കുടുംബശ്രീ തുടങ്ങിയ മാട്രിമോണിയല്‍ വെബ്‌സൈറ്റ് എല്ലാ ജില്ലകളിലേക്കും വ്യാപിപ്പിക്കുന്നു. സുരക്ഷിതമായ വിവാഹത്തിനായി രണ്ടുവര്‍ഷം മുമ്പ് തൃശൂരില്‍ തുടങ്ങിയ മാട്രിമോണിയല്‍ വിജയമായതിനു പിന്നാലെയാണ് കൂടുതല്‍ ജില്ലകളിലേക്ക് എത്തുന്നത്. കുടുംബശ്രീ അംഗങ്ങള്‍ നേരിട്ട് നടത്തുന്ന സംരംഭമായതിനാല്‍ അപേക്ഷകരുടെ വിശദവിവരങ്ങള്‍ പരിശോധിച്ച ശേഷം മാത്രമാണ് തുടര്‍നടപടികളുണ്ടാവുക.
ആഗസ്റ്റില്‍ തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകളിലാണ് ഫ്രാൈഞ്ചസി തുടങ്ങുന്നത്. നിയമാവലിയും മാര്‍ഗരേഖയും വകുപ്പു മന്ത്രിക്കടക്കം സമര്‍പ്പിച്ചിട്ടുണ്ട്. 2016 ജൂലൈ 25നാണ് സംസ്ഥാനത്തെ ആദ്യത്തെ കുടുംബശ്രീ മാട്രിമോണിയല്‍ തൃശൂരിലെ പോര്‍ക്കളത്ത് തുടങ്ങിയത്. 88 വിവാഹങ്ങളാണ് ഇതുവരെ നടത്തിയത്. നിലവില്‍ രണ്ട് ഫ്രാഞ്ചൈസികളാണ് തൃശൂര്‍ ജില്ലയിലുള്ളത്.
ഗ്രാമപ്രദേശങ്ങളിലടക്കം വ്യാപിച്ച് കിടക്കുന്ന കുടുംബശ്രീ ശൃംഖല വഴി അപേക്ഷകര്‍ നല്‍കിയ വിവരങ്ങള്‍ ശരിയാണെന്ന് ഉറപ്പുവരുത്തുമെന്ന് മാട്രിമോണിയല്‍ പ്രസിഡന്റ് സിന്ധു ബാലന്‍ പറഞ്ഞു. പെണ്‍കുട്ടികള്‍ക്ക് രജിസ്‌ട്രേഷന്‍ സൗജന്യമാണ്. ആണ്‍കുട്ടികളെ മൂന്ന് കാറ്റഗറികളിലാക്കി രജിസ്‌ട്രേഷന്‍ ഫീസ് ഈടാക്കും. എസ്.എസ്.എല്‍.സി യോഗ്യതയുള്ളവര്‍ക്ക് 500, പ്ലസ് ടു 750, ഡിഗ്രി മുതല്‍ 1000 രൂപ എന്നീ ക്രമത്തിലാണ് ഫീസ് ഈടാക്കുക. വിവാഹം നടക്കുമ്പോള്‍ 10,000 രൂപയും അടയ്ക്കണം. പൊലീസ് വെരിഫിക്കേഷന്‍ പോലെയാണ് കുടുംബശ്രീ പ്രവര്‍ത്തകരുടെ അന്വേഷണം. പേരും വിലാസവും കിട്ടിയാല്‍ വിദ്യാഭ്യാസ യോഗ്യത, ജോലി തുടങ്ങി ഏതെങ്കിലും പൊലീസ് കേസുണ്ടോ എന്നതുവരെ അന്വേഷിക്കും.

www.kudumbashreematrimonial.com ആണ് വിലാസം. കേരളത്തിലാദ്യമായി കുടംബശ്രീ സംരംഭത്തില്‍ വിവാഹ മാട്രിമോണി നടപ്പാക്കിയ സിന്ധു ബാലന് മികച്ച പ്രവര്‍ത്തനത്തിനുള്ള അംഗീകാരവും ലഭിച്ചിട്ടുണ്ട്.