റേഷന് അരിവിഹിതം, കരിപ്പൂര് വിമാനത്താവളം, എച്ച്.എന്.എല്, കഞ്ചിക്കോട് വിഷയങ്ങളിലെല്ലാം പ്രധാനമന്ത്രി അനുകൂല നിലപാട് സ്വീകരിച്ചില്ല. ശബരിപാതയ്ക്ക് പച്ചക്കൊടി, മുഖ്യമന്ത്രി പിണറായി വിജയന്റെ നേതൃത്വത്തിലുള്ള സര്വക്ഷി സംഘം നിരാശരായി മടങ്ങി
വിവിധ ആവശ്യങ്ങളുന്നയിച്ച് തന്റെ നേതൃത്വത്തിലുള്ള സര്വ്വകക്ഷി സംഘം പ്രധാനമന്ത്രിയെ കണ്ടെങ്കിലും അനുകൂലമായ നിലപാടല്ല സ്വീകരിക്കുന്നതെന്ന തോന്നലാണ് തങ്ങള്ക്കുണ്ടായതെന്ന് മുഖ്യമന്ത്രി പിണറായി വിജയന്. പ്രധാനമായും ഭക്ഷഭദ്രതാ നിയമം മൂലം കേരളത്തിന് ലഭിച്ചു കൊണ്ടിരുന്ന റേഷന്വിഹിതം വെട്ടിക്കുറച്ചത് പുനസ്ഥാപിക്കണമെന്നാണ് ആവശ്യപ്പെട്ടത്. എന്നാല് നിയമത്തിന് അനുസൃതമായേ കാര്യങ്ങള് പറ്റൂ എന്ന് പ്രധാനമന്ത്രി നിലപാട് ആവര്ത്തിച്ചു. എ.പി.എല് വിഭാഗങ്ങള്ക്കുള്ള അരിവിഹിതം കുറഞ്ഞു. കേരളത്തില് അരിക്ഷാമമുള്ളതിനാല് അത് പുനസ്ഥാപിക്കണമെന്ന് ആവശ്യപ്പെട്ടിട്ടും മറ്റ് സംസ്ഥാനങ്ങള്ക്ക് ഉള്ള നിയമത്തിന് അനുസരിച്ചേ കാര്യങ്ങള് നടക്കൂ എന്നും പ്രധാനമന്ത്രി അറിയിച്ചു. ശബരി റെയില്പാതയുടെ കാര്യത്തില് മാത്രമാണ് പ്രധാനമന്ത്രി അനുകൂലമായ നിലപാട് സ്വീകരിച്ചതെന്ന് മുഖ്യമന്ത്രി മാധ്യമങ്ങളോട് സംസാരിച്ചതില് നിന്ന് വ്യക്തമായി.
കഞ്ചിക്കോട് കോച്ച് ഫാക്ടറി ഉറപ്പാക്കാമെന്ന് റെയില്വേ മന്ത്രി ഉറപ്പ് നല്കിയിരുന്നു. എന്നാല് ഡല്ഹിയില് എത്തിയപ്പോള് കോച്ചിഫാക്ടറിയില്ല എന്ന വാര്ത്തയാണ് അറിയാന് കഴിഞ്ഞത്. ഫാക്ടറിയുടെ ആവശ്യവും ചരിത്രവും പ്രധാനമന്ത്രിയെ ബോധ്യപ്പെടുത്തിയെങ്കിലും കൃത്യമായ ഉറപ്പ് നല്കിയില്ല. അങ്കമാലി -ശബരി പാത സംബന്ധിച്ച് സംസ്ഥാന സര്ക്കാര് റെയില്വേയുമായി ചര്ച്ച നടത്തണമെന്നും ഇക്കാര്യം നടപ്പാക്കാമെന്നും പ്രധാനമന്ത്രി ഉറപ്പ് നല്കി. നിലവില് സംസ്ഥാനത്തുള്ള മഴക്കെടുത്തിയെ കുറിച്ചും പ്രധാനമന്ത്രിയോട് സംസാരിച്ചു. സര്വകക്ഷി സംഘത്തെ അയയ്ക്കാം എന്നല്ലാതെ യാതൊരു ഉറപ്പും നല്കിയില്ലെന്ന് മുഖ്യമന്ത്രി വ്യക്തമാക്കി.
ഹിന്ദുസ്ഥാന് ന്യൂസ് പ്രിന്റ് ലിമിറ്റഡ് പൊതുമേഖലയില് നിലനിര്ത്തണമെന്ന ആവശ്യം കേന്ദ്രം അംഗീകരിക്കാത്തസ പശ്ചാത്തലത്തില് കേരളാ ഗവണ്മെന്റുമായി ചര്ച്ച നടത്തി സര്ക്കാരിന് കമ്പനി കൈമാറണമെന്ന് സര്വകക്ഷി സംഘം ആവശ്യപ്പെട്ടു. സംസ്ഥാന സര്ക്കാര് 700 ഏക്കര് വിട്ട് നല്കിയതാണ് ഫാക്ടറിക്കായി. അസംസ്കൃത വസ്തുക്കള് സൗജന്യനിരക്കില് നല്കിയിരുന്നു. കമ്പനി വില്ക്കരുതെന്നും ആവശ്യപ്പെട്ടു. ഇക്കാര്യത്തിലും കൃത്യമായ മറുപടി നല്കിയില്ല. കരിപ്പൂര് വിമാനത്താവളം കൂടുതല് പ്രവര്ത്തനസജ്ജമാക്കണമെന്നും വലിയവിമാനങ്ങള് ഇറങ്ങാന് സൗകര്യം ഒരുക്കണമെന്നും ആവശ്യപ്പെട്ടു. വ്യോമയാന മന്ത്രി ഇക്കാര്യത്തില് നേരത്തെ ഉറപ്പ് നല്കിയതാണെന്നും സര്വക്ഷിസംഘം ചൂണ്ടിക്കാട്ടി. പക്ഷെ, പ്രധാനമന്ത്രി അനുകൂല നിലപാട് സ്വീകരിച്ചില്ല. പ്രതിപക്ഷനേതാവ് രമേശ് ചെന്നിത്തല, സംസ്ഥാനത്തെ എം.പിമാര്, രാഷ്ട്രീയപാര്ട്ടികളുടെ പ്രതിനിധികള് എന്നിവര് സര്വകക്ഷി സംഘത്തിലുണ്ടായിരുന്നു.
https://www.facebook.com/Malayalivartha