‍ കൂടുതല്‍ ശ്രദ്ധ കേന്ദ്രീകരിക്കുന്നതിനായിരുന്നു വിരമിക്കല്‍. 

2009 ല്‍ മനുഷ്യന്‍ ചന്ദ്രനില്‍ കാലു കുത്തിയതിന്റെ 40ാം വാര്‍ഷികാഘോഷത്തിന് അദ്ദേഹത്തിന്റെ പല ചിത്രങ്ങളും സ്മിത്ത്‌സോണിയന്‍ നാഷണല്‍ എയര്‍ ആന്‍ഡ് സ്‌പേസ് മ്യൂസിയത്തില്‍ പ്രദര്‍ശിപ്പിച്ചിരുന്നു.1969 ജൂലൈയില്‍ നീല്‍ ആംസ്‌ട്രോങ്ങാണ് ചന്ദ്രനില്‍ ആദ്യം കാല്‍ കുത്തിയ മനുഷ്യന്‍. ഇതുവരെ 12 ബഹിരാകാശ യാത്രികര്‍ ചന്ദ്രോപരിതലത്തില്‍ ഇറങ്ങിയിട്ടുണ്ട്. അപ്പോളോ 13 മാത്രമാണു ചന്ദ്രദൗത്യത്തില്‍ പാതിവഴിയില്‍ പരാജയം രുചിച്ചത്.